Htoq Ló 15

Mosheq Eq Miri-am É Jihkyang Dang

1Haú hkûn, Mosheq eq Isira-elaq byu pé mai, haû Yhûmsîng Garai lé mahkôn hkôn kô é gi,

“Ngò gi, haû Yhûmsîng Garai lé mahkôn hkôn râ nghut lhê;

hkâsu mù gâ le, Yhang gi, hpungwup bo é ûngmyuq hkyô wó bê nghut ri.

Yhang gi, myang eq myang haú má ji sû lé,

nhông haû má dú myhup pyám bê nghut ri.

2Haû Yhûmsîng Garai gi, ngá é wum-o eq ngo lé magûm Sû#15:2 Magûm Sû gâ é lé, ngá é mahkôn le wó gâ lhê. nghut lhê;

Yhang gi, ngá é hkyi yù hkyô dùt bê nghut ri.

Yhang gi, ngá é Garai Gasang nghut mù, ngò, Yhang lé hkya-on kúngtôn râ;

Yhang gi, ngá wâ é Garai Gasang nghut mù, ngò, Yhang lé hkya-on wàq toq râ nghut lhê.

3Haû Yhûmsîng Garai gi, sarhê mó nghut ri;

haû Yhûmsîng Garai gâ é gi, Yhâng é myìng nghut ri.

4Yhang gi, Hpara-uq é gyè myanglhêng pé eq yhâng é gyè jum lé,

nhông haû má dú myhup pyám bê nghut ri.

Hpara-uq je lum é zaugun wuì gi,

Nhông Nè haû má myùp byùq bekô nghut ri.

5Haû nìk é wuì gi, yhángmòq lé ûm nghop pyám bê nghut ri;

yhángmòq gi, lùqgòk cham su, nìk é wuì má myùp wang byùq bê nghut ri.

6Yhûmsîng Garai ê, Náng é lòqyo lòq gi,

hpungwup a-tsam mó lhoqhtoq shit bê nghut ri.

Yhûmsîng Garai ê, Náng é lòqyo lòq gi,

haû gye pé lé lhoqhkyop pyám bê nghut ri.

7Nàng gi, Náng é kô làm hkìkhkâm hkyo èq,

Nang lé htuqhtíng bang lé tu mhuq nghop pyám bê nghut ri.

Nàng gi, Náng é nhikmó-yo hkyô lé lhoqhtoq kat é nghut mù,

haû gi, hpoqkyuq bûm lé su yhángmòq lé lhoqjôm pyám bê nghut ri.

8Náng é nhô mai she htoq é soq gi,

wuì lé gyùt zing nhang ri.

Yui nyi é wuì gi, xêwâm su tsung shap byùq ri;

nìk é wuì gi, nhông akáng má gyám htan byùq ri.

9Haû gyè hpó nghutbun myíng mú é gi,

‘Ngò châng hkat râ; ngò, yhángmòq lé châng hkyit râ nghut lhê.

Ngò, wó lú yu lo é zè lé gàm râ;

Ngò, yhángmòq chyáng mai nhik htâng sat shoq tsîng yû râ nghut lhê.

Ngò, ngá shâm shê mù,

ngá lòq èq yhángmòq lé lhoqhtên pyám râ nghut lhê.’ gâ ri.

10Nghut kôlhang, Nàng soq mùt kat luî,

haû nhông gi, yhángmòq lé ûm nghop pyám bê nghut ri.

Yhángmòq gi, wuìgyùn mó hkaû má,

chuî hkyí su myùp wang ló byùq bekô nghut ri.

11Yhûmsîng Garai ê, hparà pé má,

Nàng sû é ó nyi ri lhú?

Ó yùq gi, Nàng su,

chyoiyúng hkyô má, kô làm hkìkhkâm mù,

hpungwup shingkang má gyùq chiq hpo mó dùt luî,

maúhpo múzó kut nyi lhê lhú?

12Nàng, Náng é lòqyo lòq lé lhâm kat luî,

haû myigùng gi, Náng é gye pé lé myhui pyám bê nghut ri.

13Nàng gi, Náng é ru gîng nyi é chyitdàp myìt mai,

Nàng hkyi yù bê a-myû lé shuî-û yù râ nghut lhê.

Nàng gi, Náng é wum-o a-tsam mai,

yhángmòq lé, Náng é chyoiyúng nyì jowò má shuî ló râ nghut lhê.

14Haû gótû a-myû wuì gi, wó gyo luî, gyùq nán bûm kôrâ nghut lhê;

Hpilisiti-a byu pé gi, hkê-nho é hpuzo kôrâ nghut lhê.

15Edom zau wuî gi, gyùq hong bùm kôrâ nghut lhê;

Moba byu pê é ushuq pé gi, gyùq nán bûm kôrâ nghut lhê;

Hkanan byu pé#15:15 Hkanan byu pé gâ é lé, Hkanan zau wuî le ge gâ lhê. gi, gyùq ngha byùq kôrâ nghut lhê.

16Yhángmòq chyáng gyùq chiq gyùq nán hpo jé râ nghut lhê.

Yhûmsîng Garai ê, Náng é a-myû wuì wó laî ló é hkûn jé shoq le,

Nàng hkyi yù bê a-myû wuì wó laî ló é hkûn jé shoq le,

Náng é lòqbú lòqyìn a-tsâm é yánmai,

yhángmòq gi, lùqgòk su zim za jòq tô nyì râ nghut lhê.

17Nàng gi, Náng é silî wunlî nghut é bùm má,

Náng é a-myû wuì lé shuî jé mù, yhángmòq lé haú má hô hkyô to râ nghut lhê;

Yhûmsîng Garai ê, jowò haû gi, Nàng nyì râ matú, Nàng saî tô é nghut ri;

Yhûmsîng Garai ê, sân-yúng jowò haû gi, Náng é lòq èq saî tô é nghut ri.

18Haû Yhûmsîng Garai gi,

ahtum abyùq ùp nyi ri.” gâ ri.

19Hpara-uq é myang jûm, gyè myanglhêng pé eq myang ji ji bang nhông hkaû má wang ló kô é hkûn, haû Yhûmsîng Garai gi, yhángmòq é ahtoq má nhông haú lé dum yui úm nhang ri; nghut kôlhang, Isira-elaq byu pé gi, nhông lé, kyuq huî é myigùng htoq mai sô lai bekô nghut ri. 20Haú hkûn, Arun é yhâng nhá, myìqhtoi myhí Miri-am gi, zìngtaú yu wàq jáng, myiwe wuì bànshoq bang gi, zìngtaú bàt uchyang mahkôn gó kôluî, yhâng htâng châng bum akô nghut ri. 21Miri-am, yhángmòq lé shuî-û hkon é gi,

“Haû Yhûmsîng Garai lé mahkôn hkôn keq;

hkâsu mù gâ le, Yhang gi, hpungwup bo é ûngmyuq hkyô wó bê nghut ri.

Yhang gi, myang eq myang haú má ji sû lé,

nhông haû má dú myhup pyám bê nghut ri.” gâ ri.

Hkô É Wuì Chuî Byùq É Hkyô

22Hau htâng, Mosheq gi, Isira-elaq byu pé lé Nhông Nè mai shuî lai luî, Shura yòso má shuî wang ló ri. Yhángmòq gi, yòso haú má sum nyí yhang sô wang ló kôlhang, wuì a myàng kó nghut ri. 23Yhángmòq gi, Mara gâ é jowò má jé kô é hkûn, haû mâ é wuì gi, hkô é yánmai, a ge shuq kó nghut ri. (Hau é yánmai, jowò haú lé gi, Mara#15:23 Mara gâ é gi, hkô ri gâ é lichyúm nghut lhê. gâ é nghut ri.) 24Haû mù, a-myû zowuî haú bang gi, Mosheq lé, “Ngá-mòq haî shuq râ lhú?” ga pùt é dang taî bum akô nghut ri.

25Haû mù, Mosheq gi, haû Yhûmsîng Garai lé wùt dûng ngau é nghut mù, haû Yhûmsîng Garai gi, yhang lé sik rajàp tûn shit ri. Mosheq gi, sik jàp haú lé wuì má dú hâng kat jáng, wuì haû gi, ge shuq é wuì dùt byùq bê nghut ri.

Haú jowò má, Yhûmsîng Garai gi, yhángmòq é matú, târâ eq cháng râ hkyô tô to mù, yhángmòq lé chyam wú ri. 26Yhang gi, “Náng é Garai Gasang nghut é, haû Yhûmsîng Garaî é htê lé rago gyo mù, Yhâng é myòq hí má díngmán é hkyô kut é eq, Yhâng é hkunmó eq târâ wàng hkunmó bànshoq lé cháng kô é nghut jáng, Ngò gi, núngmòq chyáng, haû Egutuq byu pê chyáng jé é nòlì nòjàng pé lé jé nhâng râ a nghut; hkâsu mù gâ le, Ngò gi, núngmòq lé lhoqgê byî é, haû Yhûmsîng Garai nghut lhê.” ga taî ri.

27Hau htâng, yhángmòq gi, wuìbúm raxe í búm jòq é htoq agó byùm gâm nyhit xê gàm yùq é jang, Elim gâ é jowò má ló jé kômù, haû wuì joq é nàm má jowò hkyô akô nghut ri.

Currently Selected:

Htoq Ló 15: znot

Highlight

Compare

Copy