A-pûn Awang 30

1Rahkela gi, Yakup é matú, yhang zodù a dàp byi bûn é yánmai, yhâng nhá lé manôn bê nghut ri. Haû mù, yhang gi, Yakup lé, “Ngo lé zoshâng byi aq; haû a nghut jáng, ngò shi byùq râ nghut lhê!” ga taî ri.

2Yakup gi, yhang lé nhikjum gyô yo mù, “Ngò gi, nang lé zo a wó nhâng kut sû Garai Gasâng é jowò má nyì sû nghut lhê lhú?” ga taî ri.

3Haú hkûn, Rahkela gi, “Ngá é duìnhâng zoshâng Bila nyi lhê mhaî. Yhang gi, ngá é matú zoshâng wó hkû byi mù, ngò le, yhang dông mai i-kun ralhum wó xuq sháng gàq, yhâng chyáng wang yhup àq.” ga taî ri.

4Haû mù, yhang gi, yhâng é duìnhâng zoshâng Bila lé, yhûmsîng myhí kut râ dông Yakup lé byi bê nghut ri. Yakup gi, Bila eq yhup bê nghut luî, 5Bila gi, zogûng wùn mù, yhang lé yùqzo rayùq hkû byi bê nghut ri. 6Haú hkûn, Rahkela gi, “Garai Gasang gi, ngò jô nyì têng nyi é hkyô lé shit bê nghut ri; Yhang gi, ngò wùt dûng é dang lé gyo byi bê nghut luî, ngo lé yùqzo rayùq byi bê nghut ri.” ga taî ri. Haû nghut é yánmai, yhang gi, yùqzo haú lé Dan#30:6 Dan gâ é gi, jô nyì têng nyì hkyô shit gâ é lichyúm nghut lhê. ga myìng myhíng byî ri.

7Rahkela é duìnhâng zoshâng Bila gi, zogûng dum wùn mù, Yakup lé yùqzo lanóng hkû byi bê nghut ri. 8Haú hkûn, Rahkela gi, “Ngò gi, ngá nhá eq gyai yhang htuqhtîng shi-kùt wuîhkê lhûm yù luî, ngò ûng bê nghut ri.” ga taî ri. Haû mù, yhang gi, yùqzo haú lé Naphtali#30:8 Naphtali gâ é gi, htuqhtíng shi-kùt wuîhkê nyì gâ é lichyúm nghut ri. ga myìng myhíng byî ri. 9Le-a gi, yhang, zo a hkû lo dùt byùq é nghut mù, yhâng é duìnhâng zoshâng Zilihpa lé, yhûmsîng myhí kut râ dông Yakup lé byî ri. 10Le-a é duìnhâng zoshâng Zilihpa gi, Yakup lé yùqzo rayùq hkû byî ri. 11Haú hkûn, Le-a gi, “Hpuwáng gê mó yhang nghut bê!” ga taî ri; haû mù, yhang gi, yùqzo haú lé Gat#30:11 Gat gâ é gi, hpuwáng gê mó gâ é lichyúm nghut lhê. ga myìng myhíng byî ri. 12Le-a é duìnhâng zoshâng Zilihpa gi, Yakup lé yùqzo lanóng dum hkû byî ri. 13Haú hkûn, Le-a gi, “Ngò gi, gabú dik sû nghut bê ô! Haû myiwe wuì gi, ngo lé, gabú sû ga bekó râ nghut lhê.” ga taî ri. Haû mù, yhang gi, yùqzo haú lé Asheri#30:13 Asheri gâ é gi, gabú gâ é lichyúm nghut ri. ga myìng myhíng byî ri.

14Súngsô yam nám lé, Rubin gi, yòso shut htoq e é nghut mù, zo wó chi gâm ê myâng luî, yhâng nu Le-a lé yu lò byî ri. Haû mù, Rahkela gi, Le-a lé, “Jeju mai, ngo lé, nungzô é zo wó chi gâm ra-tsuí byi aq mhaî.” ga taî ri.

15Nghut kôlhang, Le-a gi, yhang lé, “Nàng, ngá é yhûmsîng hpó lé yu pyám byî é, a gé shi lhí? Ngá zô é zo wó chi gâm lé le, nàng yu shirâ lhí?” ga tû taî ri.

Rahkela gi, “Haû jáng ge ri; nungzô é zo wó chî gam é matú, nàng, yhang eq hkû-myîn yhup àq.” ga taî ri.

16Haû mù, haú myínhtâng Yakup yò mai lo é hkûn, Le-a gi, htoq ê mù, yhang lé ê hui luî, “Nàng, ngò eq yhup râ dùt lhê; ngò gi, ngá zô é zo wó chî gam èq nang lé nghô to bê nghut lhê.” ga taî ri. Haû mù, Yakup gi, haú myîn, yhang eq yhup bê nghut ri.

17Garai Gasang gi, Le-a lé wó gyo byi bê nghut mù, Le-a gi, zogûng wùn luî, Yakup lé yùqzo latáng hkû byi bê nghut ri. 18Haú hkûn, Le-a gi, “Ngò, ngá é yhûmsîng hpó lé, ngá é duìnhâng zoshâng myhí byî é yánmai, Garai Gasang gi, ngo lé ahpau byi bê nghut ri.” ga taî ri. Haû mù, yhang gi, yùqzo haú lé Yisahka ga myìng myhíng byî ri.

19Le-a gi, zogûng dum wùn mù, Yakup lé yùqzo layóng hkû byi bê nghut ri. 20Haú hkûn, yhang gi, “Garai Gasang gi, ngo lé, hpautap gù bo é chyûnghuq byi bê nghut ri. Ngò gi, ngá é yhûmsîng hpó lé yùqzo hkyuq yùq hkû byi bê nghut é yánmai, shí dâm gi, yhang, ngo lé rago hkúngga hpautap berâ nghut lhê.” ga taî ri. Haû mù, yhang gi, yùqzo haú lé Zebulun#30:20 Zebulun gâ é gi, hkúngga hpautap gâ é lichyúm htoq lhê. ga myìng myhíng byî ri.

21Hau htâng a myáng má, Le-a gi, byìzo rayùq hkû mù, byìzo haú lé Dina ga myìng myhíng byî ri.

22Haú hkûn, Garai Gasang gi, Rahkela lé myìtbun luî, yhâng é dang lé wó gyo byi mù, zo wó hkyô htong byi bê nghut ri. 23Rahkela gi, zogûng wùn mù, yùqzo rayùq hkû luî, “Garai Gasang gi, ngá é hoq hpu hkyô lé yu pyám byi bê nghut ri.” ga taî ri. 24Yhang gi, yùqzo hau lé Yosep#30:24 Yosep gâ é gi, Yhang jàt byi shi sháng gàq gâ é lichyúm nghut lhê. ga myìng myhíng byi luî, “Haû Yhûmsîng Garai gi, ngo lé yùqzo gótû rayùq jàt byi shi sháng gàq.” ga taî ri.

Yakup É Sau Hpúng Myô Lo É Hkyô

25Rahkela, Yosep lé hku é htâng, Yakup gi, Laban lé, “Ngo, ngá é yhummau má wó dum taû ló ra matú, ngo lé nhang kat àq hkoi. 26Ngò gi, yhángmòq é matú nang lé dójaú bê nghut é yánmai, ngá é yhûmsîng myhî pé eq zoshâng wuì, ngo lé byi mù, nhang kat àq. Nang lé, ngò, mú hkâ-myhó zui byi bê hkyô lé nàng sê lhê.” ga taî ri.

27Nghut kôlhang, Laban gi, yhang lé, “Ngò, náng é hí má myòqdong jòq é nghut jáng, nyi to shi keq. Haû Yhûmsîng Garai gi, náng é yánmai, ngo lé shimân byi bê nghut é hkyô lé, ngò bùt hpyit wú mù, wó sê yu ri.” ga taî ri. 28Hau htoq agó, yhang gi, “Náng é zui hpau lé sôn kyô wú aq; ngò, nang lé byi râ nghut lhê.” ga xoq taî ri.

29Haú hkûn, Yakup gi, yhang lé, “Nang lé ngò hkâsu kut mú zui byî é hkyô lé le, náng é shigu gaunyhaú pé, ngá é lòq má hkâsu kut myô jàt lo é hkyô lé le, nàng sê lhê. 30Ngò a jé shî é hkûn, náng é sùtzè ra-tsuí za nghut kôle, ahkuî gi, gyai myô jàt bê nghut ri; ngò jé é jowò hkangmó má, haû Yhûmsîng Garai gi, nang lé shimân byi bê nghut ri. Nghut kôlhang, ahkuî, ngò gi, hkâ-nhám shèq ngá é yhûmbyù wui é matú, shi-kùt râ lhú?” ga taî ri.

31Laban gi, “Nang lé ngò haî byi râ lhú?” ga myî ri.

Yakup gi, “Nàng, ngo lé haî byi nó a ra; nghut kôlhang, nàng, ngo lé shí hkyô kut byi râ nghut jáng, ngò gi, náng é sau bainám hpúng pé lé xoq luî zúng shirâ nghut lhê. 32Ngò gi, hkû-nyí yhang, náng é sau bainám hpúng pé bànshoq má ê mù, a-ká a-kóng dùt é eq abòq bòq dùt é sau lé le, chik chik nòq é sau zô pé lé le, a-ká a-kóng dùt é eq abòq bòq dùt é bainám pé lé le, ê hkyin htoq to bá. Haú pé gi, ngá é zui hpau nghut râ nghut lhê. 33Haû nghut jáng, nàng, ngo lé byî é zui hpau lé, htângnùng má nàng lé wú hkangmó, ngò jujúm tengmán é hkyô lé, haú má myàng râ nghut lhê. Ngò sing é bainám pé má, a-ká a-kóng a dùt é eq abòq bòq a dùt é bainám bo to, haû a nghut jáng, chik chik le a nòq é sau zô pé bo to dùt é nghut jáng, haû gi, hkaû yu é dùt râ nghut lhê.” ga tû taî ri.

34Haú hkûn, Laban gi, “Myìt huî lhê; nàng taî é eq rajung za nghut sháng gàq.” ga taî ri. 35Nghut kôlhang, haú nyí má yhang, Laban gi, a-ká a-kóng dùt é eq abòq bòq dùt é bainám lo bainám zîng bànshoq lé le, hpyu kâ é bànshoq lé le, chik chik nòq é sau zô pé bànshoq lé le, tsing hkyin htoq yû mù, yhang zô pé lé zúng nhang ri. 36Hau htâng, yhang gi, yhang eq Yakup é gyoro má, sum nyí so hkyôwuì hé wê gang nhang tô ri; Yakup kúm gi, Laban é myìt gyó tô é sau bainám hpúng pé lé xoq zúng nyi ri.

37Yakup kúm gi, nú é sikxû gàm akoq, alamon gàm akoq eq luza gàm akoq pé lé zân yù mù, nyui é akuq tsing hkyut pyám luî, hpyu é awui yu ri. 38Haû mù, yhang gi, akuq hkyut yû bê akoq awui haú lé, sau bainám hpúng pé wuì lé shuq é hkûn, yhángmòq é hí má yhang wó dùt sháng gàq ga, wuì lànghkang má tsing kat tô ri. Haû sau bainám hpúng pé gi, ache cháng nau é u, wuì shuq râ matú lé kô é hkûn, 39akoq wui haú pê é hí má ache lé châng akô nghut ri. Haû mù, yhángmòq gi, a-ká a-kóng dùt é eq abòq bòq dùt é azo shuî bum akô nghut ri. 40Yakup gi, sau bainám zo haú pé lé, yhâng é matú gótû kut nyhi to mù, haû myìt tô é Laban eq sêng é sau bainám hpúng lé gi, a-ká a-kóng dùt é eq chik chik nòq é sau bainám hpúng pé shut hû nhang ri. Haú dông, yhang gi, yhâng é sau bainám hpúng pé lé, Laban é sau bainám hpúng pé eq a hûm nyhi tô é za, gótû kut nyhi tô ri. 41Wúm bo é azìng pé ache cháng nau lo bùm hkangmó, Yakup gi, akoq wui hau é a-nàm má ache cháng kó sháng gàq ga, sau bainám haú bâng é hí mâ é lànghkang má, akoq haú pé lé lhaq kat byi byi kut ri. 42Nghut kôlhang, sau bainám pé wum nyhôm bùm jáng gi, haû lé a kat byi nghut ri. Haû mù, wum nyhôm é bang gi, Laban chyáng ló bûm, wúm bo é bang gi, Yakup chyáng ló bum dùt bê nghut ri. 43Haú dông mai, Yakup é sùtzè gi, gyai yhang myô lò jàt lò mù, sau bainám hpúng mó pé, duìnhâng zoshâng myiwe yùqgè wuì, gola-uk pé eq loze pé myoluq jebe lò bê nghut ri.

Currently Selected:

A-pûn Awang 30: znot

Highlight

Compare

Copy