A-pûn Awang 22

Abraham Chyam Lìk Huî É Hkyô

1Rayòq rabun zo laî é htâng má, Garai Gasang gi, Abraham lé chyam lìk wú râ ga, yhang lé, “Abraham!” ga wùt ri.

Yhang gi, “Ngò shî má nyi lhê.” ga tû taî ri.

2Haú hkûn, Garai Gasang gi, “Nàng chyitdàp é nungzo yùqzo te Isak lé shuî chûng mù, Mori-a mau shut ê àq. Ngò, nang lé shit râ nghut é bùm pé mâ é rabùm má, yhang lé, myi nyhé hkungga dông ê nhông byi aq.” ga taî ri.

3Haû mù, htang nàpkyó noq le, Abraham gi, toq mù, yhâng é loze lé zè buí luî, yhâng é duìnhâng zoshâng í yùq lé le, yhang zo Isak lé le shuî chung ri. Yhang gi, myi nyhé hkungga nhông râ htang lùq shoq wó ho yu é hkûn, yhang lé, Garai Gasang taî kyô é jowò shut htoq e ló bê nghut ri. 4Sum nyí nghû râ buìnyì má, Abraham gi, tu wú kat le, jowò haú lé we we mai byu myang kat ri. 5Haû mù, yhang gi, yhâng é duìnhâng zoshâng nhik lé, “Zoshâng shî eq ngáhpe, hé má e é hkûn, núngnhik gi, shî má loze eq rahá nyi to keq. Ngáhpe gi, hé má ê noqkuq mù, núngnhik chyáng dum taû lò râ nghut lhê.” ga taî ri.

6Abraham gi, myi nyhé hkungga nhông râ htang lé wàq yù mù, yhang zo Isak lé ke byî ri; yhang gi, myi eq shâmhto chung ri; yhánghpe rahá sô e ló kô é u lé, 7Isak gi, dáng nyo htoq mù, yhâng wa Abraham lé, “Âwà?” ga wùt ri.

Abraham gi, “Oî, ngá zo ê?” ga tû taî ri.

Haú hkûn, Isak gi, “Myi eq htang gi, wó bê nghut ri; nghut kôlhang, myi nyhé hkungga sau zo gi, hká má lhú?” ga myî ri.

8Abraham gi, “Ngá zo ê, myi nyhé hkungga sau zo lé gi, Garai Gasang yhang lajang byi râ nghut lhê.” ga tû taî ri. Yhánghpe gi, xoq luî rahá sô e ló bekô nghut ri.

9Garai Gasang taî kyô é jowò má yhánghpe jé kô é hkûn, Abraham gi, haú má kaúgyàp ralhum saí luî, hau é ahtoq má htang zang tô ri. Hau htâng, yhang gi, yhang zo Isak lé tuî shung mù, haû kaúgyàp htoq mâ é htang htoq má lheq tô ri. 10Hau htâng, yhang gi, lòq jín kat mù, yhang zo lé sat râ matú, shâmhto yu ri. 11Nghut kôlhang, haû Yhûmsîng Garaî é maumang lagyo gi, yhang lé, “Abraham! Abraham!” ga mauhkûng mai wùt htoq kat ri.

Abraham gi, “Ngò shî má nyi lhê.” ga tû taî ri.

12Maumang haû gi, “Haû zoshâng lé lòq hkâzáng; yhang lé, haî le hkâkut. Nàng, Garai Gasang lé gyùq hkúnggâ é lé, ahkuî, ngò sé bê; haî mù gâ le, nàng gi, nungzo zote lé lháng, ngo lé a byi a kut nghut ri.” ga taî ri.

13Haú hkûn, Abraham tu wú kat le, saulo zo radu sikhpup má yhâng hkyuî wé tô é lé byu myang kat ri. Yhang gi, ê mù, sau zo haû lé ê she yù luî, yhang zô é gùnglik dông myi nyhé hkungga nhông byi bê nghut ri. 14Haû mù, Abraham gi, jowò haû lé Yhûmsîng Garai Lajang Byi Râ ga myhîng ri. Hau htoq agó, “Haû Yhûmsîng Garaî é bùm má lhom lajang byi râ.” gâ é danglhîng gi, hkû-nyí jé shoq jòq tô ri.

15Haû Yhûmsîng Garaî é maumang lagyo gi, mauhkûng mai Abraham lé, í dâm nghû râ dàm, 16“Nàng gi, nungzo zote lé lháng, ngo lé a byi a kut é hkyô shî lé kut bê nghut é yánmai, Ngá gûng Ngò dâkam lhê ga haû Yhûmsîng Garai taî pyo ri. 17Ngò gi, nang lé teng za shimân byi râ nghut mù, náng é awùt ashín pé gi, maulat mâ é kyî pé su le, wuimau yàm mâ é se-muî su le, myô lò râ nghut lhê. Náng é awùt ashín pé gi, yhángmòq é gye pê é wà mó wà zo pé lé sing yù kôrâ nghut lhê. 18Hau htoq agó, náng é awùt ashín dông mai, myìdàm htoq mâ é a-myû wuì bànshoq gi, shimân byî é hui kôrâ nghut lhê. Haî mù gâ le, nàng gi, ngá é jì-no gyo bê nghut é yánmai nghut ri.” ga taî ri.

19Hau htâng, Abraham gi, yhâng é duìnhâng zoshâng nhik chyáng taû ló mù, rahá za Berasheba shut taû ló bekô nghut ri. Abraham gi, Berasheba má nyi tô ri.

Nahora É Yùqzô Pé

20Rayòq rabun zo laî é htâng má, Abraham lé taî kyo kô é gi, “Nunggu Nahora é yhûmsîng myhí Milihka le înu rayùq dùt mù, yhâng é matú yùqzô pé hkû byî ri. 21Haú bang gi, zo-mún yùq Uza, yhang gu Buza, Aram é yhâng wa Kemu-ela, 22Keset, Hazo, Piledasha, Yidalap, Behtu-ela pé nghut akô.” gâ ri. 23Behtu-ela gi, Rebeka lé hku ri. Milihka gi, Abraham é yhang gu Nahora lé, yùqzo haú gû shit yùq lé hkû byî ri. 24Nahora é myi-ngê Re-uma ga sû le yùqzô pé hku ri; haú bang gi, Teba, Gaham, Htahasha eq Mahka pé nghut akô nghut ri.

Currently Selected:

A-pûn Awang 22: znot

Highlight

Copy