Htoq Ló 18
18
Mosheq Lé Yehtiro Ê Kûm É Hkyô
1Haú hkûn, Midi-an byu pê é hkyangjong hpó eq Mosheq é yhâng tsa nghut sû Yehtiro gi, Mosheq eq yhâng é Isira-elaq byu pê é matú, Garai Gasang kut byî é hkyô lhúnglháng lé le, haû Yhûmsîng Garaî èq Isira-elaq byu pé lé Egutuq ming mai hkâsu kut shuî htoq lo é hkyô lé le wó gyô ri.
2Mosheq é yhâng tsa Yehtiro gi, Mosheq mai nhang taû kat é yhâng yhûmsîng myhí Zihpora lé le, 3yhang zô nhiktâng lé le lhom hàp yu tô ri. Yùqzo rayùq é myìng gi, Gerishom gâ ri; haû gi, “Ngò, su mau má byù bíng dùt bê nghut ri.” ga Mosheq taî é yánmai nghut ri. 4Yùqzo góyùq é myìng gi, Eli-ezera gâ ri; haû gi, “Ngá wâ é Garai Gasang gi, ngo lé garúm sû nghut ri; Yhang gi, ngo lé, Hpara-uq é shámsó mai hkyi yù bê nghut ri.” ga Mosheq taî é yánmai nghut ri.
5Mosheq é yhâng tsa Yehtiro gi, Mosheq é yhang zô nhiktâng eq yhâng é yhûmsîng myhí le mù, Garai Gasâng é bùm nàm mâ é yòso má jowò hkyô tô é Mosheq chyáng jé lé mù, 6“Ngò, náng tsa Yehtiro gi, náng yhûmsîng myhí eq nungzô nhiktâng le mù, náng chyáng jé lé lô bê nghut lhê.” ga kyó nhang kat ri.
7Haû mù, Mosheq gi, yhâng tsa lé ê htoq hui luî, ngóm gòp mù, yhang lé bo-puq puq byî ri. Hau htâng, yhángmòq gi, rayùq eq rayùq lòq lang lâng lhum kôluî, zúm má wang ló akô nghut ri. 8Mosheq gi, yhâng tsa lé, Isira-elaq byu pê é matú, Hpara-uq eq Egutuq byu pé lé haû Yhûmsîng Garai kut é hkyô lhúnglháng lé le, hkyôwuì má yhángmòq htûng hui zô é wuîhke hkyô bànshoq lé le, yhángmòq lé haû Yhûmsîng Garai hkâsu kut hkyi yu é hkyô lé le tsing taî kyô ri.
9Yehtiro gi, Egutuq byu pê é lòq mai Isira-elaq byu pé lé hkyi htoq yu é má, Isira-elaq byu pê é matú haû Yhûmsîng Garai kut byî é jeju bànshoq lé wó gyo mù, gabú myìt ngón bê nghut ri. 10Haû mù, yhang gi, “Núngmòq lé, Egutuq byu pê é lòq mai le, Hpara-uq é lòq mai le hkyi htoq yû luî, Egutuq byu pê é lòq mai shiwa byù shí bang lé hkyi htoq yu é, haû Yhûmsîng Garai gi, hkungsô wó nyî sháng gàq. 11Haû Yhûmsîng Garai gi, gótû hparà pé bànshoq htoq má gyaú sû nghut é lé, ahkuî ngò sé bê; hkâsu mù gâ le, Yhang gi, Isira-elaq byu pê é ahtoq má myìt myhâng nghutbûn laî lò bang lé haú hkyô kut bê nghut ri.” ga taî ri. 12Hau htâng, Mosheq é yhâng tsa Yehtiro gi, Garai Gasâng é matú myi nyhé hkungga eq gótû hkungga pé yu lé é nghut luî, Arun gi, Isira-elaq byu pê é sûwún wuî bànshoq bang eq rahá, Garai Gasâng é hí má Mosheq é yhâng tsa eq zang chôm zo râ ga lé akô nghut ri.
13Htang nyí, Mosheq gi, shiwa byu pé lé târâ jéyáng byi râ ga yhâng é tánghkuq má zung tô ri; shiwa byù haú bang gi, nàpkyó mai myínhtâng jé shoq yhâng é lhînghkyùq má yàp tô bum akô. 14Mosheq é yhâng tsa gi, shiwa byu pé lé yhang kut byî nyi é hkyô bànshoq lé myàng jáng, “Shiwa byu pê é matú nàng kut nyi é haí jung lhú? Shiwa byu pé bànshoq bang gi, nàpkyó mai myínhtâng jé shoq náng é lhînghkyùq má yàp tô bum é hkûn, haî mù nàng baú za târâ agyì dông zung nyi lhê lhú?” ga taî ri.
15Haú hkûn, Mosheq gi, yhang lé, “Haû shiwa byu pé gi, Garai Gasang ô nau é hkyô lé sé râ matú, ngá chyáng lé kô é yánmai nghut ri. 16Yhángmòq mû htoq hkangmó ngá chyáng lé kô é nghut mù, ngò gi, í shut mâ é bang lé mû hpyit byi luî, Garai Gasâng é târâ wàng hkunmó eq sângdang lé mhoq byî nyi lhê.” ga tû taî ri.
17Haú hkûn, Mosheq é yhâng tsa gi, “Nàng kut nyi é hkyô gi, a jo nghut ri. 18Nàng le, náng chyáng lé é byù shí bang le, ngú byùq râ za nghut lhê. Múzó shî gi, náng é matú wòlai mó nghut ri; nàng baú mú haú lé ûng râ a nghut. 19Ahkuî ngá dang gyo aq; ngò, nang lé hpàqchyî byi râ; Garai Gasang gi, nàng eq rahá nghut sháng gàq. Nàng gi, haû shiwa byu pê é gùnglik dông Garai Gasâng é hí má nyì mù, yhángmòq htoq lhûm é mû lé Yhâng chyáng shit kyô ra râ nghut lhê. 20Yhâng é târâ wàng hkunmó eq sângdang lé le, nàng, yhángmòq lé mhoq byi mù, yhángmòq hkâsu kut chyungxe dui e ló râ hkyô eq hkâsu kut nyì yàp e ló râ hkyô lé tûn shit àq. 21Hau htoq agó, shiwa byù bànshoq bang mai, Garai Gasang lé gyùq hkúngga luî, lòqhkaû lang zè a yù zô é, wó lûm gíng é, a-tsam bo é byù lé hkyin htoq yû luî, haú bang lé, rahkyîng ùp zau, rashô ùp zau, ngo xê ùp zau eq raxê ùp zau kut nhâng àq. 22Haú bang gi, hkâ-nhám le, shiwa byu pê é matú târâ jéyáng é mû wun wàq kó sháng gàq; nghut kôlhang, wuîhkê é mû hkangmó lé gi, náng chyáng yu lé lô nhâng àq; lui é mú pé lé gi, yhángmòq yhang hpyit kó sháng gàq. Haû jáng, yhángmòq gi, náng é wòlai lé bo tê bekô nghut é yánmai, náng é wòlai gi, sôm byùq berâ nghut lhê. 23Nàng gi, haú dông kut mù, Garai Gasang le haû su hkunmó hkyô é nghut jáng, nàng le wó hkam jan râ nghut mù, byù shí bang bànshoq le nhik dìk luî, yhûm wó taû ló kôrâ nghut lhê.” ga tû taî ri.
24Mosheq gi, yhâng tsâ é dang gyo mù, yhang taî é dông bànshoq kut bê nghut ri. 25Yhang gi, Isira-elaq byù bànshoq mai a-tsam bo é bang lé hkyin yù mù, haú bâng é ushuq dông, rahkyîng ùp zau pé, rashô ùp zau pé, ngo xê ùp zau pé eq raxê ùp zau pé kut nhâng bê nghut ri. 26Yhángmòq gi, hkâ-nhám le, shiwa byu pê é matú târâ jéyáng wò yu akô nghut ri. Wuîhkê é mû pé lé za, Mosheq chyáng yu jé kômù, lui é mû pé lé gi, yhángmòq yhang hpyit byî akô nghut ri.
27Hau htâng, Mosheq gi, yhâng tsa Yehtiro lé pûn kat bê nghut mù, Yehtiro gi, yhâng é yhummau má taû ló bê nghut ri.
Currently Selected:
Htoq Ló 18: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
