Romaq 9

Garai Gasang Hkyin Yu É Isira-elaq Byu Pé

1Ahkuî, ngò gi, Hkrisidùq má tengmán é dang taí râ; ngò a mhaû é lé, haû Chyoiyúng Sô gi, ngá é ûnghkaû myìt má hkyak sàksé hkâm nyi ri. 2Ngò gi, ngá é myìt nhiklhum má, gyai yhang yón kuq nyi é eq ayang hpuzô nyi lhê. 3Hkâsu mù gâ le, ngò gi, ngá é byùhú, ngá é gu-mang wui é matú, nhîng é hui luî Hkrisidùq eq gâng le lháng gè râ su gâ ri. 4Haú bang gi, Isira-elaq byu pé nghut lhê. Zo yín yû huî é hkyô le, hpungwup shingkang le, dangshikaq pé le, târâ lé myang hàp yu é hkyô le, noqkuq yhûm má noqkuq é hkyô le, danghtum htûm tô é pé lé le, yhángmòq wó yu akô nghut ri. 5Haû myìng hû é îchyí îwâ pé gi, yhángmòq é îchyí îwâ pé nghut luî, byu é hkyam dông gon jáng, Hkrisidùq gi, yhángmòq a-myû mâ é nghut ri. Yhang gi, lhúnglháng lé up é, ahtum abyùq hkya-on huî é Garai Gasang nghut ri! Amen.

6Haû gi, Garai Gasang danghtum htûm tô é, akôm dùt byùq bê nghû nau é a nghut. Hkâsu mù gâ le, Isira-elaq byu pé bànshoq bang gi, Isira-elaq byù a-kyîng chyat a nghut kó nghut ri. 7Abraham é awùt ashín bànshoq bang gi, yhâng é zo wuî a-kyîng chyat nghû a wó taî é nghut lhê. Hau é malaî, “Isak dông mai lo é lé, náng é awùt ashín nghû són byi râ nghut lhê.”#A-pûn 21:12 gâ tô ri. 8Radông taí sháng ga jáng, gùngsho mai hku é zo wuî gi, Garai Gasâng é zo wuî a-kyîng a nghut kó, danghtum htûm tô é eq sêng é zo wuî za shèq, Abraham é awùt ashín pé dông són byî é nghut lhê. 9Hkâsu mù gâ le, “Ding tô é ahkyíng má, ngò dum taû lé mù, Sara gi, yùqzo hkû râ nghut lhê.”#A-pûn 18:10, 14 ga danghtum htûm tô é yánmai nghut lhê.

10Haû za a nghut, Rebeka é yhang zô nhiktang é îwa gi, ngá-nhûng é îwa nghut sû Isak rayùq za nghut lhê. 11-12Nghut kôlhang, Garai Gasang myìt hpyit to mù hkyin yu é hkyô gi, múzó mai a nghut é za, hkyin ji yù Su é yánmai nghut é lé, wó gîng nyì sháng gàq ga, haû zozûm nhik a hku lé shî é htoq agó, ge é eq a ge é múzó haî lháng a kut shi-má, “Haû ko sû yùq gi, tiq sû yùq lé dójaú râ nghut lhê.”#A-pûn 25:32 ga, Rebeka lé taî kyô tô é nghut lhê. 13Haû gi, “Yakup lé, ngò chyitdàp lhê, nghut kôlhang, Eso lé gi, a ngui é nghut lhê.”#Mal 1:2-3 ga kâ tô é eq rajung za nghut ri.

14Haû nghut é yánmai, ngá-nhúng hkâsu nghû taí râ? Garai Gasang gi, a târâ é sû nghut lhê lhú? Ra-tsuí lháng a nghut! 15Hkâsu mù gâ le,

“Ngò, shogyo nhikmyin naù sû lé, shogyo nhikmyin râ nghut lhê;

Ngò, jeju byi naû sû lé, jeju byi râ nghut lhê.”#Htoq Ló 33:19

ga, Mosheq lé Yhang taî ri. 16Haû mù luî, haû hkyin yu é hkyô gi, byù yùt yùt ô nau é yánmai le a nghut, shi-kùt é yánmai le a nghut, Garai Gasâng é shogyo nhikmyîn é yánmai za nghut lhê. 17Hkâsu mù gâ le, Chyúmdang má, “Náng chyáng Ngá é a-tsam wó tûn shit râ eq mingkan gón má Ngá é myìng wó lhoqpyo jàm râ matú shèq, Ngò, nang lé lhoqtoq kat é nghut lhê.”#Htoq Ló 9:16 ga, Hpara-uq lé taî ri. 18Haû mù luî, Garai Gasang gi, shogyo nhikmyin naù sû lé, shogyo nhikmyin mù, myìt lhoqhtân byi naù sû lé, myìt lhoqhtân byî ri.

19Núngmòq mâ é rayùq yùq, “Haû jáng, Garai Gasang gi, ngá-mòq lé haî mù mara hun nyi ashî lhú? Yhang ô nau é hkyô lé, ó yùq wá wó hkûm pyâm lhê lhú?” ga, ngo lé taí kôrâ nghut lhê. 20Nghut kôlhang, Garai Gasang lé dang tu sû byù nàng gi, ó yùq wá nghut lhê lhú? Saî to hui bê é zè pé gi, “Nàng, haî mù ngo lé shî su kut saî tô lhê lhú?” nghû saî é Sû lé wó taí râ lhú? 21Tso-au saí sû gi, tsohtung ralhum mai za, hkìk é tso-au pé eq a hkìk é tso-au pé saí râ ahkáng wó lhê a nghut kô lhú?

22Garai Gasang gi, Yhâng é nhikmó-yo hkyô tûn shit luî, Yhâng é a-tsam lé sé nhâng naù kôlhang, htên byòq râ matú hen tô é, nhikmó-yo gíng é tso-au pé lé, myìt hîng hîng shîrang pyâm nyi é hkyô lé, taí râ jang haî jòq ashî lhú? 23Hpungwup shingkâng é matú noq mai hen to bang nghut é, Yhang shogyo nhikmyin huî é bang lé, Yhâng é agùn agó é hpungwup shingkang lé sé nhâng naù mù, Yhang haû su kut é nghut jáng, taí râ haî jòq ashî lhú? 24Haú bang gi, Yudaq byu pé mai za a nghut, tûngbaù pé mai le ji yù huî é bang ngá-nhúng nghut lhê. 25Haû eq rajung za, Hose-a laiká má Yhang taî tô é gi,

“Ngá é byù myû a nghut é bang lé, ‘Ngá é byù myû’ nghû;

Ngò a chyit é byìzo lé ‘Ngò chyit sû’ nghû wùt râ nghut lhê.”#Hos 2:23

gâ ri. 26Haû mù,

“‘Núngmòq gi, ngá é byù myû pé a nghut.’ nghû yhángmòq lé taî é jowò má yhang,

yhángmòq gi, ‘Rû dui nyi é Garai Gasâng é yhang zô pé’ ga wùt é hui kôrâ nghut lhê.”#Hos 1:10

gâ ri.

27Esai-a le, Isira-elaq byu pé eq séng luî garu taî é gi,

“Isira-elaq yhang zo yhang shû pé gi, wuìshuq lung-aû yàm mâ é se-muî su myo kôle,

myìt gyó tô é bang za shèq hkyi yu é hui kôrâ nghut lhê.

28Hkâsu mù gâ le, haû Yhûmsîng gi, myìdàm htoq má Yhâng é târâ jéyáng hkyô lé hân hân lhoqdìk lhoqhtûm pyám râ nghut lhê.”#Esai 10:22-23

gâ ri.

29Haû eq rajung za, hí lé Esai-a taî tô é gi,

“A-tsam dìk shoq bò sû Yhûmsîng za, ngá-nhúng lé, awùt ashín a myhit to byî é nghut jáng,

ngá-nhúng gi, Sodom wà su dùt byùq luî, Gomora wà mó eq pung byùq râ nghut lhê.”#Esai 1:9

gâ ri.

Isira-elaq Byu Pé A Lùmjíng Kô É Hkyô

30Haû mù, ngá-nhúng hkâsu nghû taí râ lhú? Díngmán hkyô lé a châng hkat é tûngbaù pé gi, haú lé wó yù bekô; haû gi, lùmjíng hkyo é yánmai wó yu é díngmán hkyô nghut ri. 31Nghut kôlhang, târâ eq sêng é díngmán hkyô lé châng hkat é Isira-elaq byu pé gi, haú lé a wó yù kó nghut ri. 32Haî mù a wó yû kô é lhú? Yhángmòq gi, lùmjíng myìt èq châng hkat kô é a nghut é za, múzó pê èq châng hkat kô é yánmai, a wó yû kô é nghut ri. Yhángmòq gi, “htûng htê râ lùqgòk” má htûng leng bekô nghut ri. 33Haû,

“Wú keq, htûng leng râ lùqgòk eq myìt lèqbàt nhâng râ lùqmó cham lé, Ngò, Zi-un bùm má lheq to luî,

Yhang lé lùmhkaû sû gi, hkâ-nhám le hoq hpû é hui râ a nghut.”#Esai 8:14, 28:16

ga kâ tô é eq rajung za nghut ri.

Currently Selected:

Romaq 9: znot

Highlight

Copy