Hebre 13

Ló Htáng Má Lhoqpûn Kyîng É Hkyô

1Rayùq eq rayùq, gu-mang yhangchang dông chyitdàp lhûm nyì keq. 2Byù bíng pé lé hkûlûm râ hkâ tô-myhí kó; hkâsu mù gâ le, ra-am gi, haû su kut nyî kô é yánmai, a sê é za maumang lagyô pé lé hkûlum záng bekô nghut ri. 3Núngmòq gi, htóng lúng bang eq rahá htóng lúng luzúm wuî dông, htóng lúng bang lé le, núngmòq yhang jamjau hui zô nyi é dông, hpuzô é bang lé le, myìtbun keq.

4Myiháng hkyô gi, lhúnglhâng bâng èq hpautap é hui râ dùt é nghut mù, myiháng yhuphpú gi, sân-yúng râ dùt lhê. Hkâsu mù gâ le, Garai Gasang gi, su-myi sulàng lú é bang eq ashop é dông gùngsho zùm yàp é bang bànshoq lé jéyáng râ nghut lhê. 5Núngmòq é chyungxe duì hkyô má, ngùn lé chyitdàp é myìt tô pyám mù, núngmòq wó é lé nhik dìk nyì keq, haî mù gâ le, Garai Gasang gi,

“Hkâ-nhám le, Ngò, nàng eq a gang râ; hkâ-nhám le, Ngò, nang lé a tô pyám râ.”#Târâ Pun 31:6

ga taî é nghut lhê. 6Haû mù, ngá-nhúng gi, hkyak lum é myìt mai,

“Haû Yhûmsîng gi, ngo lé garúm sû nghut lhê yánmai, ngò, gyùq râ a nghut. Ó yùq wá, ngo lé haî wó kut râ lhú?”#Hkya-on 118:6-7

nghû taî é nghut lhê.

7Núngmòq lé Garai Gasâng é mungdang taî kyô é, núngmòq é hkyô-u shê bang lé, myìtbun keq. Yhángmòq chyungxe htum shoq nyi laî lo é sâmlai lé myìt wú mù, yhángmòq é lùmjíng myìt lé alìk kut yù keq. 8Yesuq Hkrisidùq gi, anyí-nap, hkû-nyí, htângnùng pyàt dedu rajung za nghut nyi ri.

9Maú nhô zâ é mhoqshit hkyô ajung jûng èq shuî nghoq ló huî é bang hkâdùt kó. Zo bang lé hai a-kyû a byî é, htûngli zoshuq èq a nghut é za, Garaî jejû èq ngá-nhûng é myìt nhiklhum lé wum-o lhoqkîng yu é gi, gè hkyô nghut lhê. 10Ngá-nhúng gi, sàksé zúm má dójaú é hkyangjông pé zo râ ahkáng a wó é hkungga gyàp ralhum wó é nghut lhê.

11Haû hkyangjong mó gi, gaunyhaû pê é sui lé, mara hkyut hkungga dông Chyoiyúng Htâng é Jowò má yu wang ri; nghut kôlhang, gùngsho pé lé gi, byù nyì jowò shinggan má nyhê hkyô pyâm ri. 12Haû eq rajung za, Yesuq le, Yhâng é sui dông mai byu pé lé wó lhoq chyoiyúng râ matú, wà mó hkum shinggan má jamjau hpuzo mù shî hkám bê nghut ri. 13Haû mù luî, ngá-nhúng gi, byù nyì jowò shinggan má Yhâng chyáng ê mù, Yhang hui zô é rhoî hkyô lé ê bo hui zo sháng. 14Hkâsu mù gâ le, ngá-nhúng gi, mingkan shî má ru gîng nyi é wà mó wó bang a nghut é za, jé lé lô râ wà mó lé ho nyi é bang ru nghut lhê.

15Haû mù luî, ngá-nhúng gi, Garai Gasâng é myìng lé yín yu é nhutwuî ashi nghut é, hkya-on hkungga lé, Yesuq dông mai, Garai Gasâng chyáng xoq xoq nhông byî nyì sháng. 16Ge é hkyô kut râ eq góbang lé shuî gam chûng râ hkyô lé, hkâ tô-myhí kó; hkâsu mù gâ le, Garai Gasang gi, haû sû é hkungga pé lé ô ngui nyi ri.

17Núngmòq é hkyô-u shê bâng é jì-no gyo mù, yhángmòq é ahko ahkáng ô má nyì keq. Yhángmòq gi, jihpán shit râ dùt é bang dông mai núngmòq lé ùpzúng nyi é nghut lhê. Yhángmòq é múzó pé gi, núngmòq é matú a-kyû a bo é wòlai a dùt é za, gabú hkyô ralhum wó dùt sháng gàq, yhángmòq é jì-no gyô nyì keq.

18Ngá-mòq é matú kyûdung byi kó làq. Ngá-mòq gi, sân-yúng é myìt sôn sê é hkyô wó mù, hkyô hkangmó má ge é dông chyungxe duì râ lé ô nau lhê nghû, hkyak wó myìt ri. 19Ngò gi, núngmòq chyáng hân za wó dum jé sháng gàq, hau é matú je riyhang kyûdung byi keq nghû wum taî tsuq kat lhê.

20Sau hpúng pê é sau zúng Sû mó nghut é, ngá-nhûng é Yhûmsîng Yesuq lé, haû ahtum abyùq é dangshikaq é sui dông, shî bê mai dum lhoqdui toq é sû, nguì ngón hkyo é Garai Gasang gi, 21Yhang ô nau é hkyô kut râ matú ge é hkyô jung hkangmó núngmòq lé lhoq gúmjùp byi mù, Yesuq Hkrisidùq dông mai Yhang lé gabú nhang é hkyô lé, ngá-nhûng chyáng kut nyî sháng gàq. Hpungwup shingkang gi, Yesuq Hkrisidùq chyáng pyàt dedu ahtum abyùq ru joq nyî sháng gàq. Amen.

22Gu-mang wuì ê, ngò lhoqpûn kyîng é dang lé núngmòq wó hkam jan kó sháng gàq nghû, wum taî tsuq kat lhê; hkâsu mù gâ le, ngò gi, núngmòq lé, laiká ratot za kâ kat é nghut lhê.

23Ngò gi, ngá-nhûng é gu-mang Timohti lhoqlhut kat é hui bê hkyô lé, núngmòq lé sé nhâng nau ri. Yhang shî má myàp jé lé é nghut le gi, ngò, yhang eq rahá núngmòq lé, lé hui râ nghut lhê.

24Núngmòq lé shuî-u bang bànshoq eq Garai Gasâng é byu pé bànshoq lé bo shi-kyám byi keq. Itali ming mâ é gu-mang wuì gi, núngmòq lé shi-kyâm kat akô nghut ri.

25Jeju gi, núngmòq bànshoq bâng chyáng ru joq nyî sháng gàq ô.

Currently Selected:

Hebre 13: znot

Highlight

Copy

Compare