A-pûn Awang 21

Isak Hku Lé Lo É Hkyô

1Ahkuî, haû Yhûmsîng Garai gi, Yhang taî tô é eq rajung za, Sara lé shogyo nhikmyîn yù mù, haû Yhûmsîng Garai danghtum htûm tô é dông, Sarâ é matú kut byi bê nghut ri. 2Haû mù, Sara gi, zogûng dùt luî, haû Garai Gasang danghtum htûm tô é ahkyíng má yhang, Abraham chyungxe mang bê le, yhâng é matú yùqzo hkû byî ri. 3Abraham gi, Sara hkû byî é yùqzo haú lé, Isak#21:3 Isak gâ é gi, wui chik gâ é lichyúm nghut lhê. ga myìng myhíng byî ri. 4Abraham gi, yhang zo Isak shit nyí bo é hkûn, yhang lé Garai Gasang hkunmó hkyô tô é eq rajung za, Isak lé ahpyo-kuq hpyit byî ri. 5Abraham gi, yhang zo Isak hku é hkûn, chyungxe zànwut 100 zàn bò bê nghut ri.

6Sara gi, “Ngo lé, Garai Gasang je wui gabú nhâng bê nghut mù, shí hkyô lé wó gyô é bang yùq hkangmó gi, ngò eq rahá wui gabú kôrâ nghut lhê.” ga taî ri. 7Hau htoq agó, yhang gi, “Sara zonaú huq râ nghut lhê ga Abraham lé ó yùq wá taî wú é lhú? Nghut kôlhang, yhang mang bê le, ngò gi, yhâng é matú yùqzo hkû byi bê nghut lhê.” ga xoq taî ri.

Hagara Eq Ishima-elaq Lé Nhang Htoq Pyâm É Hkyô

8Zoshâng haû kô lò mù, zonaú kang bê nghut ri; haû Isak naú kâng é buìnyì má, Abraham gi, poî mó kut ri. 9Nghut kôlhang, Sara gi, Egutuq byù Hagara mai Abraham lé hkû byî é yùqzô èq rhoî zô nyi é lé myang ri; 10haû mù, yhang gi, Abraham lé, “Haû jùn myhí eq yhang zo lé hkat pyám aq; hkâsu mù gâ le, haû jùn myhî é yhang zo gi, ngá zo Isak eq rahá, hkâ-nhám le, muìzè gàmbùm wó bo hkam yù râ a nghut.” ga taî ri.

11Abraham gi, yhang zo nghut é yánmai, haú hkyô eq séng luî, gyai yhang myìt wuîhkê nyi ri. 12Nghut kôlhang, Garai Gasang gi, yhang lé, “Yùqzo haû eq náng é duìnhâng zoshâng myhî me eq séng luî, haû í hkâ-myìt wuîhkê nyì. Sara taî é bànshoq gyo aq; haî mù gâ le, Isak dông mâ é shèq, náng é awùt ashín nghû râ nghut lhê. 13Ngò gi, duìnhâng zôshang é yhang zo yùqzo lé le, a-myû ra-myû dùt nhâng râ nghut lhê; haî mù gâ le, yhang gi, náng é awùt ashín nghut ri.” ga taî ri.

14Htang nàpkyó noq le, Abraham gi, zoshuq eq wuì sho-kuq htûng rahtûng lé yù mù, Hagara lé byî ri. Hau htâng, yhang gi, haú pé lé yhâng é gòqsân má ke byi mù, zoshâng yùqzo eq yhángme lé nhang htoq kat bê nghut ri. Hagara gi, xoq luî, sô e ló mù, Berasheba mâ é kyuq huî é yòso má sô yông lhing wún ri.

15Yhang gi, sho-kuq htûng mâ é wuì ban byùq jáng, zoshâng lé, sikhpup rahpup ô má ê lheq tô ri. 16Hau htâng, yhang gi, “Haû zoshâng shi é lé, ngò a myàng naù.” ga myìt yù mù, lai rabìk kô wê é má sô gâng ê luî, haû hkâ-í a wê é jowò má ê zung tô ri. Yhang gi, haû hkâ-í a wê é má yhang zô shut hû luî, zung to mù, wùt garû ngaù bê nghut ri.

17Garai Gasang gi, zoshâng yùqzô é ngaù htê lé wó gyo byi mù, Garai Gasâng é maumang lagyo gi, mauhkûng mai Hagara lé wùt mù, yhang lé, “Hagara ê, haî mu ri lhú? Hkâgyùq; Garai Gasang gi, zoshâng yùqzo hé má lèq to mù ngau nyi é lé, wó gyo byi bê nghut ri. 18Zoshâng yùqzo lé tu toq mù, yhang lé lòq èq bún yû àq; hkâsu mù gâ le, Ngò gi, yhang lé, byù myû mó ra-myû dùt nhâng râ nghut lhê.” ga taî ri.

19Hau htâng, Garai Gasang gi, yhâng é myòq lhoqbóng byi jáng, yhang gi, wuìhtúng rahtúng lé myang kat ri; haû mù, yhang gi, sho-kuq htûng má wuì kat yû mù, zoshâng yùqzo haú lé byi huq ri.

20Zoshâng yùqzo kô lo nyi é eq rajung za, Garai Gasang gi, yhang eq rahá nghut nyi ri. Yhang gi, yòso má nyì mù, lai chûng sho bik zo sû dùt bê nghut ri. 21Yhang gi, Paran gâ é yòso má nyi nyi é hkûn, yhâng nu gi, yhâng é matú, Egutuq ming mai myiwe rayùq yù byî ri.

Berasheba Má Myìt Hui Hkyô Yù

22Haú yòq má, Abimelek eq yhâng é gyèzau hpó Hpihkola gi, Abraham lé, “Garai Gasang gi, nàng kut é hkyô hkat hkangmó má, nàng eq rahá nghut nyi ri. 23Haû nghut mù, ngo lé le, ngá é zodù wuì lé le, ngá é awùt ashîn pé lé le, a nghut é dông a kut é za, ngò, nang lé jeju shit é eq rajung za, ngo lé le, nàng byù bíng kut nyi é mîngdán shî lé le jeju shit râ nghû, Garai Gasâng é hí, shí jowò má ngo lé dakâm àq.” ga taî ri.

24Abraham gi, “Ngò dâkam lhê.” ga taî ri.

25Haú hkûn, Abraham gi, Abimelek é duìnhâng zoshâng wuì lú yu é wuìhtúng eq séng luî, Abimelek lé mara hûn dang taî ri. 26Nghut kôlhang, Abimelek gi, “Haû ó yùq kut é hkyô lé ngò a sé. Nàng yuq ngo lé a taî kyo; ngò gi, hkû-nyí shèq haú hkyô lé wó gyô ri.” ga tû taî ri.

27Haû mù, Abraham gi, sau pé eq no myang pé kôn lé mù, Abimelek lé byi luî, yháng í yùq gi, myìt hui hkyô yu to bekô nghut ri. 28Abraham gi, sau pyá zo nyhit du lé, sau hpúng mai gótû kut gam htoq tô é nghut mù, 29Abimelek gi, Abraham lé, “Nàng, shî sau pyá zo nyhit du lé gótû kut gam htoq tô é gi, hai lichyúm nghut lhê lhú?” ga myî ri.

30Abraham gi, “Wuìhtúng shî ngò dû é nghut lhê nghu é sàksé zê dông, ngá é lòq mai sau zo shî nyhit du lé hàp yù byi aq.” ga tû taî ri.

31Haû mù luî, jowò haú lé gi, Berasheba#21:31 Berasheba gâ é gi, wuìhtúng nyhit htúng, a nghut jáng, dakâm dang taî é wuìhtúng gâ é lichyúm nghut lhê. gâ ri; haî mù gâ le, haú má byù haû í yùq dakâm dang taí kô é yánmai nghut ri.

32Berasheba má myìt hui hkyô yu é htâng, Abimelek eq yhâng é gyèzau Hpihkola gi, Hpilisiti mau má dum taû ló bekô nghut ri. 33Abraham gi, Berasheba má mugyêng shigâm sû é sikgâm hô to mù, haú jowò má, ahtum abyùq é Garai Gasang, haû Yhûmsîng Garaî é myìng lé lâng ri. 34Haû mù, Abraham gi, Hpilisiti mau má gyai myáng shoq nyi nyi ri.

Currently Selected:

A-pûn Awang 21: znot

Highlight

Copy