A-pûn Awang 29

Hpadan Aram Má Yakup Jé É Hkyô

1Hau htâng, Yakup gi, yhâng é hkyôwuì shut xoq e ló mù, buìhtoq hkyam mâ é byu pê é mau má ê jé ri. 2Yhang gi, haû dánpyut yô má wuìhtúng rahtúng jòq tô é lé le, wuìhtúng haû mai sau hpúng lé wuì hkâm huq huq lhaq kut kô é yánmai, wuìhtúng hau é a-nàm má sau hpúng sum hpúng up tô é lé le myang ri. Wuìhtúng haú má nghop tô é lùqgòk gi, luq long mó nghut ri. 3Haú má sau pé bànshoq zîng lo é hkûn, sau zúng bang gi, wuìhtúng má nghop tô é lùqgòk lé tu lhêng pyám kômù, sau pé lé wuì hku huq huq kut akô. Hau htâng, yhángmòq gi, wuìhtúng má lùqgòk lé yhâng é jowò má yhang dum lhêng nghop to to kut akô nghut ri.

4Yakup gi, haû sau zúng bang lé, “Gu-mang wuì ê, núngmòq gi, hkâ mâ é bang nghut akô lhú?” ga myî ri.

“Ngá-mòq gi, Haran mâ é bang nghut lhê.” ga yhángmòq tû taî akô nghut ri.

5Haú hkûn, yhang gi, “Nahora é yhang shu Laban lé, núngmòq a sé kó lhú?” ga myî ri.

Yhángmòq gi, “Sê lhê.” ga tû taî akô.

6Haú hkûn, Yakup gi, yhángmòq lé, “Yhang wángzán nyi ri lhú?” ga myî ri.

Yhángmòq gi, “Yhang wángzán nyi ri. Wú aq, yhang zo byìzo Rahkela gi, sau hpúng lé kon mù, lé lo nyi ri.” ga taî akô nghut ri.

7Yhang gi, haú bang lé, “Wú keq; buì hing ashî. Sau hpúng lé kôn tsing râ hkyíng a nghut shi. Sau pé lé wuì hku huq mù, mhan yô má ê dum zúng shi keq.” ga taî ri.

8Yhángmòq gi, “Haú dông ngá-mòq a wó dùt; sau hpúng pé bànshoq ban zing jáng shèq, wuìhtúng nghop lùqgòk lé tu lhêng pyám mù, sau pé lé wuì byi huq râ ru nghut lhê.” ga tû taî akô nghut ri.

9Yhang gi, yhángmòq lé dang ru taî nyi ashî u lé, Rahkela gi, yhâng wâ é sau pé lé kon mù, jé lé lo ri; hkâsu mù gâ le, yhang gi, sau zúng byìzo nghut é yánmai nghut ri. 10Yakup gi, yhâng tsa Laban é yhang zo byìzo Rahkela eq Laban é sau pé lé myàng jáng, huî ê mù, wuìhtúng nghop lùqgòk lé tu lhêng pyám luî, yhâng tsâ é sau pé lé wuì hku huq bê nghut ri. 11Hau htâng, Yakup gi, Rahkela lé bo-puq puq byi mù, htê mó eq wùt ngau ri. 12Yhang gi, yhâng wa Laban é buìnùm nghut é hkyô lé le, Rebeka é yhang zo nghut é lé le, Rahkela lé taî kyô ri. Haû mù, Rahkela gi, yhâng wa lé, ló din taî kyô ri.

13Laban gi, yhâng nhammó é yhang zo Yakup é hkyô lùdang lé wó gyo eq yhang, yhang lé hân hân ê huî ri. Yhang gi, Yakup lé po zing to mù, bo-puq puq luî, yhâng yhûm má shuî ló ri. Yakup le, yhâng é hkyô bànshoq Laban lé taî kyô ri. 14Haú hkûn, Laban gi, yhang lé, “Nàng gi, ngá é suisho yhang nghut ri.” ga taî ri.

Le-a Eq Rahkela Lé Yakup Yu É Hkyô

Yakup gi, yhang eq lha-mó rahkyap gón nyi é htâng, 15Laban gi, yhang lé, “Nàng gi, ngá é buìnùm sîng lháng nghut bê nghû, hai ahpau le a yu é za, ngo lé zui tso zui huq râ lhú? Nàng zuî é ahpau haî o ri; ngo lé taî kyô wú aq.” ga taî ri.

16Laban gi, byìzo í yùq wó ri; ko sû yùq é myìng gi, Le-a gâ ri; tiq sû yùq é myìng gi, Rahkela gâ ri. 17Le-a gi, myòq wum nyhóm sû nghut ri; nghut kôlhang, Rahkela gi, gùnghkyâng eq ihpyô isâm yúng sû nghut ri. 18Yakup gi, Rahkela lé chyit é nghut luî, “Ngò gi, nungzo tiq sû yùq Rahkela lé yù râ matú, nang lé, nyhit zân mú zui byi râ nghut lhê.” ga taî ri.

19Haú hkûn, Laban gi, “Góyùq lé byî pyám râ htoq má, náng lé byî le gi, je ge ri. Ngò eq rahá nyì gòq.” ga taî ri. 20Haû mù, Yakup gi, Rahkela lé yù râ matú nyhit zân dójaú bê nghut ri; nghut kôlhang, yhang gi, Rahkela lé chyit kang nyi é yánmai, yhâng é matú, haú lé buìnyì ra í nyí su za gâ é nghut ri.

21Haú hkûn, Yakup gi, Laban lé, “Ngo lé, ngá é yhûmsîng myhí byi àq hkoi! Buìnyì zànwut byíng bê nghut mù, ngò, yhang eq i-kun mù naù bê.” ga taî ri.

22Haû mù, Laban gi, haú jowò mâ é byù bànshoq lé ji tsing luî, zoshuq poî kut byî ri. 23Nghut kôlhang, yhang gi, myín jé jáng, Yakup lé, yhang zo byìzo Le-a byî é nghut mù, Yakup gi, yhang eq nyì zo bê nghut ri. 24Laban gi, yhâng é duìnhâng zoshâng myiwe Zilihpa lé, yhâng é byìzo Le-a é duìnhâng zoshâng kut râ matú byî lhóm bê nghut ri.

25Htang nàpkyó gi, Le-a shèq dùt to lháng ri! Haû mù, Yakup gi, Laban lé, “Nàng gi, ngo lé haî kut lhê lhú? Ngò gi, Rahkela é matú shèq dójaú é a nghut lhí? Nàng, ngo lé haî mù mhaû é lhú?” ga taî ri.

26Laban gi, “Ngá-mòq shî má gi, byìzo tiq sû yùq lé, ko sû yùq é hí má byi tsô é htûng a jòq. 27Shî myihâng é bàt hí lai sháng gàq, hau htâng, nàng, nyhit zân mú dum xoq zui byi râ nghut é ahpau dông, ngá-mòq gi, tiq sû yùq lé byi tso râ nghut lhê.” ga tû taî ri.

28Yakup gi, haú dông kut bê nghut ri. Le-a eq hâng lhûm é rabàt byíng jáng, Laban gi, yhang zo byìzo Rahkela lé, Yakup é yhûmsîng myhí kut râ matú, yhang lé byi tso bê nghut ri. 29Laban gi, yhâng é duìnhâng zoshâng myiwe Bila lé, yhâng é byìzo Rahkela é duìnhâng zoshâng kut râ matú byî lhóm bê nghut ri. 30Yakup gi, Rahkela chyáng le wàng bê nghut ri; yhang gi, Le-a lé chyit é htoq má, Rahkela lé je chyit ri. Haû mù, yhang gi, Laban é matú, nyhit zân mú dum xoq zui byi bê nghut ri.

Yakup É Yhang Zô Pé

31Haû Yhûmsîng Garai gi, Le-a, a naù a wom kut é hui zô nyi é lé myàng jáng, yhâng é zo lúng hkyûng lé zo wó hkyô htong byî ri; nghut kôlhang, Rahkela gi, baùdung myhí dùt byùq ri. 32Le-a gi, zogûng wùn mù, yùqzo rayùq hku ri. Yhang gi, “Ngò, hpû nyì shô nyi é hkyô lé, haû Yhûmsîng Garai myàng byî é yánmai nghut bê. Ahkuî, ngá é yhûmsîng hpó gi, ngo lé teng za yhang chyit berâ nghut lhê.” ga taí mù, yùqzo haú lé Rubin#29:32 Rubin gâ é lé, Hebre danghtê má, Yhang, ngò hpû nyì shô nyi é hkyô lé myàng byi bê gâ é lichyúm htoq lhê. Mying é lichyúm gi, wú aq, yùqzo rayùq gâ é nghut lhê. ga myìng myhíng byî ri.

33Yhang gi, zogûng dum wùn mù, yùqzo rayùq hku é hkûn, “Ngò gi, chyit myìt a myang hkam yu é hkyô lé, haû Yhûmsîng Garai wó gyo byi mù, Yhang gi, shí yùq lé le, ngo lé byi bê nghut ri.” ga taî ri. Haû mù, yhang gi, yùqzo haú lé Sime-on#29:33 Sime-on gâ é lichyúm gi, wó gyo byi sû gâ é nghut râ nghut lhê. ga myìng myhíng byî ri.

34Yhang gi, zogûng dum wùn mù, yùqzo rayùq dum hkû jáng, “Ahkuî, ngò gi, ngá é yhûmsîng hpó lé yùqzo sum yuq hkû byi bê nghut é yánmai, ngò eq zum nyì berâ nghut lhê.” ga taí mù, yùqzo haú lé Lewiq ga myìng myhíng byî ri.

35Yhang gi, zogûng dum wùn mù, yùqzo rayùq dum hkû jáng, “Shí dá gi, ngò, haû Yhûmsîng Garai lé hkya-on râ nghut lhê.” ga taí mù, yùqzo haú lé Yudaq ga myìng myhíng byî ri. Hau htâng, yhang gi, zo a hkû lo dùt byùq bê nghut ri.

Currently Selected:

A-pûn Awang 29: znot

Highlight

Copy