Hebre 12

Garai Gasang, Zo Wuî Lé Mhoqshit É Hkyô

1Haû mù luî, ngá-nhúng gi, haû myhô é sàksé pé mhutdûm su ngá-nhûng é lhînghkyùq má jòq to bê nghut é yánmai, ngá-nhúng lé hkûm tang é hkyô pé jung hkangmó eq, luì za lhoqnhúng byî é yubàk mara lé dú pyám mù, ngá-nhúng dìn râ matú tô tô é hkyô lé, hkam jan luî din e ló sháng. 2Ngá-nhúng gi, ngá-nhûng é lùmjíng hkyo é a-pûn awang lé hî sû eq lhoq gúmjùp byi sû nghut é Yesuq lé wú tsuq nyî sháng. Yhang gi, Yhâng é hí má jòq tô é gabú hkyo é yánmai, hoq hpû é hkyô lé haî su a ngam é za, tapzîng má shî hkâm é hkyô lé jân pyám luî, Garai Gasâng é hkóhkâm tángmyhang é lòqyo hkyam shut zung to bê nghut ri. 3Núngmòq gi, a ngú byùq râ eq myìt wum a gyuî byùq kó sháng gàq, yubàk dàp bâng chyáng mai haû su htuqhtîng é hkyô lé jân pyâm é Yesuq chyáng mai myìt wum yù keq.

4Núngmòq gi, yubàk mara lé htuqhtîng shi-kùt é hkyô má, núngmòq é sui shun pyám shoq yhang a kut shi kó nghut ri. 5Hau htoq agó, núngmòq gi, zo wuî lé dông Garai Gasang núngmòq lé wum byî é dang lé tô-myhî pyám bekô lhú? Wum byi dang haû gi,

“Ngá zo ê, Yhûmsîng mhoqshit é hkyô lé agya alhâ hkâkut pyám,

Yhang, nang lé tân é hkûn, myìt wum hkâgyui,

6haî mù gâ le, haû Yhûmsîng gi, Yhang chyitdàp é bang lé mhoqshit mù, zo rayùq lé dông,

Yhang hàp yu é bang yùq hkangmó lé dam byî é nghut lhê.”#Sânghkyang 3:11-12

gâ é nghut ri.

7Mhoqshit huî é hkyô má, wuîhkê é lé hkam jan keq. Garai Gasang gi, núngmòq lé, zo wuî lé dông kut é ru nghut lhê. Hkâsu mù gâ le, yhûmsing é yhâng wâ èq a mhoq é zo gi, ó wá nyi lhê lhú? 8Núngmòq gi, yùq hkangmó huî laî é mhoqshit hkyô lé, a hui kô é nghut jáng, dèzô pé dông nghut byùq mù, zo sîng wuì a nghut lo kó. 9Ngá-nhúng bànshoq bang gi, ngá-nhúng lé mhoqshit é xângzo îwâ pé wó é bang chyat nghut mù, yhángmòq lé hkúnggâ é nghut lhê. Haû nghut jáng, je riyhang, ngá-nhûng é sô eq sêng é Îwâ é a‑ô má nyì mù, chyungxe duì râ dùt ri myhî-nhung! 10Ngá-nhûng é xângzo îwâ pé gi, yhángmòq je ge dik bûn é lé, ngá-nhúng lé rayòq zo mhoqshit ri. Nghut kôlhang, Garai Gasang gi, Yhâng é chyoiyúng hkyô má ngá-nhúng wó bo lòm shoq, ngá-nhûng é gè hkyo é matú, ngá-nhúng lé mhoqshit ri. 11Mhoqshit é hkyô hkangmó gi, mhoqshit u lé ngón hkyô a nghut é za, nò hkâm hkyô nghut nyi ri. Nghut kôle, mhoqshit hkyô haû lé hkam yù bê bâng é matú gi, htâng má, nguì ngón hkyô eq díngmán hkyo é ashi lhoqhtoq byî ri.

12Haû mù luî, myûng byùq é núngmòq é lòq pé eq wum nyhôm byùq é núngmòq é hkyîhput pé lé wum-o lhoqkíng keq. 13Hkyî hten bang a wó sô é a dùt shoq, lhoqgê byî é wó hui kó sháng gàq, núngmòq so râ matú, hkyô lhoqnyhang nyì keq.

Garai Lé He-ngìk Bang Dàm Byi Hui Râ Hkyô

14Byù bànshoq bang eq nguì ngón shoq nyì râ eq chyoiyúng râ matú wó dùt é í shi-kùt keq. Hkâsu mù gâ le, ó yùq le, chyoiyúng hkyô a bo é gi, haû Yhûmsîng lé myàng râ a nghut. 15Ó yùq le, Garai Gasâng jeju lé a tô pyám râ matú, sidìq keq. Haû, yùq htoq lô mù, wuîhke hkyô lhoqhtoq é eq byù myo myo lé agòt a‑û dùt nhang é nuì hko su, ó yùq lé le hkâdùt nhâng kó. 16Ó yùq le, ashop é dông gùngsho zùm yàp é hkyô nghut nghut, zang radún é matú, yhang wó tô é yùqzo zo-mún muìzè ahko ahkáng lé ung zô pyâm é, Garai a lom é Eso su nghut nghut, a kut râ matú sidìq keq. 17Núngmòq sê é eq rajung za, Eso gi, htâng má, shimân jeju haû lé hkam yù nau é hkûn, he-ngìk pyâm é hui bê. Yhang gi, shimân jeju haû lé ngaùbyi ngaùnhap èq hô kôlhang, yhang kut é hkyô lé a wó htaí byi lo nghut ri.

18Núngmòq gi, wó záng é eq myi duq nyi é Sinaq bùm má le, mauchut tuq é, nòqsingkyî dùt é eq laìdun lo é má le, 19tut htê mying é eq dang taí htê mying é má le, a jé ê kó nghut ri. Dang htê haû lé wó gyô é bang gi, yhángmòq lé, dang a taî jàt lo râ matú dûng tôngbán akô nghut ri. 20Haî mù gâ le, yhángmòq gi, “Bùm haû má gaunyhaû pé záng jáng lháng, lùqgòk èq dú sat râ dùt lhê.”#Htoq Ló 19:12-13 ga Garai Gasang hkyô tô é hkunmó lé a wó hkâm kô é yánmai nghut ri. 21Haû byu-myàng hkyô gi, lûm wú gyùq hpo dùt é yánmai, Mosheq lháng gi, “Ngò, gyùq nán ri.”#Târâ Pun 9:19 ga taî é nghut lhê.

22Nghut kôlhang, núngmòq gi, Zi-un bùm eq rû dui nyi é Garai Gasâng é wà mó nghut é mauhkûng Yerusalem má, maumang lagyô pé ajùm ayò gabú ratung zùp zîng é jang eq, 23mauhkûng htoq má myìng kâ to huî é, zo-mún pê é noqkuq hpúng jòq jang má, jé lé bekô nghut ri. Haû mù, núngmòq gi, byù bànshoq é târâ agyì nghut sû Garai Gasâng chyáng le, lhoq gúmjùp huî é díngmán bâng é sô pê chyáng le, 24dangshikaq asik é gyoro so sû Yesuq chyáng le, Abelaq é sui htoq má je ge é danglù taî é, hpyûn gyûn é sui má le, jé lé é nghut bekô.#12:24 Abelaq lé gi, yhang mang Ka-in èq sat é nghut luî, yhâng é sui gi, lató hpuq râ matú nghut ri; nghut kôlhang, Hkrisidùq é sui kúm gi, hkyi yù hkyô lajang byî ri.

25Núngmòq gi, dang nyô Sû lé a gyo a kut râ matú, sidìq keq. Myìdàm htoq má sidìq byî é sû lé he-ngìk pyâm é bang, a lùt kô é nghut lhê. Haû mù, mauhkûng mai ngá-nhúng lé sidìq byî é Su chyáng mai, ngá-nhúng lhing ló byùq é ru nghut le gi, je riyhang ngá-nhúng a wó lùt râ a nghut kó lhí? 26Haû Garaî dang taî é u má, Yhâng é htê gi, mingkan lé lhoqnhûn kat ri, ahkuî kúm gi, “Ngò, mingkan lé za a nghut, mauhkûng pé lé le radàm dum lhoqnhún râ nghut lhê.”#Hag 2:6 ga Yhang danghtum htûm to bê nghut ri. 27“Radàm dum” gâ é dang gi, haû a wó lhoqnhûn é pé wó myìt to sháng gàq ga, hpan to huî é zè pé nghut é, wó lhoqnhûn é pé lé huî sêng pyám râ lé gâ é nghut lhê.

28Haû mù luî, ngá-nhúng gi, a wó lhoqnhûn é mîngdán lé hàp yu to bê nghut mù, jeju bun luî, hpautap é eq gyùq hkúnggâ é myìt mai Garai Gasang hàp yù gíng é dông noqkuq sháng. 29Hkâsu mù gâ le, ngá-nhûng é “Garai Gasang gi, nyé jôm é myi nghut ri.”.#Târâ Pun 4:24

Currently Selected:

Hebre 12: znot

Highlight

Copy

Compare