A-pûn Awang 31
31
Laban Chyáng Mai Yakup Hpang É Hkyô
1Yakup gi, Laban é yhang zo yùqzô pé mai, “Ngá-nhik wui é âwa sing é sùtzè jung hkangmó lé Yakup yu pyám byi bê nghut ri; yhang wó tô é sùtzè shî bànshoq gi, ngá-nhik wui é âwa eq sêng é sùtzè mai wó lo é nghut ri.” ga taí kô é lé wó gyô ri. 2Hau htoq agó, yhang gi, Laban é myòqdong lé wú le le, hí lhê su a dùt lô é lé byu myàng bê nghut ri.
3Haú hkûn, haû Yhûmsîng Garai gi, Yakup lé, “Náng é îchyí îwâ pê é mau, náng é buìnùm ji-myi wui chyáng taû ló aq; Ngò gi, nàng eq rahá nghut nyî râ nghut lhê.” ga taî ri.
4Haû mù, Yakup gi, yhâng é sau bainám hpúng pé nyi é pá má, Rahkela eq Le-a nhik lé ê ji lò nhâng mù, 5yhángnhik lé, “Núngnhik é yhâng wa gi, hí lé yhang shit nyi é myòqdong, ahkuî ngo lé a shit lo kut é lé, ngò myang ri; nghut kôlhang, haû ngá wâ é Garai Gasang gi, ngò eq rahá nghut nyi lhê. 6Núngnhik é yhâng wâ é matú, ngá é wum-o a-tsam bànshoq èq zui saí byi bê nghut é hkyô lé, núngnhik sê lhê; 7nghut kôlhang, núngnhik é yhâng wa gi, ngá é zui hpau lé raxê dàm htaî lhik pyám byî é dông, ngo lé mò zô yù bê nghut ri; haû su nghut kôle, Garai Gasang gi, yhâng èq ngo lé dàm tap byi râ lé a nhô nghut ri. 8Yhang gi, ‘A-ká a-kóng mâ é gi, náng é zui hpau nghut râ nghut lhê.’ ga taí jáng, sau bainám hpúng pé bànshoq gi, a-ká a-kóng mâ é tsing shuî bum ri; yhang gi, ‘A-ká ká mâ é gi, náng é zui hpau nghut râ nghut lhê.’ ga taí jáng, sau bainám hpúng pé bànshoq gi, a-ká ká mâ é tsing shuî bum ri. 9Haû mù, Garai Gasang gi, núngnhik yhâng wâ é shigu gaunyhaú lé yu pyám byi mù, ngo lé byi bê nghut ri.
10Hau htoq agó, ache cháng nám lé, ngá é yhupmòq ralhum má, ngò tu wú kat le, nam che châng é bainám lo pé gi, a-ká ká mâ é, a-ká a-kóng mâ é eq abòq bòq mâ é chyat nghut é lé myang ri. 11Yhupmòq haú má, Garai Gasâng é maumang lagyo gi, ngo lé, ‘Yakup.’ ga wùt ri; ngò gi, ‘Shî má nyi lhê.’ nghû tû kat é nghut lhê. 12Haú hkûn, yhang gi, ‘Tu wú kat àq; nam che châng é bainám lo pé gi, a-ká ká mâ é, a-ká a-kóng mâ é eq abòq bòq mâ é chyat nghut é lé myang ri; hkâsu mù gâ le, Laban, nang lé kut nyi é hkyô bànshoq lé, ngò myàng byi bê nghut lhê. 13Ngò gi, nàng, lùqzìng má namngón xû but luî, Ngo lé dâkam é jowò Behtela mâ é Garai Gasang nghut lhê. Ahkuî, radá dâm shí mau mai htoq luî, náng é choq hpyit mau má taû ló aq.’ ga taî ri.” ga taî ri.
14Haú hkûn, Rahkela eq Le-a nhik gi, “Ngá-nhik é âwâ yhûm má, ngá-nhik é matú, muìzè gàmbùm a jòq lo nhung! 15Yhang gi, ngá-nhik lé, tûngbaù lame dông sôn pyám bê lhú? Yhang gi, ngá-nhik lé ung zô pyâm é htoq agó, ngá-nhik é hpaulàng lé le zô pyám bê nghut ri. 16Ngá-nhik é âwâ chyáng mai, Garai Gasang yu pyám byî é sùtzè bànshoq gi, hkyak yhang, ngá-nhik eq ngá-nhik é zodù wui matú nghut lhê. Haû mù, nang lé Garai Gasang taî é dang pé eq rajung za kut àq.” ga yhang lé tû taî akô nghut ri.
17Haû mù, Yakup gi, yhang zô pé eq yhâng é yhûmsîng myhî pé lé, gola-uk pé má ji nhâng mù, 18Hpadan Aram má yhang wó yu é shigu gaunyhaú bànshoq lé kôn chûng luî, yhang wó hkong yu é sùtzè lhúnglháng lé yu chûng mù, Hkanan mau má nyi é yhâng wa Isak chyáng ló râ matú htoq ló bekô nghut ri. 19Laban gi, saumaú ê wùq râ ga htoq e ló byùq é hkûn, Rahkela gi, yhâng wâ é yhûmwù nàt pé lé hkaû yu ri. 20Hau htoq agó, Yakup gi, Aram byù Laban lé, haî le a taî kyô é za haq hpang ri. 21Haû mù, Yakup gi, yhang wó é lhúnglháng eq hpâng luî, wuìlàng mó#31:21 Wuìlàng mó gi, Uhprat lâng lé gâ é nghut ri. laî byìt mù, Gile-at bum mau shut e ló bê nghut ri.
Yakup Lé Laban Châng Hkat É Hkyô
22Sum nyí nghû râ nyí má, Yakup hpang bê hkyô, Laban lé taî kyô akô nghut ri. 23Laban gi, yhâng é buìnùm wuì lé shuî chûng mù, Yakup lé nyhit nyí yhang châng hkat jáng, Gile-at bum mau má ê châng hkyit bê nghut ri. 24Haú hkûn, Garai Gasang gi, myín lé, yhupmòq dông Aram byù Laban chyáng lé jé mù, yhang lé, “Yakup lé, ge é le, a ge é le a taî é za, sidìq nyì àq.” ga taî ri.
25Laban, Yakup lé châng hkyit é hkûn, Yakup gi, Gile-at bum mau má zúm saí mù, nyi to bê nghut luî, Laban eq yhâng é buìnùm wui le, haú má jowò hkyó bekô nghut ri. 26Haû mù, Laban gi, Yakup lé, “Nàng gi, haî kut lhê lhú? Nàng gi, ngo lé mhaú zo bê nghut ri; nàng gi, ngá zo byìzô pé lé, majan mâ é shúm byu pé lé su shuî htoq lô bê nghut ri. 27Nàng gi, haî mù, tsik za haq mhaû hpang lhê lhú? Nang lé, gabú myìt mai, tíng sámpyí pé bàt lhê mùt lhê kut luî, mahkôn hkôn mù, pûn kat râ ru nghut lhê wa, haî mù ngo lé a taî kyô é lhú? 28Nàng gi, ngá shû pé eq ngá zô nhiktâng lé lháng bo-puq a puq byî kat nhâng. Nàng gi, nhik a gyîng é múzó kut bê nghut ri. 29Ngò gi, núngmòq lé kut nau é su ge kut lhê; nghut kôlhang, a-màn, náng wâ é Garai Gasang gi, ‘Yakup lé, ge é le, a ge é le a taî é za, sidìq nyì àq.’ ga ngo lé taî ri. 30Ahkuî, nàng, náng wâ é yhûm shut myìt tuî nyì mù, taû ló nau é yánmai htoq lô kô é gi, nghut bê; nghut kôlhang, ngá é hparà lhô pé lé, haî mù hkaû chung akô lhú?” ga taî ri.
31Yakup gi, Laban lé, “Ngò gi, nàng, nungzô nhiktâng lé, ngá chyáng mai zìk shuî yu pyám byi âbe nghû wó myìt é yánmai, gyùq luî hpang é nghut lhê. 32Nghut kôlhang, náng é hparà pé yu tô é sû lé myang ho é nghut jáng, haú yùq gi, shî sháng gàq. Ngá aûzô é gu-mang wui hí má, ngá chyáng náng é zè rajung jung bò a bo é lé, nàng yhang wú wú aq; bò jáng gi, yù àq.” ga taî ri. Yakup gi, hparà haú pé lé Rahkela hkaû chung é, a sé nghut ri.
33Haû mù, Laban gi, Yakup é zúm má le, Le-a é zúm má le, duìnhâng zoshâng myiwe í yùq é zúm má le, wang ho ri; nghut kôlhang, haî a myàng hô nghut ri. Yhang gi, Le-a é zúm mai htoq lo é htâng, Rahkela é zúm má wang e ri. 34Rahkela gi, yhûmwù nàt pé lé yù mù, yhâng é gola-uk lé buí é htûng hkaû má kat luî, hau é ahtoq má zung tô ri. Laban gi, zúm hkaû mâ é jung hkangmó má ho wú kôlhang, haî le a myang hô nghut ri.
35Rahkela gi, yhâng wa lé, “Ngá yhûmsîng ê, ngò gi, náng é hí má a wó toq yàp é yánmai hkâ nhik-yo; ahkuí u ngò hking lé nyi ri.” ga taî ri. Haû mù, Laban gi, ho wú kôlhang, yhûmwù nàt haú pé lé a myang hô nghut ri. 36Yakup gi, nhik-yô naû luî, Laban lé dangnyhin nyhîn ri. Haú hkûn, yhang gi, Laban lé, “Ngò haî kut shut é lhú? Ngò gi, hai mara kut shut luî, nàng, shî hé jé châng hkat râ dùt é lhú? 37Ahkuî, nàng, ngá é zè bànshoq má ho wú bê mhaî, náng yhûm eq sêng é zè haí jung myang ho ri lhú? Shî, náng é buìnùm wuì eq ngá é buìnùm wui hí má tô kat wú aq; nàng eq ngo lé, yhángmòq jéyáng byi kó sháng gàq.
38Ngò gi, nàng eq 20 zàn yhang rahá chôm nyì bê nghut lhê. Náng é sau bainám radu le a byaí byùq é htoq agó, náng é sau bainám hpúng pé mâ é saulo bainám lo radu le a zô pyám byî wú é nghut lhê. 39Ngò gi, yòsô ze èq lâng myha pyâm é gaunyhaú, náng chyáng a yu lo wú; ngá é shèq ru sûm pyám nhang é nghut lhê. Nyí lé nghut nghut, myín lé nghut nghut, hkaû hpyuq é hai jung lé le, nàng, ngá chyáng mai chyîn but yu é nghut lhê mhaî. 40Ngò hkâsu dùt laî é lhú gâ le; nyí le gi, nyé kyop, myín lé gi, gyòq kup mù, a wó yhup dùt byùq byùq mu é nghut lhê. 41Ngò gi, 20 zàn yhang haû su náng yhûm má nyi laî lo é nghut lhê. Ngò gi, nungzô nhiktang é matú, 14 zân mú zuî o mù, náng é sau bainám hpúng pê é matú hkyuq zân zuî ô é nghut lhê; haú hkûn, nàng gi, raxê dàm yhang zui hpau htaî lhik pyám byî é nghut lhê. 42Ngá wâ é Garai Gasang, Abraham é Garai Gasang eq ngá wa Isak gyùq hkúnggâ é Sû, ngò eq rahá a nghut nyî rû mu le gi, teng za, nàng, ngo lé lòqkôm nhang kat râ nghut lhê. Nghut kôlhang, Garai Gasang gi, ngò zuî shi-kùt é hkyô eq zuî ngú zuî hkyik é hkyô lé myàng byî é nghut mù, Yhang, a-màn nang lé tân é nghut ri.” ga taî ri.
43Laban gi, Yakup lé, “Myiwe haú nhiktâng gi, ngá zô nhik nghut lhê mhaî; zoshâng wuì gi, ngá é zoshâng wuì nghut lhê mhaî; sau bainám hpúng pé gi, ngá é sau bainám hpúng pé nghut lhê mhaî. Nàng myang é bànshoq gi, ngá é chyat nghut lhê. Nghut kôlhang, ngá é byìzô nhik eq yháng nhiktâng hku é zoshâng wuì lé, hkû-nyí ngò hkâsu kut râ lhú? 44Ahkuî, lé aq; ngá aûzo dangshikaq tô to gòq; haû gi, ngá aûzô é gyoro má sàksé dùt nyì sháng gàq.” ga tû taî ri.
45Haû mù, Yakup gi, lùqgòk racham wàq yù mù, pyîlàt masàt zìng dông xuq ri. 46Hau htâng, yhang gi, yhâng é buìnùm wuì lé, “Lùqgòk wàq tsing keq.” ga taî ri. Haû mù, haú bang gi, lùqgòk wàq lò mù, lo bum to kôluî, lùqbùm haú nâm má zoshuq chôm zô akô nghut ri. 47Laban gi, haú lé Yegara Sahaduta#31:47 Yegara sahaduta gâ é gi, Aramik laiká dông sàksé bûm gâ é lichyúm nghut ri. ga myhîng ri; Yakup gi, haú lé Galeda#31:47 Galeda gâ é gi, Hebre myíng dông sàksé bûm gâ é lichyúm nghut ri. ga myhîng ri.
48Laban gi, “Lùqbùm shî, hkû-nyí, nàng eq ngá é gyoro má sàksé nghut bê.” ga taî ri. Haû nghut é yánmai, lùqbùm haú lé Galeda ga myhîng é nghut ri. 49Lùqbùm haú lé Mizipa#31:49 Mizipa gâ é gi, mâchya gâ é lichyúm nghut lhê. ga le myhîng ri; haî mù gâ le, “Haû Yhûmsîng Garai gi, nàng eq ngò wê gâng tô é hkûn, ngá aûzô é gyoro má wú byî nyì sháng. 50Nàng, ngá zô nhiktâng lé zing-ri kôle, ngá zô nhiktâng mai lai luî, nàng gótû myiwe dum yù kôle, ngá aûzô chyáng byù sàksé a nyì kôlhang, Garai Gasang gi, nàng eq ngá é gyoro má sàksé nghut é lé myìtbûn nyì àq.” gâ Laban taî é yánmai nghut ri.
51Hau htoq agó, Laban gi, Yakup lé, “Nàng eq ngá é gyoro má ngò xuq tô é lùqbùm eq pyîlàt zìng gi, shî nghut lhê. 52Ngò gi, nang lé htim râ matú, lùqbùm shî mai a lai râ eq, nàng gi, ngo lé htim râ matú lùqbùm shî eq pyîlàt zìng shî mai a lai râ matú, lùqbùm shî eq pyîlàt zìng shî gi, sàksé nghut bê. 53Haû Abraham é Garai Gasang, Nahora é Garai Gasang, yhángmòq é îchyí îwâ pé é Garai Gasang gi, ngá aûzô é gyoro má jéyáng byî nyì sháng gàq.” ga le taî ri.
Haû mù, Yakup gi, yhâng wa Isak gyùq hkúnggâ é Garaî myìng lé lang luî, dakâm bê nghut ri. 54Yhang gi, bum mau mâ é jowò haú má hkungga nhông luî, yhâng é buìnùm wuì lé zoshuq zo râ matú ji yu ri. Haú bang gi, zô yù é htâng, haú myîn, haú jowò má bíng yu akô nghut ri.
55Htang nàpkyó noq le, Laban gi, yhang shû pé eq yhang zô nhiktâng lé bo-puq puq byi luî, shimân byi mù, yhâng é yhûm shut taû ló byùq bê nghut ri.
Currently Selected:
A-pûn Awang 31: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
