Htoq Ló 12
12
Lhoqlhai Poî Eq Múnchi A Bo É Mùk Zo Poî
1Haû Yhûmsîng Garai mai, Egutuq ming má Mosheq eq Arun lé taî é gi, 2“Lhôhkyap shî gi, núngmòq é matú sânghî lhôhkyap nghu é, zàn wui lhê é sânghî lhôhkyap dùt râ nghut lhê. 3Isira-elaq shiwa byù bànshoq bang lé, shí hkyap raxê nyí nyí má, yhûmhtu hkangmó mâ é yùqgè wuì gi, ó le ô é yhûmhtû é matú, sau zo radu du hkyin to râ dùt lhê nghû taî kyo keq. 4Rayhûm yhûm gi, byù shau luî, sau zo ban zo râ su a dùt jáng, byù du lé nghap wú mù, yhûmsîng eq je chyâng é yhûmkyochang eq chôm zo ra râ nghut luî, sau zo radu hkyin to ra râ nghut lhê. Núngmòq yhang, byù rayùq hkâ-myhó wó zo râ má cháng luî, hkâ-î é sau zo gé râ é lé tû yù keq. 5Sau hpúng mai nghut nghut, bainám hpúng mai nghut nghut, núngmòq hkyin yù râ shigu gaunyhaú zo gi, razàn bò mù, haî le a râ é alo zo nghut ra râ nghut lhê. 6Shí hkyap raxe myi nyí nyí jé shoq haú pé lé rago nyhi to mù, haú myîn mauchut zó má, Isira-elaq shiwa byù bànshoq bang gi, haú pé lé tsing sat ra râ nghut lhê. 7Sau zo sat zô é yhûm hkangmó mâ é bang gi, sau zo sui ra-am lé yù mù, ó le ô é yhûm mâ é hkum dúnlhum tsûng í hkat eq hkumhpyo dúnlhum pyî má bùt to ra râ nghut lhê. 8Haú myîn má yhang, yhángmòq gi, sho lé myi má nyhîn nyhoq mù, hkô é mhan-haq eq le, múnchi a bo é mùk eq le, zo ra râ nghut lhê. 9Shojum lé nghut kôle, wuì má chyoq nyhoq é nghut kôle, hkâzo kó; sho lé, ulhum, hkyî pé, sing-û pé eq rahá kúm nyhîn nyhoq keq. 10Haî lé lháng, nàpkyó jé shoq hkâtô to kó; nàpkyó jé shoq myìt tô é jòq jáng gi, haú lé nyhê hkyô pyám keq. 11Haú lé, núngmòq shí dông zo ra râ nghut lhê; hpyidum má hpyihit hit to mù, hkyî má hkyî-tsung tsûng to luî, lòq má dumbáng chung to mù zo keq. Hân hân zo keq; haû gi, Yhûmsîng Garaî é Lhoqlhai Poî nghut lhê.
12Hkâsu mù gâ le, haú myîn má yhang, Ngò gi, Egutuq ming gón sô lai luî, byu pê é zo-mún hkangmó eq shigu gaunyhaû pê é sânghi gyó é shigu gaunyhaú hkangmó lé sat pyám luî, Egutuq byu pê é hparà pé bànshoq lé jéyáng râ nghut lhê. Ngò gi, haû Yhûmsîng Garai nghut lhê. 13Sui haû gi, núngmòq nyi é yhûm má, núngmòq é matú masàt lhô dùt râ nghut mù, Ngò gi, sui haú lé myàng jáng, núngmòq lé lhaî to râ nghut lhê. Haû Egutuq ming lé, Ngò dam mó byî é hkûn, lhoqhten lhoqhpyoq é dam gi, núngmòq lé wó záng râ a nghut.
14Shî gi, núngmòq myìtbûn nyì râ buìnyì nghut mù, pyàt pyàt zaí zaí é matú hkyô tô é hkunmó nghut luî, núngmòq gi, jé lô râ pyàt bán pé má, haú lé, Yhûmsîng Garaî é matú poî kut nyî ra râ nghut lhê. 15Núngmòq gi, nyhit nyí yhang, múnchi a bo é mùk zo ra râ nghut lhê. Sânghî nyí mai yhang, núngmòq yhûm mâ é múnchi lé huî sêng pyám ra râ nghut lhê; hkâsu mù gâ le, sânghî nyí mai nyhit nyí jé shoq, múnchi bo é haî zo sû lé nghut kôle, Isira-elaq a-myû mai chyung hpyit pyám râ nghut lhê. 16Sânghî nyí gi, chyoiyúng zùphpong hpong ra râ nghut lhê; nyhit nyí nyí le, chyoiyúng sân-yúng é zùphpong hpong ra râ nghut lhê. Buìnyì haú pé má, yùq hkangmó zo râ zoshuq hen é mai lai luî, gótû mú haî le hkâkut kó.
17Haû Múnchi a bo é Mùk Zo Poî lé kut nyî keq; haî mù gâ le, haú nyí má yhang, Ngò, núngmòq byù hpûng mó lé Egutuq ming mai shuî htoq lo é nghut lhê. Haû mù, shí nyí lé, jé lô râ pyàt bán pê é matú pyàt pyàt zaí zaí hkyô tô é hkunmó nghut é eq rajung za, poî kut nyî keq. 18Núngmòq gi, sânghî lhôhkyap raxe myi nyí nyí myín mai í xe ra-nyí nyí myín jé shoq múnchi a bo é mùk zô nyì ra kôrâ nghut lhê. 19Nyhit nyí yhang, núngmòq é yhûm pé má múnchi a ge jòq râ nghut lhê. Byù bíng nghut nghut, haú mau má hku é byù nghut nghut, múnchi bo é mùk zô é sû ó yùq lé nghut kôle, Isira-elaq byù hpûng mai chyung hpyit pyám râ nghut lhê. 20Múnchi kat mù saî é haî le hkâzo kó. Núngmòq hká má nyi to kôle, múnchi a bo é mùk lé za zo ra kôrâ nghut lhê.” gâ ri.
21Haû mù, Mosheq gi, Isira-elaq byu pê é sûwún wuî bànshoq lé ji yù mù, yhángmòq lé, “Radá dâm ló mù, ó le ô é yhûmhtu é matú sau zo ló hkyin yù luî, Lhoqlhai Poî sau zo ló sat keq. 22Husop#12:22 Husop gi, ahpup hpup zo zâ é agàm nghut lhê. kyâng rading zo yù mù, lànghkang má kat tô é sui má jum yù luî, hkumhpyo dúnlhum pyî má le, hkum dúnlhum tsûng í hkat má le tsing bùt to keq. Núngmòq ó yùq le, nàpsûn jé shoq, núngmòq é yhûm hkum shinggan má ge htoq ê râ a nghut. 23Haû Yhûmsîng Garai gi, Egutuq byu pé lé cháng sat râ ga, ra-ming gón má sô lhing wún é hkûn, hkumhpyo dúnlhum pyî eq hkum dúnlhum tsûng í hkat mâ é sui lé myàng jáng, hkum haú lé lhaî to mù, laî ló râ nghut lhê; haú dông, Yhang gi, haû lhoqhten lhoqhpyoq sû lé, núngmòq é yhûm pé má, núngmòq lé wang sat pyám râ ahkáng byi râ a nghut.
24Núngmòq é matú eq núngmòq é awùt ashîn pê é matú, pyàt pyàt zaí zaí hkyô tô é hkunmó dông, mhoq kyô é hkyô shí pé lé châng kut keq. 25Haû Yhûmsîng Garai mai danghtum htûm tô é eq rajung za, Yhang, núngmòq lé byi râ nghut é maumyî má, núngmòq wang ló kô é hkûn, kut râ htûngli shî lé châng kut nyî keq. 26Núngmòq é zodù wuì mai núngmòq lé, ‘Htûngli shi é lichyúm gi, haî nghut lhê lhú?’ ga myî lò kôjáng, 27yhángmòq lé, ‘Haû Yhûmsîng Garaî èq Egutuq byu pé lé shî dam byî é hkûn, ngá-nhûng é yhûm pé lé lhoqlhut to mù, Egutuq ming mâ é Isira-elaq byu pê é yhûm pé lé wú lhaî tô é Yhûmsîng Garaî lé nhông byî é Lhoqlhai Poî hkungga nghut lhê.’ nghû taî kyo keq.” ga taî ri. Haú hkûn, shiwa byu pé gi, ngóm gòp luî, noqkuq akô nghut ri. 28Isira-elaq byu pé gi, ló mù, haû Yhûmsîng Garai mai Mosheq eq Arun lé hkunmó hkyô é eq rajung za châng kut bekô nghut ri.
29Myín gùnggàm lé, haû Yhûmsîng Garai gi, hkóhkâm tángmyhâng má zung tô é Hpara-uq é yhang zo zo-mún mai, kyum hut huî tô é htóng byu é yhang zo zo-mún jé shoq eq, shigu gaunyhaú bànshoq mâ é, sânghi gyó é shigu zô pé nghut é, Egutuq ming má sânghi hku é gyó é bànshoq lé sat pyám bê nghut ri. 30Hpara-uq eq yhâng é zaugun wuì bànshoq le, Egutuq byu pé bànshoq bang le, myín lé toq lô kô é hkûn, yhûm hkangmó má byù rayùq hkâlháng a shi é a bò kô é yánmai, Egutuq ming má ngaù hkyûng ngaù yáng mó huî nyi bùm bekô nghut ri.
Egutuq Ming Mai Htoq Ló É Hkyô
31Myín lé yhang, Hpara-uq gi, Mosheq eq Arun lé ji yù mù, “Toq ló keq! Núngnhik le, Isira-elaq byu pé le, ngá é byu pê chyáng mai htoq ló byùq keq! Núngnhik taî é eq rajung za, haû Yhûmsîng Garai lé ê noqkuq keq. 32Núngnhik taî é eq rajung za, núngmòq é sau bainám pé eq no myang pé lé she chûng mù, htoq ló keq. Ngo lé le shimân byî to hkó keq.” ga taî ri.
33Haû Egutuq byu pé gi, “Núngmòq a htoq ló byùq é nghut jáng, ngá-mòq bànshoq bang shi byùq râ dùt ri.” ga taí kômù, yhángmòq é ming mai hân htoq ló byùq râ matú, shiwa byu pé lé taî shi-kùt akô nghut ri. 34Haû mù, shiwa byù haú bang gi, múnchi a kat shî é mùk jum htung lé yu chûng kô é htoq agó, mèbû èq yùp tô é mùk nyhó bó líng lé le wàq chung akô nghut ri. 35Haû Isira-elaq byu pé gi, Mosheq mhoq kyô é eq rajung za, Egutuq byu pé lé, ngùn hîng zèhkoq eq mèbu pé dûng akô nghut ri. 36Haû Yhûmsîng Garai gi, shiwa byu pé lé, Egutuq byu pé mai byi naû râ matú myòqdong wó nhang é nghut mù, Egutuq byu pé gi, yhángmòq haî dûng le haî byi bekô nghut ri; haû mù, yhángmòq gi, Egutuq byu pê chyáng mai zè wó hkyom lú chûng bekô nghut ri.
37Haû Isira-elaq byu pé gi, Ramese wà mó mai Suhkut wà shut e ló bekô nghut ri. Myiwe zoshâng wuì lé a nghap lhôm é za, hkyô sô é yùqgè wuì baú hkyuq sen kô bo ri. 38Gótû byù myû myo myo le, sau bainám hpúng mó pé eq no myang hpúng mó pé le, yhángmòq eq rahá bo châng dòq e ló akô nghut ri. 39Haû Isira-elaq byu pé gi, Egutuq ming mai yhángmòq wun htoq lo é mùk jum lé, múnchi a bo é mùk bûng htoq yu akô nghut ri. Haû gi, yhángmòq lé Egutuq ming mai hkat hkyut htoq kat kô é nghut luî, yhángmòq é matú zoshuq hên râ ahkyíng a wó byùq kô é yánmai nghut ri.
40Haû Isira-elaq byu pé, Egutuq ming má nyi é ahkyíng zànwut gi, 430 zàn nghut ri. 41Haû 430 zàn lo byíng é buìnyì má yhang, Yhûmsîng Garaî é byù ajùm ayò bànshoq gi, Egutuq ming mai htoq lo akô nghut ri. 42Egutuq ming mai yhángmòq lé shuî htoq lô bê nghut mù, haú myîn gi, haû Yhûmsîng Garaî èq yhángmòq lé wú zúng byî é myìn nghut ri; haú myîn gi, jé lô râ Isira-elaq byu pê é pyàt bán pé má, Yhûmsîng Garai lé myìtbun hkúnggâ nyì râ é myìn nghut nyi ri.
Lhoqlhai Poî Eq Sêng É Târâ Pé
43Haû Yhûmsîng Garai gi, Mosheq eq Arun lé, “A-ô mâ é târâ pé gi, Lhoqlhai Poî zoshuq é matú nghut lhê.
Haú lé, gótû byù myû wuì ge zo râ a nghut. 44Núngmòq wui hpyit yû bê jùn ó yùq nghut kôle, ahpyo-kuq hpyit é hkam yù bê htâng má gi, haú lé ge bo zo râ nghut lhê. 45Nghut kôlhang, lé byam nyi é sû eq langchyáng gi, haú lé ge bo zo râ a nghut.
46Zoshuq haú lé, yhúmhkaû má za ge zo râ nghut lhê; sho ra-tsuí lé lháng yhûm shinggan má a ge yu htoq; showui rahkat le hkâ lhoqhkyui kó. 47Isira-elaq byù hpûng lhúnglhâng bang gi, poî haû kut ra râ nghut lhê.
48Núngmòq chyáng lé nyi tô é gótû byù myû wuì mai, haû Yhûmsîng Garaî é Lhoqlhai Poî kut nau é nghut jáng, yhâng é yhûmbyù wuì mâ é yùqgè wuì bànshoq bang ahpyo-kuq hí hpyit ra kôrâ nghut lhê; haú hkûn shèq, yhang gi, haú mau má hku é byù rayùq su wó bo lòm râ nghut lhê. Ahpyo-kuq a hpyit é byù rayùq le, haú lé ge zo râ a nghut. 49A-myû hkaû mâ é su matú le, núngmòq chyáng lé nyi nyi é gótû byù myû wui é matú le, târâ gi, rajung za chûng ra râ nghut lhê.” ga taî ri.
50Haû Isira-elaq byù lhúnglhâng bang gi, Yhûmsîng Garai mai Mosheq eq Arun lé hkunmó hkyô é eq rajung za kut bekô nghut ri. 51Haú nyí má yhang, haû Yhûmsîng Garai gi, Isira-elaq byù hpûng mó ajùm ayò lé, Egutuq ming mai shuî htoq lô bê nghut ri.
Currently Selected:
Htoq Ló 12: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
