Gyung So 16
16
Kora, Dahtan Eq Abiram
1Lewiq é shuké, Kohat é yhang shu, Izihara é yhang zo Kora gi, Rubin up mâ é Eli-ap é yhang zô nhiktâng Dahtan eq Abiram eq le, Pelet é yhang zo Ona eq le hpyê lhum mù, 2Mosheq lé toq htuqhtîng akô nghut ri. Yhángmòq eq rahá bo lom é bang gi, byìn hpyé wàp má bo é, xânghpoq nge wó é shiwa hpúng mâ é ushuq pé 250 yùq nghut ri. 3Yhángmòq gi, Mosheq eq Arun lé htuqhtíng râ matú rahpúng za kut lé lô kômù, yhángnhik lé, “Núngnhik gi, lûm laî byùq bekô nghut ri! Shiwa hpúng gón gi, chyoiyúng bum ri; haû Yhûmsîng Garai le, yhángmòq eq rahá nghut nyi ri. Haû sû é wá, núngnhik gi, haî mù, Yhûmsîng Garaî é shiwa hpúng htoq yhûmsing gùng yhûmsîng lhoqgyaú yu nyi akô lhú?” ga taî akô nghut ri.
4Mosheq gi, haú lé wó gyo jáng, lèq ngòp tô ri. 5Hau htâng, yhang gi, Kora eq yhâng htâng châng é bang bànshoq lé, “Haû Yhûmsîng Garai gi, Yhâng é byù ó nghut é lé le, ó yùq chyoiyúng é lé le, nàpkyó tûn shit râ nghut mù, haú yùq lé Yhâng chyáng huî htèp lé nhâng râ nghut lhê. Yhang hkyin yu é sû lé, Yhâng chyáng huî htèp lé nhâng râ nghut lhê. 6Nàng Kora eq náng htâng châng é bang bànshoq, shí dông kut keq; namngón shôm nyhê é myihkoq yù luî, 7nàpmá, gyúng nyi é myigye hkoq má kat mù, haû Yhûmsîng Garaî é hí má yu ê keq. Haû Yhûmsîng Garaî èq hkyin yu é hui sû gi, chyoiyúng sû nghut râ nghut lhê. Lewiq byu pé núngmòq gi, lûm laî byùq bekô nghut ri!” ga taî ri.
8Hau htoq agó, Mosheq gi, Kora lé le, “Lewiq byu pé ê, ahkuî gyo keq! 9Haû Isira-elaq é Garai Gasang gi, núngmòq lé gótû Isira-elaq byù hpúng mai gam htoq yû mù, haû Yhûmsîng Garaî é sàksé zúm má mú wùn wàq ra luî, shiwa hpúng é hí má bo yàp mù, yhángmòq é gùnglik dông nhông byi múzó kut râ matú, núngmòq lé Yhâng chyáng lhoqchyâng yù bê nghut le wá, ahko ahkáng haú lé a gé bun shi kó lhú? 10Yhang gi, nang lé le, náng é gu-mang gótû Lewiq byù bànshoq lé le, Yhâng chyáng shuî htèp yù bê nghut kôlhang, ahkuî, núngmòq gi, hkyangjong wò lé le ho nyi ashi kó myhî-nhung. 11Nàng eq náng htâng châng é bang bànshoq gi, haû Yhûmsîng Garai lé rahá chôm htuqhtîng akô nhung. Arun gi, hkâsû é byù wá nghut luî, núngmòq, yhang lé pùt é dang taí kôrâ lhú?” ga taî ri.
12Hau htâng, Mosheq gi, Eli-ap é yhang zô nhiktâng Dahtan eq Abiram lé ê wùt nhang ri. Nghut kôlhang, yhángnhik gi, “Ngá-nhik dòq lé râ a nghut. 13Nàng gi, ngá-mòq lé yòso shî má sat pyám râ matú, no-naú eq byo-î yui é mau mai shuî htoq lo é lháng a gé shi lhú? Ahkuî le, nàng gi, ngá-mòq é ahtoq má zau kut nau nyi ashî nhung lhî? 14Hau htoq agó, nàng gi, ngá-mòq lé, no-naú eq byo-î yui é mau má a shuî ló; yò pé eq tsibyiq hkyâm pé nghut é muìzè lé le a byi nghut ri. Nàng gi, byù shí bâng é myòqjí lé choq pyám byí#16:14 Myòqjí lé choq pyám byí gâ é gi, mhaú zo naù gâ é lichyúm nghut ri nau ri lhú? Ngá-nhik a dòq lé râ!” ga lhom tû taî akô nghut ri.
15Haú hkûn, Mosheq gi, nhikjum mó yo mù, haû Yhûmsîng Garai lé, “Byù shí bâng é hkungga lé hkâhàp yù byi. Ngò gi, yhángmòq chyáng mai loze radu le a yu wú é htoq agó, yhángmòq mâ é rayùq lé le a zing-rî wú é nghut lhê.” ga taî ri.
16Mosheq gi, Kora lé, “Nàng eq náng htâng châng é bang bànshoq gi, Arun eq rahá, nàpmá Yhûmsîng Garaî é hí má lé htoq shit ra râ nghut lhê. 17Yùq hkangmó gi, yhûmsing é myihkoq lé yù mù, namngón jung kat luî, namngón shôm nyhê é myihkoq bànshoq 250 hkyap lé Yhûmsîng Garaî é hí má yu lé ra râ nghut lhê. Nàng eq Arun le, yhûmsing é namngón shôm nyhê é myihkoq yu lé ra râ nghut lhê.” ga taî ri. 18Haû mù, yhángmòq yùq hkangmó gi, yhûmsing é myihkoq yù luî, gyúng é myigye kat mù, hau é ahtoq má namngón jung kat luî, Mosheq eq Arun nhiktâng le mù, haû zùphpong zúm hkum má yàp tô bum akô nghut ri. 19Kora gi, yhángnhik lé htim râ matú, zùphpong zúm hkum hí má yhâng htâng châng é bang bànshoq lé wùt tsîng tô é hkûn, haû Yhûmsîng Garaî é hpungwup shingkang gi, shiwa byù hpúng gón lé htoq shit ri. 20Haû Yhûmsîng Garai gi, Mosheq eq Arun lé, 21“Shiwa byù shí bang lé Ngò radá dâm sat pyám bá, núngnhik, yhángmòq chyáng mai gótû san kut gam hkoq nyî keq.” ga taî ri.
22Nghut kôlhang, Mosheq eq Arun gi, ngóm gòp luî, “Garai Gasang ê, kângsoq dui nyi é lhúnglháng lé soq kat byî é Garai Gasang ê, rayùq shut é mara mai za, shiwa byù hpúng gón shî lé nhikjum yo râ lhú?” ga wùt ngau akô nghut ri. 23Haú hkûn, haû Yhûmsîng Garai gi, Mosheq lé, 24“Haû shiwa byù hpúng lé, ‘Kora, Dahtan eq Abiram pê é zúm pé mai huî htòt keq.’ nghû taí aq.” ga taî ri.
25Haû mù, Mosheq gi, Dahtan eq Abiram chyáng e ri; Isira-elaq é sûwún wuî le, yhâng htâng châng e akô nghut ri. 26Yhang gi, shiwa byù hpúng lé, “Agè ashop é byù shí bâng é zúm pé mai huî htòt keq! Yhángmòq é yubàk mara bànshoq é yánmai, núngmòq shi htûm byùq âbe, yhángmòq eq sêng é zè haî lé le hkâzáng byi kó.” ga sidìq byî ri. 27Haû mù, yhángmòq gi, Kora, Dahtan eq Abiram pê é zúm pé mai huî htòt bekô nghut ri. Dahtan eq Abiram gi, yhángnhik é yhang myî nhik, yhángnhik é zoshâng wuì tiq é kô é eq rahá htoq lô kômù, yhángnhik é zúm hkum má yàp tô bum akô nghut ri.
28Haú hkûn, Mosheq gi, “Ngò kut é hkyô shí pé bànshoq lé ngá é myìt mai kut é a nghut é za, haû Yhûmsîng Garai nhâng luî kut é hkyô lé, núngmòq shí dông wó sé kôrâ nghut lhê. 29Ó le shi é dông za byù shí bang shi byùq é eq xângzo byù bànshoq bang hpuzô é dông za byù shí bang hpuzô é ru nghut le gi, ngo lé haû Yhûmsîng Garai nhang é a nghut. 30Nghut kôlhang, haû Yhûmsîng Garai gi, gótû hkyô asik kut htoq luî, myìdàm gi, yhâng é nhut hâ lò mù, yhángmòq lé le, yhángmòq eq sêng é jung hkangmó lé le, myui pyám luî, yhángmòq gi, duì gù mosumhkung má gyó wang ló é nghut jáng, núngmòq gi, byù shí bang haû Yhûmsîng Garai lé wú tiq he-ngìk pyám bê nghut é hkyô lé wó sé kôrâ nghut lhê.” ga taî ri.
31Haú pé bànshoq lé Mosheq ban taí eq yhang, yhángmòq nâng tô é myigùng gòq lò mù, 32myìdàm htoq gi, yhâng é nhut há luî, yhángmòq lé le, yhángmòq é yhûmbyù wuì lé le, Kora eq sêng é byù bànshoq eq haú bâng é sùtzè pé lé le, myui pyám bê nghut ri. 33Yhángmòq gi, yhángmòq sing é jung hkangmó eq rahá, duì gù mosumhkung má gyó wang ló bekô nghut ri. Myìdàm htoq gi, yhángmòq lé myhî lhûng pyám bê nghut mù, yhángmòq gi, shiwa byu pê chyáng mai htûm ló byùq bekô nghut ri. 34Yhángmòq wùt ngau é htê lé, yhángmòq é lhînghkyùq mâ é Isira-elaq byù bànshoq bang wó gyo kôjáng, “Myìdàm htoq gi, ngá-nhúng lé le myuì râ nghut ri.” ga wùt garû taí uchyang hpang akô nghut ri.
35Haú hkûn, myi gi, haû Yhûmsîng Garaî chyáng mai htoq lô mù, namngón jung nyhê nhong nyi é byù 250 yùq lé nyhê hkyô pyám bê nghut ri.
36Haû Yhûmsîng Garai gi, Mosheq lé, 37-38“Haû namngón shôm nyhê é myihkoq pé gi, chyoiyúng lhê nghut é yánmai, myi duq nyi é jang mai namngón shôm nyhê é myihkoq haú pé lé gùq yù mù, haú mâ é myigye lé wê é shut hut tâng pyám luî, yhûmsing é chyungxe sum shoq mara kut shut bâng é myihkoq haú pé lé, hkungga gyàp má nghop râ gyi long pé bàt htoq yû râ matú, hkyangjong Arun é yhang zo Ele-aza lé taí aq. Hkâsu mù gâ le, myihkoq haú pé lé gi, haû Yhûmsîng Garaî é hí má nhông bê nghut mù, chyoiyúng byùq bê nghut ri. Haú pé gi, Isira-elaq byu pê chyáng masàt lhô dùt nyì sháng gàq.” ga taî ri.
39Haû mù, hkyangjong Ele-aza gi, myi nyé shi byùq é bang byî to hkô é namngón shôm nyhê é gyi myihkoq pé lé yù mù, hkungga gyàp lé nghop râ along bàt htoq bê nghut ri. 40Yhang gi, haû Yhûmsîng Garai mai Mosheq dông yhang lé shit kyô tô é eq rajung za kut é nghut ri. Haû gi, Arun é awùt ashín mai lai luî, ó yùq le, Yhûmsîng Garaî é hí má namngón jung a wó lé nyhê é hkyô lé le, lé jáng, Kora eq yhâng htâng cháng bang su dùt byùq râ hkyô lé le, Isira-elaq byu pé lé lhoqpûn é nghut ri.
41Htang nyí, Isira-elaq shiwa byù hpúng gón gi, Mosheq eq Arun lé, “Núngnhik gi, haû Yhûmsîng Garaî é byu pé lé sat pyám bekô nghut ri.” ga mara hun é pùt é dang taî akô nghut ri.
42Nghut kôlhang, haû shiwa byù hpúng mai Mosheq eq Arun lé chôm htuqhtîng nyi bùm kô é hkûn, yhángnhik, zùphpong zúm shut lhing wú kat kô le, dàn lòq tung zúm haú má mhut htup luî, haû Yhûmsîng Garaî é hpungwup shingkang htoq shit ri. 43Haû mù, Mosheq eq Arun gi, zùphpong zúm hí má ê jáng, 44haû Yhûmsîng Garai gi, Mosheq lé, 45“Byù hpúng shí bang lé, Ngò radá dâm sat pyám bá, yhángmòq chyáng mai hui keq.” ga taî ri. Haú hkûn, yhángnhik tâng gi, ngóm gòp bekô nghut ri.
46Hau htâng, Mosheq gi, Arun lé, “Náng é myihkoq lé yù mù, hkungga gyàp mâ é gyúng é myigye kat yû luî, hau é ahtoq má namngón jung kat mù, shiwa byù hpúng shut hân din ê luî, yhángmòq é matú mara hkô htaí hkungga ê nhông byi aq. Haû Yhûmsîng Garaî chyáng mai nhikmó-yo hkyô htoq lô bê nghut ri; wúm ihkyùp jé bê nghut ri.” ga taî ri. 47Haû mù, Arun gi, Mosheq taî é eq rajung za, shiwa byù hpúng hkaû shut din wang ê bê nghut ri. Shiwa byu pê chyáng wúm ihkyùp gi, hi ló bê nghut kôlhang, Arun gi, namngón jung chûng luî, yhángmòq é matú mara hkô htaí hkungga nhông byi bê nghut ri. 48Yhang gi, shi byùq bê bang eq chyungxe dui nyì bâng é gyoro má yàp tô é nghut mù, wúm ihkyùp gi, nô byùq bê nghut ri. 49Nghut kôlhang, Kora é yánmai shi byùq é bang mai lai luî, wúm ihkyùp haú mai byù 14700 yùq shi byùq bê nghut ri. 50Wúm ihkyùp haû nô byùq bê nghut luî, Arun gi, zùphpong zúm hkum má nyi tô é Mosheq chyáng taû ló bê nghut ri.
© 2025, Wycliffe Bible Translators, Inc.