Gyung So 17
17
Arun É Dumbáng Abu Nyún É Hkyô
1Haû Yhûmsîng Garai gi, Mosheq lé, 2“Haû Isira-elaq byu pé lé dang nyô mù, yhángmòq é îchyí îwâ pê é a-myû up má cháng luî, up hkangmó mâ é ushuq pê é dumbáng bànshoq raxe í hkat lé yù luî, ó le ô é myìng lé, ó le ô é dumbáng má kâ tap to keq. 3Lewiq up mâ é dumbáng má gi, Arun é myìng kâ tap keq. Hkâsu mù gâ le, îchyí îwâ pê é a-myû up ra-up é ushuq é matú dumbáng rahkat hkat nghut ra râ nghut lhê. 4Dumbáng haú pé lé, Ngò, núngmòq lé huî é jang nghut é zùphpong zúm mâ é dangshikaq târâ kat tô é sàksé dò hí má tô to keq. 5Haú hkûn, Ngò hkyin yù su é dumbáng gi, abu nyún râ nghut luî, Ngò gi, Isira-elaq byu pé mai nang lé xoq xoq pùt é dang taî gyûn nyi é lé no nhâng mù, Ngá é nohkyap má a jé nhâng lo râ nghut lhê.” ga taî ri.
6Haû mù, Mosheq gi, Isira-elaq byu pé lé dáng nyo é nghut mù, yhángmòq é ushuq pé gi, yhang lé, yhángmòq é îchyí îwâ pê é a-myû up hkangmó mâ é ushuq rayùq é matú dumbáng rahkat hkat kut luî, raxe í hkat byî akô nghut ri. Arun é dumbáng le haû raxe í hkat má bo ri. 7Mosheq gi, dumbáng haú pé lé, dangshikaq târâ jòq é zúm hkaû, Yhûmsîng Garaî é hí má tô tô ri.
8Htang nyí, Mosheq gi, sàksé zúm má wang e wú le, Lewiq up é gùnglik nghut sû Arun é dumbáng gi, a-nyùq nyún é za a nghut, abu le bu, abó le bó luî alamon shi zuî to láng é lé, ê myang ri. 9Haû mù, Mosheq gi, dumbáng haú pé bànshoq lé Yhûmsîng Garaî é hí mai yu htoq mù, Isira-elaq byù bànshoq bang lé tûn shit ri. Yhángmòq le, haú pé lé wú wú mù, ó le ô é dumbáng lé yu bum akô nghut ri.
10Haú hkûn, haû Yhûmsîng Garai gi, Mosheq lé, “Arun é dumbáng lé, haû gumlau toq bâng é matú masàt lhô dùt sháng gàq, dangshikaq târâ kat tô é sàksé dò hí má dum tô to aq. Haû gi, yhángmòq a shi byùq râ matú, yhángmòq Ngo lé pùt é dang taî nyi é lé lhoqzîm pyám râ nghut lhê.” ga taî ri. 11Mosheq gi, yhang lé haû Yhûmsîng Garai hkunmó hkyô é eq rajung za kut bê nghut ri.
12Isira-elaq byu pé gi, Mosheq lé, “Wú aq; ngá-mòq shî râ nghut bê! Ngá-mòq htûm ló nyi ri; ngá-mòq bànshoq bang htûm ló nyi ri! 13Haû Yhûmsîng Garaî é sàksé zúm má chyâng htèp ê sû lháng shî râ nghut lhê. Ngá-mòq bànshoq bang shi htûm byùq râ nghut lhê lhú?” ga taî akô nghut ri.
© 2025, Wycliffe Bible Translators, Inc.