Romaq 7

Târâ Mai Lùt É Hkyô

1Gu-mang wuì ê, ngò gi, târâ lé sê é bang núngmòq lé taî nyi lhê: haû târâ gi, byù rayùq lé, yhang, chyungxe dui nyi é u lé za wó ùphkang é lé, núngmòq a sé kó lhú? 2Dangké, i-kun wàng bê myiwe myhí rayùq gi, yhâng é yhûmsîng hpó chyungxe dui nyi é ahkyíng má, târâ èq ùp zing tô é huî ri; nghut kôlhang, yhâng é yhûmsîng hpó shi byùq é nghut jáng gi, haû i-kun wàng târâ mai, yhang wó lùt bê nghut ri. 3Haû nghut é yánmai, yhâng é yhûmsîng hpó chyungxe dui nyi ashî u lé, yùqgè góyùq eq hâng lhûm é nghut jáng gi, yhang lé, sulàng lú sû ga kôrâ nghut lhê. Nghut kôlhang, yhâng é yhûmsîng hpó shi byùq é nghut jáng gi, yhang, târâ haû mai lùt bê nghut luî, yùqgè góyùq eq hâng lhum kôlhang, sulàng lú sû a nghut lo.

4Haû mù luî, ngá é gu-mang wuì ê, núngmòq le, haû shi byùq é mai lhoqdui toq yù hui bê sû Yùqgè chyáng wó xoq mù, ngá-nhúng gi, Garai Gasang lé ashi wó zui byi sháng gàq ga, Hkrisidùq é gùngdu dông mai, jep é târâ eq shi gang bê nghut lhê. 5Hkâsu mù gâ le, ngá-nhúng, yubàk gùngsho má nghut nyi é hkûn, ngá-nhúng gi, shî‑nò hkyo é ashi zui sháng gàq ga, jep é târâ é yánmai htoq lo é yubàk yùt yùt ô nau é hkyô gi, ngá-nhûng é gùngdu pé má mû zuî nyi é nghut lhê. 6Nghut kôlhang, ahkuî gi, ngá-nhúng lé ùp zing tô é jep é târâ eq shi gang bê nghut mû, jep é târâ mai lùt bê nghut é yánmai, kâ tô é hkyô xau dông a nghut é za, So é hkyô sik dông ngá-nhúng dójaú nyi é nghut lhê.

Jep É Târâ Eq Yubàk Mara

7Haû jáng, ngá-nhúng hkâsu taí râ lhú? Jep é târâ gi, yubàk mara nghut lhê lhú? Ra-tsuí lháng a nghut! Gè gè ga jáng, haû jep é târâ dông mai za a nghut le, yubàk mara lé, ngò wó sê é a nghut. Hkâsu mù gâ le, “myòqnòq myìt hkâbô”#Htoq Ló 20:17 ga jep é târâ má a taî tô é nghut jáng, myòqnòq é hkyô lé, ngò sé râ a nghut. 8Nghut kôlhang, yubàk mara gi, hkunmó é ahkáng lé chûng mù, ngò má myòqnòq hkyô jung hkangmó lhoqhtoq byî ri; hkâsu mù gâ le, jep é târâ hkaû má a nghut jáng, yubàk mara gi, shi é za nghut lhê. 9Ngò gi, târâ hkaû má a nghut é za chyungxe dui wú bê nghut lhê; nghut kôlhang, haû hkunmó htoq lô jáng, yubàk mara gi, dui lò mù, ngò gi, shî bê nghut lhê. 10Haû mù luî, chyungxe duì nhâng râ matú nghut é hkunmó haû gi, shî‑nò hkyô dùt byùq é lé, ngò wó sê é nghut lhê. 11Hkâsu mù gâ le, yubàk mara gi, hkunmó é ahkáng lé chûng mù, ngo lé mhaû yù luî, hau èq ngo lé shî nhang ri. 12Haú pé lé wú jáng, jep é târâ gi, chyoiyúng ri; haû hkunmó gi, chyoiyúng, díngmán é eq ge é nghut ri.

13Haû nghut jáng, ge é hkyô haû gi, ngá é matú shî‑nò hkyô dùt byùq bê lhú? Haú dông a nghut! Nghut kôlhang, yubàk mara lé gi, yubàk mara dông hkyak wó lhoqhtoq shit râ matú, haû ge é hkyô dông mai, yubàk mara gi, ngò má shî‑nò hkyô lhoqhtoq bê nghut luî, yubàk mara gi, gè gè yhang agè ashop dùt é lé, hkunmó dông mai tûn shit é nghut lhê.

14Hau htoq agó, jep é târâ gi, sô eq sêng é hkyô nghut é lé, ngá-nhúng sê lhê; nghut kôlhang, ngò má gi, gùngsho eq sêng é hkyô za bo é nghut luî, yubàk mara má jùn dông ung zô é hui bê nghut lhê. 15Ngò haî kut nyi é hkyô lé, ngò a sé. Hkâsu mù gâ le, ngò kut nau é hkyô lé gi, a kut é za, ngò a naù a wôm é hkyô lé kut é yánmai nghut lhê. 16Ngò a kut nau é lé kut é nghut jáng gi, haû jep é târâ ge é lé, ngò myìt huî é nghut lhê. 17Ahkuî gi, haû lé ngò yhang kut nyi é a nghut lo, ngò má lúng tô é haû yubàk shèq kut é ru nghut lhê. 18Ngò má, nghut bê, ngá é yubàk gùngsho má ge é hkyô haî le a bo é lé, ngò sê lhê. Hkâsu mù gâ le, ge é hkyô lé kut nau é myìt ngò má bò kôlhang, haû lé a wó kut htoq nghut ri. 19Hau é yánmai, ngò kut nau é ge é hkyô lé gi, a kut é za, ngò a kut nau é agè ashop hkyô lé gi, ngò xoq kut nyi ri. 20Ahkuî, a kut nau é hkyô lé ngò kut nyi é nghut jáng, haû lé ngò yhang kut nyi é a nghut lô é za, ngò má lúng tô é haû yubàk shèq haû lé kut nyi é ru nghut lhê.

21Haû mù, ge é hkyô lé ngò kut nau é hkûn, ngò má agè ashop hkyô htoq lô lò mù é târâ lé, ngò myang ri. 22Hkâsu mù gâ le, ngò gi, Garai Gasâng é târâ lé, ngá é i‑myìt ûnghkaû má myìt nguì gabú nyi lhê. 23Nghut kôlhang, ngá é gùngdu showui showang pé má bo é gótû târâ gi, ngá é i‑myìt târâ eq majan zân lhûm é nghut luî, ngá é gùngdu showui showang hkaû má mû zuî nyi é yubàk é târâ má, ngo lé shúm byû dùt nhang é lé, ngò myang ri. 24Ngò gi, shogyo rayhup dùt sû nghut rî-nhung! Shî nhang é gùngdu shî mai, ó yùq wá, ngo lé wó hkyi yù râ lhú? 25Ngá-nhûng é Yhûmsîng Yesuq Hkrisidùq dông mai wó lùt bê nghut mù, Garai Gasang lé jeju hkya-ôn nyi lhê!

Haû mù luî, ngò yhang, myìt é dông gi, Garai Gasâng é târâ lé châng lhê, nghut kôlhang, yubàk gùngsho dông gi, yubàk é târâ lé châng lhê.

Currently Selected:

Romaq 7: znot

Highlight

Copy