Htoq Ló 16
16
Mannaq Eq Nghoqjô
1Haû Isira-elaq byù hpûng gón gi, yhángmòq Egutuq ming mai htoq lo é htâng, í hkyap hkyap raxe ngo nyí nyí má, Elim jowò mai hkyôwuì xoq so mù, Elim eq Sinaq bùm gyoro mâ é Sin gâ é yòso má lo jé akô nghut ri. 2Yòso haú má, Isira-elaq byù hpûng gón gi, Mosheq eq Arun lé pùt é dang taî bum akô nghut ri. 3Haû Isira-elaq byu pé, yhángnhik tâng lé taî bùm kô é gi, “Egutuq ming má nyì mù, haû Yhûmsîng Garaî é lòq má ru shi le gi, gè râ wá! Haú má gi, ngá-mòq, zohpoq hí má zùng mù, yhûmsîng o é zoshuq bànshoq myàng zô é nghut lhê; nghut kôlhang, núngnhik gi, byù hpûng shî bànshoq bang, yòso shî má zò-mut luî shi byùq râ matú shuî htoq lô bekô nghut ri.” gâ akô nghut ri.
4Haú hkûn, haû Yhûmsîng Garai gi, Mosheq lé, “Ngò gi, núngmòq é matú mauhkûng mai mùk wo hkyó nhâng râ nghut lhê; haú hkûn, shiwa byu pé gi, nyí wuî htoq ê mù, haú nyí é matú lùq shoq gùq yù ra râ nghut lhê. Haú dông mai, Ngò gi, Ngá é târâ lé yhángmòq cháng a châng é lé chyam wú râ nghut lhê. 5Hkyuq nyí nyí má gi, nyí wuî yhángmòq gùq nyi é htoq ratú myô gùq yù mù, hen lajâng to ra kôrâ nghut lhê.” ga taî ri.
6Haû mù, Mosheq eq Arun nhiktâng gi, Isira-elaq byu pé bànshoq bang lé, “Núngmòq gi, haû Yhûmsîng Garaî èq núngmòq lé Egutuq ming mai shuî htoq lo é hkyô lé hkû-myîn wó sé kôrâ nghut lhê; 7hau htoq agó, haû Yhûmsîng Garai lé núngmòq pùt é dang taî é lé, Yhang wó gyo byi bê nghut é yánmai, núngmòq gi, nàpkyó, haû Yhûmsîng Garaî é hpungwup shingkang lé myàng kôrâ nghut lhê. Ngá nhiktâng gi, ó wá nghut mù, núngmòq, ngá nhiktâng lé pùt é dang taî akô lhú?” ga taî akô nghut ri. 8Mosheq gi, “Núngmòq gi, haû Yhûmsîng Garaî èq, núngmòq lé, myín lé zo râ matú sho byi luî, nàpkyó lé o é myhó zo râ matú mùk byî é hkûn, Yhang nghut é lé sé kôrâ nghut lhê; haî mù gâ le, haû Yhûmsîng Garai eq sêng é lé núngmòq pùt é dang taî é lé, Yhang wó gyo bê nghut ri. Ngá nhiktâng gi, ó wá nghut ri lhú? Núngmòq gi, ngá nhiktâng lé pùt é dang taî é a nghut, haû Yhûmsîng Garai lé shèq pùt é dang taî é ru nghut lhê.” ga le taî ri.
9Hau htâng, Mosheq gi, Arun lé, “‘Haû Yhûmsîng Garai gi, núngmòq, Yhang lé pùt é dang taí kô é lé wó gyo bê nghut é yánmai, Yhâng é hí má lé keq.’ nghû, haû Isira-elaq byù hpûng gón lé taí aq.” ga taî ri.
10Haû Isira-elaq byù hpûng gón lé Arun dáng nyo nyi é u, yòso shut yhángmòq wú kat kôjáng, mhut hkaû má, haû Yhûmsîng Garaî é hpungwup shingkang lé htoq shit é lé, yhángmòq myang akô nghut ri.
11Haû Yhûmsîng Garai gi, Mosheq lé, 12“Ngò gi, Isira-elaq byu pé pùt é dang taî é lé wó gyo byi bê nghut lhê. Yhángmòq lé, ‘Núngmòq gi, mauchut zó má sho myàng zo kôrâ nghut mù, nàpkyó lé mùk gyi shoq myàng zo kôrâ nghut lhê. Haú hkûn, Ngò gi, núngmòq é Garai Gasang nghut é, haû Yhûmsîng Garai nghut é hkyô lé, núngmòq sé kôrâ nghut lhê.’ nghû taî kyo aq.” ga taî ri.
13Haû eq rajung za, haú myîn nghoqjô pé dâng lé mù, yhángmòq jowò hkyô tô é wàp má byíng zan tô ri; htang nàpkyó gi, wàp haû lhînghkyùq má nghân gyó zan to bê nghut ri. 14Nghân haû byùq ló byùq jáng, yòso myigùng htoq má gyo hkyí zo su sû é jòq tô ri. 15Haû Isira-elaq byu pé gi, haú lé myàng kôjáng, rayùq eq rayùq, “Haû gi, haí jung lhâ?” ga taî lhûm bum akô. Hkâsu mù gâ le, yhángmòq gi, haû haî nghut é lé a sé kó nghut ri.
Mosheq gi, yhángmòq lé, “Haû gi, núngmòq zo râ matú, Yhûmsîng Garai byî é mùk nghut lhê. 16‘Yùq hkangmó gi, ó le ó lùq zo myhó wê tsîng yù ra râ nghut lhê; yhûmsing é zúm má nyi tô é byù du lé nghap wú mù, rayùq é matú u-ma byé mai rabyé#16:16 U-ma byé mai rabyé gi, 18 rûng kô bo é nghut lhê. kô wê tsîng yù ra râ nghut lhê.’ ga haû Yhûmsîng Garai hkunmó hkyô tô ri.” ga taî ri.
17Haû Isira-elaq byu pé gi, taî kyô é eq rajung za kut bekô nghut ri; ra-am gi, ga-myhó wê tsîng yù; ra-am gi, shau za wê tsîng yù kut akô nghut ri. 18Yhángmòq gi, haú lé, u-ma gâ é byé èq lìk kô é hkûn, myô wê tsîng yù sû a ge myô jàt yù, shaû wê tsîng yù sû le a râ byùq kut bekô nghut ri; yùq hkangmó gi, yhûmsîng lùq zô é myhó wê tsîng yù bekô nghut ri.
19Mosheq gi, yhángmòq lé, “Ó yùq le, nàpkyó jé shoq haî a wó myhit to râ nghut lhê.” ga taî ri.
20Nghut kôle, ra-am gi, Mosheq é dang lé a gyo kó; haú bang gi, htang nàpkyó jé shoq ra-am myhit tô akô; nghut kôle, haû gi, lùq dùt byùq mù, nam byùq bê nghut ri. Haû mù, Mosheq gi, yhángmòq lé nhikjum yo bê nghut ri.
21Yhángmòq yùq hkangmó gi, nàp wuì, yhûmsîng lùq zô é myhó wê tsîng yu akô; buì htan lò jáng, haû myìt tô é gi, nyé yui byùq bê nghut ri. 22Hkyuq nyí nyí má gi, yhángmòq yùq hkangmó é matú, hí lhê htoq ratú myo shoq nghut é u-ma byé í byé byé#16:22 U-ma byé í byé byé gi, súm xe hkyuq rûng kô bo é nghut lhê. wê tsîng yu akô nghut ri; shiwa hpûng mâ é ushuq pé gi, haú hkyô lé, Mosheq chyáng lé taî kyô akô nghut ri. 23Haú hkûn, Mosheq gi, haú bang lé, “Yhûmsîng Garai taî le, ‘Nàpmá gi, bánnô yu é buìnyì nghut mù, haû Yhûmsîng Garaî é matú kut é chyoiyúng Bánno Buìnyì nghut ri. Haû mù, núngmòq búng nau é lé bung luî, kyuí nau é lé kyuí kut keq. Myìt tô é gû lé, nàpkyó jé shoq tô to keq.’ ga hkunmó hkyô ri.” ga taî ri.
24Haû mù, yhángmòq gi, Mosheq taî é eq rajung za, htang nàpkyó jé shoq tô tô akô; nghut kôlhang, haú pé gi, sau le a saû byùq, lùq le a lúng byùq nghut ri. 25Mosheq gi, “Hkû-nyí haû zo keq; haî mù gâ le, hkû-nyí gi, haû Yhûmsîng Garaî é matú Bánno Buìnyì nghut ri. Hkû-nyí, núngmòq, myigùng má haú lé myang hô kôrâ a nghut. 26Núngmòq gi, haú lé, hkyuq nyí jé shoq myang wê tsîng yù kôrâ; nghut kôlhang, nyhit nyí nyí gi, Bánno Buìnyì nghut mù, haî le lèq to râ a nghut.” ga taî ri.
27Haû nghut kôle, shiwa byù ra-am gi, haú lé ê wê tsîng yù râ matú Bánno Buìnyì má htoq e bum akô; nghut kôlhang, haî le a myàng kó nghut ri. 28Haú hkûn, haû Yhûmsîng Garai gi, Mosheq lé, “Núngmòq gi, Ngá é hkunmó pé eq Ngò mhoqshit é hkyô pé lé, hkâ-myháng jé shoq he-ngìk pyâm nyì kôrâ lhú? 29Haû Yhûmsîng Garai gi, núngmòq lé, Bánno Buìnyì byî to bê nghut é lé bûn nyì keq; haû mù shèq, Yhang gi, núngmòq lé, hkyuq nyí nyí má í nyí é matú mùk byî é nghut lhê. Nyhit nyí nyí má gi, yùq hkangmó, ó le ó nyi é jowò má nyi tô râ dùt lhê; ó yùq le a ge htoq ló.” ga taî ri. 30Haû mù, shiwa byu pé gi, nyhit nyí nyí má nô yù bekô nghut ri.
31Isira-elaq byu pé gi, mùk haú lé mannaq#16:31 Mannaq gâ é gi, Hebre htê dông, Haû gi, haí jung htà? gâ é lichyúm htoq ri. ga myhîng akô nghut ri. Haû gi, hpakkyî jí su dùt luî, hpyu é isâm htoq ri; hau htoq agó, byo-î eq nyhô tô é mùk long su ga chuî nghâm ri. 32Mosheq gi, “Haû Yhûmsîng Garai taî le, ‘Ngò, núngmòq lé Egutuq ming mai shuî htoq lô mù, yòso má núngmòq lé Ngò byi tsô é mùk lé, je lô râ núngmòq é awùt ashín pé pyàt bán hkangmó wó myâng kó sháng gàq, yhángmòq é matú, mannaq mùk u-ma byé rabyé tô to byi keq.’ ga hkunmó hkyô ri.” ga taî ri.
33Hau htoq agó, Mosheq gi, Arun lé, “Yambú ralhum yù mù, mannaq mùk u-ma byé rabyé kat luî, jé lô râ núngmòq é awùt ashín pé pyàt bán hkangmó é matú tô to byi râ dông, haû Yhûmsîng Garaî é hí má haú lé tô to keq.” ga taî ri.
34Arun gi, haû Yhûmsîng Garai mai Mosheq lé hkunmó hkyô é eq rajung za, mannaq mùk haú lé rago wó yhûm to sháng gàq ga, sàksé dò#16:34 Sàksé dò gâ é lé, Hebre má, sàksé gâ tô lhê. hí má tô to bê nghut ri. 35Isira-elaq byu pé gi, gótû byu pé nyi é maumyî jé shoq, myi xê zàn yhang mannaq mùk lé zô akô nghut ri; yhángmòq gi, Hkanan maukyo jé shoq mannaq mùk zô akô nghut ri.
36U-ma rabyé gi, ehpa ralhûm #16:36 Ehpa ralhum gi, 212 rûng kô bo ri.é xê gàmbùm ragàmbùm bo lhê.
Currently Selected:
Htoq Ló 16: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
