Gyung So 19
19
Chî San Chî Sêng É Wuì
1Haû Yhûmsîng Garai gi, Mosheq eq Arun lé, 2“Haû Yhûmsîng Garai hkunmó hkyô tô é târâ rahkat gi, shí dông nghut lhê; hkâ-nhám le kyaú a kê wú é htoq agó, haî le a râ é, a nghut jáng, ra a bo é no-pyá nê radu yu lé keq nghû Isira-elaq byu pé lé taí aq. 3Núngnhik gi, hkyangjong Ele-aza lé no-pyá haû byi keq; yhang gi, no-pyá haú lé xuq tô é wàp shinggan má she htoq ê mù, yhâng é myòq hí má haú lé sat pyám nhâng râ nghut lhê. 4Haú hkûn, hkyangjong Ele-aza gi, yhâng é lòqnyhuî èq haû sui ra-am lé jum yù mù, zùphpong zúm é hí shut nyhit dâm hpyûn gyun ra râ nghut lhê. 5Yhang wú tô é u má, no-pyá hau é sho-kuq, sho, sui, hkyi eq roq gùng gón lé, myi má nyhê hkyô pyám ra râ nghut lhê. 6Hkyangjong hpó gi, kyám gâm, husop eq nè noq nòq é saumaú pé lé yù mù, nyhê tô é no-pyá ahtoq má dú kat ra râ nghut lhê. 7Hau htâng, hkyangjong hpó gi, yhâng é mèbu pé lé chî pyám mù, yhâng é gùng lé le chi ra râ nghut lhê. Haú hkûn shèq, yhang, wàp má ge wang ló râ nghut lhê; nghut kôlhang, yhang gi, myínhtâng jé shoq htûngli dông a sanséng dùt byùq râ nghut lhê. 8Haú lé nyhé sû le, yhâng é mèbu pé lé chî pyám mù, yhâng é gùng chi ra râ nghut lhê; yhang le, myínhtâng jé shoq a sanséng dùt byùq râ nghut lhê.
9Sansêng é byù rayùq yùq gi, no-pyá hau é myiwap lé ê gòt tsîng yù mù, xuq tô é wàp shinggan mâ é htûngli dông haû sansêng é jowò má ê hut bum to ra râ nghut lhê. Haú lé, Isira-elaq byu pé mai, chî sansêng yu é wuì má chûng râ matú tô to ra râ nghut lhê. Htûngli haû gi, yubàk mara mai lhoqsan lhoqyúng yû râ matú nghut lhê. 10Haû no-pyâ é myiwap gòt tsîng yù sû le, yhâng é mèbu pé lé chî pyám ra râ nghut lhê; yhang le, myínhtâng jé shoq a sanséng dùt byùq râ nghut lhê. Shî gi, Isira-elaq byu pé eq yhángmòq chyáng bo nyi é gó-mîng byu pê é matú, ahtum abyùq hkyô tô é hkunmó dùt râ nghut lhê.
11Byù màng lé záng é sû gi, nyhit nyí yhang a sanséng dùt byùq râ nghut lhê. 12Haú yùq gi, sum nyí nyí eq nyhit nyí nyí má, wuì hau èq yhânggùng yhang lhoqsan lhoqyúng yû ra râ nghut lhê; haú hkûn, yhang sân-yúng râ nghut lhê. Nghut kôlhang, yhang gi, sum nyí nyí má le, nyhit nyí nyí má le, yhânggùng yhang a lhoq sân-yúng yu é nghut jáng, sân-yúng râ a nghut. 13Rayùq yùq gi, byù màng lé záng é htâng, yhânggùng yhang a lhoq sân-yúng yu é nghut jáng, haû Yhûmsîng Garaî é sàksé zúm lé agòt a-û kut bê nghut ri. Haû mù, yhang gi, Isira-elaq byu pé mai chyung hpyit pyâm é hui râ nghut lhê. Hkâsu mù gâ le, yhang gi, chî san chî sêng yu é wui èq hpyûn gyûn é a hui shî é yánmai, a sanséng nghut ri. Haû a sansêng é pé gi, yhâng é ahtoq má dàp nyi ashî nghut ri.
14Byù rayùq yùq zúm hkaû má shi byùq é hkûn cháng râ é târâ gi, shí dông nghut lhê; zúm haú má wang e é sû eq zúm hkaû má nyi tô é sû gi, nyhit nyí yhang a sanséng dùt byùq râ nghut mù, 15a-myhi a nghop tô é au hkoq zê bànshoq le a sanséng dùt byùq râ nghut lhê.
16Rayùq yùq pá pé má nyì ang mù, sham èq sat huî é sû lé záng é nghut nghut, yhangbaú baú shi é sû lé záng é nghut nghut, byu màng showui, a nghut jáng, byu é lùp lé záng é nghut nghut, yhang gi, nyhit nyí yhang a sanséng dùt byùq râ nghut lhê.
17Haú dông a sanséng su é matú gi, yubàk mara mai lhoqsan lhoqyúng yû râ matú nyhê hkyô é myiwap ra-am lé yambú má kat luî, hau ahtoq má yui nyi é wuì hkam kat râ nghut lhê. 18Haú hkûn, htûngli dông sansêng é sû gi, husop kyâng yù mù, wuì haú má jùm luî, zúm haú má le, chûngzè bànshoq má le, haú má nyi tô é byu pé lé le, hpyûn gyun ra râ nghut lhê. Hau htoq agó, yhang gi, byù màng showui záng sû, a nghut jáng, lùp má záng sû lé le, sat hui sû lé záng é sû lé le, yhangbaú baú shî sû lé záng é sû lé le, hpyûn gyun ra râ nghut lhê. 19Haú dông sanséng bê sû gi, sum nyí nyí eq nyhit nyí nyí má a sansêng é sû lé hpyûn gyun luî, nyhit nyí nyí má haú yùq lé lhoq sân-yúng yû ra râ nghut lhê. Haû lhoq sansêng é hui bê sû gi, yhâng é mèbu pé lé chî pyám luî, yhâng gùng lé le chi ra râ nghut lhê; yhang gi, myínhtâng jé jáng sanséng râ nghut lhê. 20Nghut kôlhang, a sanséng sû, yhânggùng yhang a lhoq sân-yúng yu é nghut jáng, yhang gi, shiwa byù hpúng mai chyung hpyit pyâm é hui râ nghut lhê; hkâsu mù gâ le, haû Yhûmsîng Garaî é sân-yúng jowò lé agòt a-û kut bê nghut ri. Haû lhoq sansêng yu é wuì gi, yhang lé a hpyûn gyun shî é nghut mù, yhang gi, a sanséng nghut ri. 21Haû gi, yhángmòq é matú ahtum abyùq hkyô tô é hkunmó nghut ri.
Haû lhoq sansêng yu é wuì lé hpyûn é sû le yhâng é mèbu pé lé chî pyám ra râ nghut lhê; haû lhoq sansêng yu é wuì lé záng é sû gi, myínhtâng jé shoq a sanséng dùt byùq râ nghut lhê. 22A sansêng é sû záng é zè haî le a sanséng dùt byùq mù, zè haú pé lé záng é sû gi, myínhtâng jé shoq a sanséng nghut ri.” ga taî ri.
© 2025, Wycliffe Bible Translators, Inc.