Romaq 8

Haû Sô Mai Chyungxe Dui É Hkyô

1Haû mù luî, ahkuî, Hkrisidùq Yesuq má nghut nyî bâng é matú gi, mara byî é hkyô a jòq lô é nghut lhê. 2Hkâsu mù gâ le, chyungxe duì hkyô eq sêng é So é târâ gi, Hkrisidùq Yesuq dông, yubàk mara eq shî‑nò hkyo é târâ mai, ngo lé lhoqlhut yû bê nghut lhê. 3Haû jep é târâ gi, yubàk gùngshô é yánmai, wum nyhóm luî a wó kut é hkyô lé, Garai Gasang gi, mara hkyut hkungga dùt nhâng râ matú, yubàk byu é gùnghkyâng dông, Yhang Zo sîng lé nhang kat é dông kut pyám bê nghut ri. 4Haû mù, Garai Gasang gi, yubàk gùngsho dông chyungxe a dui é za Sô dông chyungxe duì bang nghut é ngá-nhúng má, haû jep é târâ má bo é hkyô pé lé, wó lhoqdìk râ matú, gùngsho ralhum má, mara lé dòqdân pyám bê nghut ri.

5Haû yubàk gùngsho dông chyungxe dui é bang gi, gùngsho yùt yùt ô nau é hkyô pé lé myìt zùq nyi akô; haû Sô dông chyungxe dui é bang kúm gi, Sô ô nau é hkyô pé lé myìt zùq nyi akô nghut ri. 6Haû yubàk byu é myìt gi, shi é hkyô nghut ri; haû So èq hkang to huí su é myìt kúm gi, chyungxe eq nguì ngón hkyô nghut ri. 7Haû yubàk myìt gi, Garaî é târâ ô má a nyi é htoq agó, haú lé a wó cháng kut é yánmai, Garaî é gyè nghut ri. 8Haû yubàk gùngshô èq hkang tô é hui bang gi, Garai Gasang lé a wó gabú nhâng kó nghut ri.

9Nghut kôle, Garai Gasâng é Sô gi, núngmòq chyáng lúng nyî bê nghut jáng, núngmòq gi, haû yubàk gùngshô èq hkang to huî é bang a nghut lô é za, So èq hkang to huî é bang nghut akô. Rayùq yùq gi, Hkrisidùq é Sô lé a wó é nghut jáng, Hkrisidùq eq a sêng é sû nghut lhê. 10Nghut kôlhang, nàng má Hkrisidùq nyi nyi é nghut jáng, náng é gùngdu gi, yubàk marâ é yánmai shî kôlhang, náng é sô gi, díngmán hkyo é yánmai dui nyi ri. 11Hau htoq agó, Yesuq lé shi é mai lhoqdui toq yû Su é Sô gi, núngmòq má nyi nyi é nghut jáng, Hkrisidùq Yesuq lé shi é mai lhoqdui toq yû Sû gi, núngmòq má nyi nyi é, Yhâng é Sô dông mai, núngmòq é, shî sê é gùngdu pé lé le, chyungxe duì nhâng râ nghut lhê.

12Haû mù luî, Gu-mang wuì ê, ngá-nhúng gi, yubàk gùngsho dông chyungxe duì râ matú, wò wó é bang a nghut. 13Hkâsu mù gâ le, haû yubàk gùngsho dông chyungxe duì kô é nghut jáng, núngmòq gi, shî râ nghut lhê; nghut kôlhang, haû gùngshô é shut shaî hkyô lé, So èq sat pyám kô é nghut jáng, núngmòq gi, chyungxe duì râ nghut lhê. 14Garai Gasâng é So èq shuî û é hui bang gi, Garai Gasâng é yhang zô pé nghut lhê. 15Hkâsu mù gâ le, núngmòq gi, gyùq râ matú, núngmòq lé jùn dum taû dùt nhang é sô lé, a hàp yu é za, ngá-nhúng lé zo yín yu é Sô lé hàp yu tô é bang ru nghut lhê; haû mù, ngá-nhúng gi, Yhâng é yánmai, “Aba,#8:15 Aba gâ é gi, Aramik myíng dông, âwa gâ é lichyúm nghut lhê. Âwa ê” nghû wùt é nghut lhê. 16Ngá-nhúng gi, Garai Gasâng é yhang zô pé nghut é lé, Sô haû gi, ngá-nhûng é sô eq rahá sàksé hkâm nyi ri. 17Ahkuî, ngá-nhúng gi, zo wuî nghut bê yánmai, Hkrisidùq eq rahá, Garai Gasâng é a-myû hkûngxoq pé wó dùt é nghut lhê. Ngá-nhúng gi, Hkrisidùq é wuîhke jamjau pé lé, gè gè yhang bo hui zô é nghut jáng, Yhâng é hpungwup shingkang lé le, bo myang hkam yù râ nghut lhê.

Htângnùng Lhê É Hpungwup Shingkang

18Ngá-nhûng é ahkui lhê é wuîhke jamjau hkyô pé gi, ngá-nhúng lé shit râ nghut é hpungwup shingkang eq whuí râ a gíngdán nghû, ngò wó myìt ri. 19Haû hpan to huî é lhúnglháng gi, Garai Gasâng é yhang zô pé lé lhoqhtoq shit byi râ lé, gyai yhang myìt láng nyi akô nghut ri. 20Hkâsu mù gâ le, haû hpan to huî é lhúnglháng gi, a-kyû a bo é chyat dùt byùq bê nghut ri. Haû gi, yhûmsîng hkyin yu é dông a nghut é za, haû su dùt nhâng Sû ô nau é dông kut é nghut ri. 21Haû hpan to huî é lhúnglháng gi, htên byòq byùq râ matú shúm dùt é mai lhoqlhut é hui luî, Garai Gasâng é yhang zô pê é hpungwup bo é lùthkyô má wó wâng râ matú, myòqbyu tô é nghut lhê.

22Haû hpan to huî é lhúnglháng gi, ahkui hkyíng jé shoq, zohkû nò no é su nò-kying kyîng nyì kô é lé, ngá-nhúng sê lhê. 23Haú pé za a nghut, So é sânghi ashi#8:23 So é sânghi ashi gâ é gi, Sô gi, Garai Gasang byî é chyûnghuq pé mâ é sânghi lhum nghut lhê. lé wó yû bê bang ngá-nhúng le, zô pé dông yín yu é jeju lé láng uchyang, i‑myìt ûnghkaû má nò-kying kyîng é nghut lhê. Zô pé dông yín yu é jeju haû gi, ngá-nhûng é gùngdu hkyi xe yù hkyô nghut lhê. 24Hkâsu mù gâ le, ngá-nhúng gi, myìt myòqbyù hkyô haû mai hkyi yu é hui bê nghut lhê. Nghut kôlhang, byu-myang é lé myìt myòqbyu é gi, myìt myòqbyu é hkyô ra-tsuí le a nghut. Yhûmsîng myang to bê é lé, ó yùq wá myìt myòqbyù shirâ lhú? 25Nghut kôlhang, ngá-nhúng gi, a wó shî é lé myìt myòqbyu é nghut jáng, myìt hîng hîng kut láng é nghut lhê.

26Haû eq rajung za, Sô gi, ngá-nhúng wum nyhôm é hkyô má garúm byî ri. Ngá-nhúng gi, haî dung râ é lé a sé kôlhang, haû Sô yhang gi, dang mai a wó taî htoq é nò-kying htê dông, ngá-nhûng é matú bo dûng xoq byî ri. 27Ngá-nhûng é i‑myìt ûnghkaû lé gôn wú é Sû gi, haû Sô myìt é hkyô lé sê lhê, hkâsu mù gâ le, haû Sô gi, Garai Gasang ô nau é dông, sân-yúng bâng é matú bo dûng xoq byî ri.

Bànshoq Lé Je Wó Ung Pyám Râ Hkyô

28Garai Gasang gi, Yhang myìt sôn tô é eq rajung za, ji yù luî, Yhang lé chyitdàp bâng é matú, lhúnglháng lé ge é dông chyat kut é hkyô lé, ngá-nhúng sê lhê. 29Hkâsu mù gâ le, Yhang Zo gi, gu-mang wuì myo myo má zo-mún dùt sháng gàq ga, Garai Gasang gi, hí te sê tô é bang lé, Yhang Zô é sâmlai eq wó pûng nhâng râ matú, hí mai masàt to bê nghut ri. 30Hau htoq agó, Yhang, hí mai masàt to bê bang lé gi, ji yu ri; ji yù bê bang lé gi, mara hkyut san byî ri; mara hkyut san byî é hui bang lé gi, hpungwup shingkang bò nhang ri.

31Haû jáng gi, shí hkyô eq séng luî, ngá-nhúng haî taí shirâ lhú? Garai Gasang gi, ngá-nhûng hkyam shut nghut jáng, ngá-nhúng lé, ó yùq wá gyè wám kut râ lhú? 32Yhûmsing é Yhang zo lé lháng a ha bûn é za, ngá-nhúng bànshoq bâng é matú àp byî pyâm é Sû gi, Yhang lé le, lhúnglháng lé le, rahá laí laí byi râ a nghut lhú? 33Garai Gasâng èq hkyin yu to bê bang lé, ó yùq wá mara wó hûn râ lhú? Garai Gasang gi, mara hkyut san byi Sû nghut ri. 34Hkrisidùq Yesuq gi, shî hkám luî, shî hkâm é htoq agó, shi é mai lhoqdui toq yu é hui mù, Garai Gasâng é lòqyo hkyam má nghut nyî luî, ngá-nhûng é matú bo dûng xoq byî nyì bê nghut é yánmai, ó yùq wá mara wó byi râ lhú? 35Hkrisidùq é chyitdàp myìt mai, ngá-nhúng lé, hai èq wá wó lhoqkang râ lhú? Gunjang huî é hkyo èq lùq? Wuîhke huî é hkyo èq lùq? Zing-ri huî é hkyo èq lùq? Mùtmó huî é hkyo èq lùq? Gùngchîn dùt huî é hkyo èq lùq? Gyùq jûng èq lùq? Sham èq lùq? 36Haû gi,

“Náng é yánmai, ngá-mòq, nyí wuî sat pyâm é huî nyi ri;

sat râ matú nyhi tô é sau pé lé su, ngá-mòq lé myìt pyâm akô.”#Hkya-on 44:22

ga kâ tô é eq rajung za nghut ri. 37A wó lhoqkang; ngá-nhúng lé chyitdàp Su é yánmai, ngá-nhúng gi, haú pé bànshoq lé je wó ung pyâm é nghut lhê. 38Hkâsu mù gâ le, shî kôlhang, byùn kôlhang, maumang lagyô pé nghut kôlhang, agè ashop é nàt pé nghut kôlhang, shí i-pyàt nghut kôlhang, htang pyàt nghut kôlhang, haí jung a-tsam pé nghut kôlhang, 39htoq tsáng mâ é nghut kôlhang, a‑ô tsáng mâ é nghut kôlhang, hpan tô é gótû haî nghut kôlhang, ngá-nhûng é Yhûmsîng Hkrisidùq Yesuq má bo é Garai Gasâng é chyitdàp myìt mai, ngá-nhúng lé wó lhoqkâng pyám râ a nghut nghû, ngò gi, hkyak wó sê yu ri.

Currently Selected:

Romaq 8: znot

Highlight

Copy