Htoq Ló 17

Lungmó Zîng Mai Wuì Htoq Lo É Hkyô

1Isira-elaq byù hpûng gón gi, haû Yhûmsîng Garai hkunmó hkyô é eq rajung za, Sin gâ é yòso mai htoq mù, rawò mai rawò shut htòt sô e ló kôluî, Rehpidim gâ é jang má jowò hkyô akô; nghut kôlhang, haú má, shiwa byu pê é matú shuq râ wuì a jòq nghut ri. 2Haû mù, yhángmòq gi, “Ngá-mòq lé shuq wuî byi aq.” ga Mosheq eq myíng myô lhûm akô.

Haú hkûn, Mosheq gi, “Núngmòq gi, haî mù ngo lé myíng myô akô lhú? Núngmòq gi, haî mù Yhûmsîng Garai lé chyam wú akô lhú?” ga tû taî ri.

3Nghut kôlhang, shiwa byu pé gi, haú má wuìshit bûm kômù, Mosheq lé, “Nàng gi, haî mù, ngá-mòq eq ngá-mòq é zodù wuì lé le, shigu gaunyhaû pé lé le, wuìshit shi byùq nhâng râ matú, Egutuq ming mai shuî htoq lo é lhú?” ga pùt é dang taî bum akô nghut ri.

4Haú hkûn, Mosheq gi, haû Yhûmsîng Garai lé, “Ngò gi, byù shí bang lé hkâsu kut râ lhú? Yhángmòq gi, ngo lé lùqgòk èq lháng raú dú bekô nghut ri.” ga wùt dûng ngau ri.

5Haû Yhûmsîng Garai gi, Mosheq lé, “Haû shiwa byu pê é hí má htoq ê àq; Isira-elaq byu pê é sûwún wuî ra-am lé shui mù, Nile Wuìlàng má bàt é dumbáng lé náng é lòq má chûng luî, e ló aq. 6Ngò gi, Horep bùm mâ é lungmó zîng nàm, náng é hí má yàp to râ nghut lhê. Nàng gi, lungmó zîng haú lé bàt râ nghut mù, lungmó zîng haú mai shiwa byu pé shuq râ wuì htoq lô râ nghut lhê.” ga taî ri. Haû mù, Mosheq gi, Isira-elaq byu pê é sûwún wui é myòq hí má haú dông kut bê nghut ri. 7Jowò haú má, Isira-elaq byu pé myíng myô lhum kô é yánmai le, “Haû Yhûmsîng Garai gi, ngá-mòq chyáng nyi lhê lùq, a nyi é lùq?” ga luî, Yhûmsîng Garai lé yhángmòq chyam wú kô é yánmai le, jowò haú lé Masa#17:7 Masa gâ é gi, chyam wú gâ é lichyúm nghut ri. ga le, Meriba#17:7 Meriba gâ é gi, myíng myô lhum gâ é lichyúm nghut ri. ga le myhîng akô nghut ri.

Amalek Byu Pé Lé Ung Pyâm É Hkyô

8Haû Amalek byu pé gi, Isira-elaq byu pé lé, Rehpidim jowò má lé htîm akô nghut ri. 9Haú hkûn, Mosheq gi, Yoshuq lé, “Ngá-nhûng é byù ra-am hkyin yù mù, Amalek byu pé lé majan ê zan râ matú htoq ê keq. Ngò gi, nàpmá, haû Garai Gasâng é dumbáng lé ngá lòq má chung to mù, bùm nyuq má yàp to râ nghut lhê.” ga taî ri.

10Haû mù, Yoshuq gi, Mosheq sang kat é eq rajung za, Amalek byu pé lé majan ê zân ri; haú u, Mosheq, Arun eq Hura pé gi, bùm nyuq má dòq ló akô nghut ri. 11Mosheq é lòq rû tu toq to to gi, Isira-elaq byu pé majan ung nyi akô nghut ri; nghut kôlhang, yhâng é lòq hkyô kat hkangmó, Amalek pé majan ûng ûng dùt akô nghut ri. 12Mosheq é lòq myûng lò jáng, Arun eq Hura nhik gi, lùqgòk racham wàq yù mù, yhang lé haú má zùng nhâng luî, buìwàng shoq yhâng é lòq wó jâng tu toq to sháng gàq ga, rayùq ralòq lé tu toq to byî akô nghut ri. 13Haû mù, Yoshuq gi, Amalek eq yhâng é gyèzô pé lé, sham èq wó zân ung yù bê nghut ri.

14Haû mù, Yhûmsîng Garai gi, Mosheq lé, “Ngò gi, mauhkûng ô mai Amalek é myìng lé séng yhang bùt sut pyám râ nghut é yánmai, haú hkyô lé bûn nyì râ matú laiká ding má ká luî, Yoshuq wó gyo shoq nghap kyo aq.” ga taî ri.

15Mosheq gi, hkungga gyàp ralhum saí mù, haú lé, “Yhûmsîng Garai gi, ngá é ûngmyuq donghkón.” ga myìng myhîng ri. 16Hau htoq agó, yhang gi, “Haû Amalek byu pê é lòq gi, Yhûmsîng Garaî é tángmyhâng htung shoq htuqhtíng kô é yánmai, haû Yhûmsîng Garai gi, Amalek byu pé lé, pyàt bán hkangmó majan zân nyì râ nghut lhê.” ga le taî ri.

Currently Selected:

Htoq Ló 17: znot

Highlight

Compare

Copy