A-pûn Awang 23

Sara Shi Ló Byùq É Hkyô

1Sara gi, 127 zân chyungxe dui é nghut ri. 2Yhang gi, Hkanan mau mâ é, ahkuî Hebron wà gâ nyi é, Kiri-at Araba wà má shi ló byùq é nghut mù, Abraham gi, yhâng é yánmai, ngaùbyi ngaùnhap èq iyon mó yon râ matú e ló ri.

3Hau htâng, Abraham gi, yhâng yhûmsîng myhî é gùngsôm nàm mai toq mù, Hiti byu pé lé, 4“Ngò gi, mau we byù rayùq nghut mù, núngmòq chyáng lé bíng nyî sû nghut lhê. Haû mù, ngá é gùngsôm shî wó myhup sháng gàq, lùpdùng kut râ maumyî ratóng ung byi kó laq.” ga taî ri.

5Haû Hiti byu pé, Abraham lé tû taí kô é gi, 6“Yhûmsîng ê, ngá-mòq é dang lé gyo aq. Nàng gi, ngá-mòq é ahkaû má a-tsam mó bo é zau rayùq nghut ri. Ngá-mòq é lùp pé mâ é je réng é lùp má, náng é gùngsôm haú lé myhup àq. Ngá-mòq chyáng mâ é ó yùq le, yhûmsing é lùp má náng é gùngsôm lé a myhup nhâng kut râ a nghut.” gâ ri.

7Haú hkûn, Abraham gi, toq mù, haú mau mâ é byù nghut é, Hiti byu pê é hí má ngóm gòp ri. 8Haû mù, yhang gi, yhángmòq lé, “Ngá é gùngsôm shî myhup râ lé, núngmòq nhô kô é nghut jáng, ngá é dang lé gyo byi mù, ngá é gùnglik dông Zohara yhang zo Ehprun lé bo taí byi keq. 9Haú hkûn, yhang gi, yhâng é yòhtâng mâ é, yhang eq sêng é Makhpela gâ é lùqhkyûng, ngo lé ung byi sháng gàq. Lùpdùng gù eq gíng é myhó, núngmòq é myòq hí má ung byi râ matú, yhang lé bo taí keq.” ga taî ri.

10Hiti byù Ehprun gi, yhâng é byu pê é ahkaû má zung tô é nghut mù, yhâng é wà hkum má lé jé é Hiti byù bànshoq bang wó gyô tô é má, Abraham lé tû taî é gi, 11“Ngá yhûmsîng ê, haú dông a nghut; ngá é dang lé gyo aq; ngò gi, yò haû le, yòhkaû mâ é lùqhkyûng lé le, nang lé byî lhê. Ngò gi, ngá é byu pê é hí má, nang lé haû byî nyi lhê. Náng yhûmsîng myhî é gùngsôm haú lé myhup àq.” gâ ri.

12Dum, Abraham gi, haú mau mâ é byu pê é hí má ngóm gòp luî, 13haú bang gyô tô é má, Ehprun lé, “Nàng nho é nghut jáng, ngá é dang gyo aq. Ngò gi, myigùng hpau byi râ nghut lhê. Ngò gi, ngá yhûmsîng myhî é gùngsôm haú lé, haú jowò má wó myhup râ matú, ahpau haú lé ngá chyáng mai hàp yù byi aq.” ga taî ri.

14Ehprun mai Abraham lé tû taî é gi, 15“Ngá yhûmsîng ê, ngá é dang gyo aq; maumyî haû gi, ngùnhtung rajoí èq í xê rùng kô gíng é nghut lhê; nghut kôlhang, haû gi, nàng eq ngá é gyoro má haî wá shai lò râ lhú? Náng yhûmsîng myhî é gùngsôm haú lé myhup àq.” gâ ri.

16Abraham gi, Ehprun taî é dang lé myìt hui mù, Hiti byu pé gyô nyi é má, yhang taî htoq é yòhpau myhó, yhâng é matú lìk byî ri; haû gi, haú hkûn lhê é wuìloq kut bang chung é jàng mai ngùnhtung rajoí èq í xê rùng kô bo ri.

17Haû mù, Mamre nàm mâ é Makhpela jowò má jòq é, Ehprun é yò eq haú má bo é lùqhkyûng lé le, yòkyo pê hkaû má yùq é sikgâm pé bànshoq lé le, 18Abraham sing é maumyî dùt râ matú, haû wà hkum má lé jé é Hiti byù bànshoq bâng é hí má, Abraham lé àp byi bê nghut ri. 19Hau htâng má, Abraham gi, yhâng é yhûmsîng myhí Sara lé, Hkanan mau mâ é, Hebron le gâ é Mamre nàm má jòq é, Makhpela jowò mâ é, yò hkaû má bo é lùqhkyûng má myhup yhûm to bê nghut ri. 20Haû mù, Abraham sîng râ matú, yò haû eq haú má bo é lùqhkyûng lé, lùpdùng dông, Hiti byu pé mai Abraham lé àp byi kô é nghut ri.

Currently Selected:

A-pûn Awang 23: znot

Highlight

Copy