Gyung So 20
20
Lungmó Zîng Mai Htoq É Wuì
1Isira-elaq shiwa byù hpúng gón gi, sânghî lhôhkyap má, Zin Yòso má jé kôluî, Kadesha jowò má nyi tô akô. Haú má, Miri-am shi byùq luî, myhup yhûm pyám bekô nghut ri.
2Haú jowò má shiwa byù hpûng é matú wuì a wó lo dùt byùq mù, yhángmòq gi, Mosheq eq Arun nhiktâng lé htuqhtíng râ ga chôm zùp zîng akô nghut ri. 3Yhángmòq, Mosheq eq myíng myô lhum kô é gi, “Ngá-mòq gi, haû Yhûmsîng Garaî é hí má ngá-mòq é gu-mang wuì shi byùq é hkûn ru jâng shi byùq le lháng nghut bê wá! 4Haî mù luî, núngnhik gi, ngá-mòq eq ngá-mòq é shigu gaunyhaú pé shî má shi byùq râ matú, haû Yhûmsîng Garaî é byù ngá-mòq lé yòso shi má shuî lé akô lhú? 5Haî mù luî, ngá-mòq lé Egutuq ming mai shuî htoq lô mù, shî su gyùq chiq râ é jowò má shuî jé lhê lhú? Shi má, kyôshi myuishi le, hkohúm-shi le, tsibyiq wing le, lungshi le a jòq nghut é htoq agó, shuq wuî le a jòq nghut ri mhaî!” gâ akô nghut ri.
6Haû mù, Mosheq eq Arun nhiktâng gi, shiwa hpúng mai htoq ló luî, zùphpong zúm hkum má ê ngóm gòp tô akô nghut ri; haú hkûn, haû Yhûmsîng Garaî é hpungwup shingkang gi, yhángnhik chyáng lé htoq shit ri. 7Haû Yhûmsîng Garai gi, Mosheq lé, 8“Dumbáng lé yù mù, nungmang Arun eq rahá shiwa byu pé lé ló shuî tsîng yù keq. Haû mù, lungmó zîng haú lé yhángmòq é myòq hí má dang nyô aq; haú hkûn, lungmó zîng haû mai wuì bùq htoq lô râ nghut lhê. Nàng gi, shiwa byu pê é matú lungmó zîng haû mai ûchyam wó râ nghut mù, yhángmòq eq yhángmòq é shigu gaunyhaú pé gi, ûchyam myàng shuq kôrâ nghut lhê.” ga taî ri.
9Haû mù, Mosheq gi, haû Yhûmsîng Garai hkunmó hkyô é eq rajung za, Yhâng é hí mai dumbáng haú lé yù bê nghut ri. 10Mosheq eq yhang mang Arun gi, shiwa byu pé lé lungmó zîng hau é hí má ji tsîng tô ri; haû mù, Mosheq gi, yhángmòq lé, “Gumlau toq bang ê, gyô wú keq; ngá-nhik gi, lungmó zîng shî mai núngmòq é matú wuì lhoqhtoq byi ra râ lhú?” ga taî ri. 11Haû mù, Mosheq gi, yhâng é lòq tû luî, lungmó zîng haú lé yhâng é dumbáng èq í dâm bàt kat ri. Haú hkûn, wuì mó bùt shun htoq lo é nghut mù, shiwa byù hpúng eq yhángmòq é shigu gaunyhaú gi, ûchyam shuq bekô nghut ri.
12Nghut kôlhang, haû Yhûmsîng Garai gi, Mosheq eq Arun nhiktâng lé, “Núngnhik gi, Isira-elaq byu pê é hí má, Ngò chyoiyúng Sû nghut é lé hkúnggâ shit râ í a lùmjíng kó nghut é yánmai, shiwa byù hpúng lé Ngò byi tô é maumyî má, núngnhik gi, yhángmòq lé wó shuî jé râ a nghut.” ga taî ri.
13Haú má, Isira-elaq byu pé gi, haû Yhûmsîng Garai eq htuqhtîng lhum kôlhang, Yhang chyoiyúng é hkyô lé yhángmòq é hí má shit bê nghut é yánmai, wuì haú lé Meriba#20:13 Meriba gâ é gi, mabyòq htoq lhum, a nghut jáng, htuqhtîng lhum gâ é lichyúm nghut lhê. ga myhîng akô nghut ri.
Isira-elaq Byu Pé Lé Edom Byu Pé A Lhom Lhaî Kat É Hkyô
14Mosheq, Kadesha jowò mai Edom hkóhkam chyáng lagyô pé nhang kat luî, châng pying kat é gi,
“Náng é gu-mang Isira-elaq îsu ga taî ri; ngá-mòq chyáng jé é wuîhke jamjau hkyô bànshoq lé nàng sê lhê. 15Ngá-mòq é îchyí îwâ pé gi, Egutuq ming má gyó ê mù, haú má zànwut myo myo ê nyi nyi é nghut lhê. Haû Egutuq byu pé gi, ngá-mòq eq ngá-mòq é îchyí îwâ pé lé gyai zing-ri bekô nghut ri; 16nghut kôlhang, ngá-mòq gi, haû Yhûmsîng Garai lé wùt garû ngau é nghut mù, Yhang gi, ngá-mòq é wùt ngaù htê lé wó gyo byi luî, Yhâng é maumang lagyo lé nhang kat mù, ngá-mòq lé Egutuq ming mai shuî htoq lo é nghut lhê.
Ahkuî, ngá-mòq gi, náng é maukyo mâ é Kadesha wà shî má lo jé nyi tô lhê. 17Haû mù, ngá-mòq lé náng é mau mai lai nhâng àq. Ngá-mòq gi, náng é yò pé eq tsibyiq hkyâm mai a lai râ nghut é htoq agó, wuìhtúng mâ é wuì le shuq byi râ a nghut. Ngá-mòq gi, náng é mau mai wó laî byìt shoq lòqyò lòqpai shut a jau é za, hkóhkam é hkyô mó za cháng luî laî ló râ nghut lhê.” gâ ri.
18Nghut kôlhang, Edom gi,
“Nàng shî mai wó laî ló râ a nghut; laî ló é nghut jáng, ngá-mòq gi, yán htoq lô mù, núngmòq lé sham èq lhom htim râ nghut lhê.” ga tû taî ri.
19Haú hkûn, Isira-elaq byu pé gi,
“Ngá-mòq gi, hkyô mó mai za laî ló râ nghut lhê; ngá-mòq nghut nghut, ngá-mòq é shigu gaunyhaû pé nghut nghut, náng é wuì shuq é nghut jáng, hau é ahpau ngá-mòq byi râ nghut lhê. Ngá-mòq lé hkyô za sô laî ló nhâng àq.” ga tû taî akô nghut ri.
20Haû jáng, yhángmòq gi,
“Núngmòq ge laî ló râ a nghut.” ga dum tû taî akô nghut ri.
Hau htâng, Edom gi, yhángmòq lé htim râ matú, wum-o a-tsam mó bo é gyè hpúng mó eq htoq lé lo ri. 21Edom gi, yhángmòq lé yhâng é mau mai a lai nhâng kut é yánmai, Isira-elaq gi, yhang lé koi laî ló bê nghut ri.
Arun Shi Byùq É Hkyô
22Isira-elaq shiwa byù hpúng gón gi, Kadesha jowò mai htoq luî, Hora Bùm má jé akô nghut ri. 23Edom maukyo eq chyâng é Hora Bùm má, haû Yhûmsîng Garai gi, Mosheq eq Arun lé, 24“Arun gi, yhâng é îchyí îwâ pé nyi é má ló râ nghut lhê. Yhang gi, haû Isira-elaq byu pé lé Ngò byî é mau má wó wâng râ a nghut; haî mù gâ le, núngnhik í yùq é, Meriba wuì yàm má Ngá é hkunmó lé htuqhtíng kô é yánmai nghut ri. 25Arun eq yhâng é yùqzo Ele-aza lé wùt yù mù, Hora Bùm shut shuî dòq ló aq. 26Arun gi, yhâng é îchyí îwâ pé nyi é má ló râ nghut mù, haú má shî râ nghut é yánmai, yhâng é mèbu pé lé hkyut yû luî, yhâng é yùqzo Ele-aza lé hut byi aq.” ga taî ri.
27Mosheq gi, haû Yhûmsîng Garai hkyô é hkunmó eq rajung za kut é nghut mù, yhángmòq gi, shiwa byù hpúng gón é hí mai Hora Bùm shut dòq ló akô nghut ri. 28Mosheq gi, Arun é mèbu pé lé hkyut yû mù, yhâng é yùqzo Ele-aza lé hut byî ri. Haú hkûn, Arun gi, bum gùng haú má shi byùq bê nghut ri. Haû mù, Mosheq eq Ele-aza gi, bùm haú mai gyó ló kô é nghut mù, 29shiwa byù hpúng gón gi, Arun shi byùq bê hkyô lé wó sé kôjáng, Isira-elaq byù bànshoq bang gi, yhâng é yánmai sum xê nyí yhang iyon yon bekô nghut ri.
© 2025, Wycliffe Bible Translators, Inc.