Htoq Ló 13

Zo-mún Lé Lhoqsan Lhoqyúng É Hkyô

1Haû Yhûmsîng Garai gi, Mosheq lé, 2“Isira-elaq byu pê chyáng mâ é, byù nghut nghut, shigu gaunyhaú nghut nghut, sânghi hku é bànshoq lé, Ngá é matú lhoqchyoi lhoqyúng to keq; haú pé gi, Ngá é nghut lhê.” ga taî ri.

3Haû mù, Mosheq gi, shiwa byu pé lé, “Jùn dut nyi é mau, Egutuq ming mai núngmòq htoq lo é buìnyì shî lé myìtbûn nyì keq; haî mù gâ le, haû Yhûmsîng Garai gi, wum-o a-tsam mó bo é lòq èq núngmòq lé haû mai shuî htoq lo é nghut ri. Múnchi bo é haî le ge zo kôrâ a nghut. 4Abi lhôhkyap#13:4 Abi lhôhkyap gi, ngá-nhûng é sum hkyap hkyap eq myi hkyap hkyap gyoro lé gâ lhê. mâ é hkû-nyí yhang, núngmòq htoq lô bekô nghut ri. 5Haû Yhûmsîng Garai gi, nang lé byi râ ga, náng é îchyí îwâ pé lé dâkam tô é, no-naú eq byo-î yui é maumyî nghut é, haû Hkanan byù, Hiti byù, Amori byù, Hiwi byù eq Yebusi byu pé nyi é mau má, nang lé shuî ló é hkûn, nàng gi, lhôhkyap shí má, htûngli shî lé châng kut nyî ra râ nghut lhê. 6Nyhit nyí yhang, múnchi a bo é mùk zo luî, nyhit nyí nyí má haû Yhûmsîng Garai lé poî kut byi ra râ nghut lhê. 7Haû nyhit nyí gyoro má múnchi a bo é mùk zo ra râ nghut lhê; múnchi kat é haî le, náng chyáng ge myàng nhâng râ a nghut; náng é maukyo hkaû hká jowò má le, múnchi ge jòq râ a nghut. 8Haú nyí lé, nàng gi, nungzo lé, ‘Ngò shí hkyô kut é gi, ngò, Egutuq ming mai htoq lo é hkûn, haû Yhûmsîng Garaî èq ngo lé kut byî laî lo é hkyô pê é yánmai nghut lhê.’ nghû taî kyo aq. 9Htûngli shî kut é gi, haû Yhûmsîng Garaî é târâ, náng é nhutwuî má dàp nyì râ matú, náng é lòq má bo tô é alhô agàn su le, náng é ngelang má dàp tô é nhaû pun masàt su le dùt nyì râ nghut lhê. Hkâsu mù gâ le, haû Yhûmsîng Garai gi, Yhâng é wum-o a-tsam mó bo é lòq èq, nang lé Egutuq ming mai shuî htoq lô bê nghut ri. 10Nàng gi, hkyô tô é hkunmó shî lé, hkyin masàt tô é ahkyíng má, zàn wuì kut nyî ra râ nghut lhê.

11Nang lé byi râ ga, nang lé le, náng é îchyí îwâ pé lé le dâkam tô é, Hkanan byu pê é mau má, haû Yhûmsîng Garai, nang lé shuî wang ló é hkûn, 12zoyhûm hkangmó mâ é yùqzo zo-mún lhúnglháng lé, haû Yhûmsîng Garai lé àp byi râ dùt lhê. Núngmòq é shigu gaunyhaú mâ é sânghi shuî é alo zo bànshoq gi, Yhûmsîng Garai eq sêng lhê. 13Sânghi shuî é loze zo du hkangmó lé gi, sau zô èq htaî hkyi htoq yû ra râ nghut lhê; nghut kôlhang, nàng a htaî hkyi htoq yu é nghut jáng, haú dû é lìngzing lé ne hkyuî pyám aq. Núngmòq é yùqzo zo-mún hkangmó lé htaî hkyi htoq yû ra râ nghut lhê.

14Jé lô râ buìnyì pé má, nungzô èq nang lé, ‘Shî gi, hai lichyúm lhú?’ ga myî lò jáng, nàng gi, yhang lé, ‘Haû Yhûmsîng Garai gi, wum-o a-tsam mó bo é lòq èq, ngá-nhúng lé, jùn kut nyi é mau nghut é, Egutuq ming mai shuî htoq lo é nghut lhê. 15Hpara-uq myìt htan zing to mù, ngá-mòq lé a nhâng kut tô é hkûn, haû Yhûmsîng Garai gi, Egutuq ming má, yùqzo zo-mún pé eq sânghi shuî é shigu gaunyhaú zo alo pé bànshoq lé sat pyâm é nghut lhê. Haû nghut é yánmai, ngò gi, haû Yhûmsîng Garai lé, sânghi shuî é shigu gaunyhaú alo zo hkangmó nhông byî é nghut lhê; nghut kôle, ngá é yùqzo zo-mún hkangmó lé gi, htaî hkyi htoq yû ra râ nghut lhê.’ nghû taî kyo aq. 16Haû gi, ngá-nhúng lé, haû Yhûmsîng Garai, Yhâng é wum-o a-tsam mó bo é lòq èq Egutuq ming mai shuî htoq lo é yánmai, náng é lòq má alhô agàn su le, náng é ngelang má azòng su le dùt râ nghut lhê.” ga taî ri.

Nhông Nè Laî Byìt É Hkyô

17Haû a-myû wuì lé Hpara-uq htoq ló nhang é hkûn, Garai Gasang gi, Hpilisiti mau mai hkyô chyáng kôlhang, yhángmòq lé haú hkyô dông a shuî ló nghut ri. Hkâsu mù gâ le, “Yhángmòq gi, majan ló htûng hui jáng, myìt lhîng mù, Egutuq ming má dum taû ló kó âbe.” ga Garai Gasang taî ri. 18Haû mù, Garai Gasang gi, a-myû haú bang lé, Nhông Nè shut e ló é yòso mai shuî lhing e ló ri. Isira-elaq byu pé gi, Egutuq ming mai htoq lô kô é hkûn, gyè zan shâm lhâm bo bum akô nghut ri.

19Mosheq gi, Yosep èq Isira-elaq byu pé lé dâkam to nhâng bê nghut luî, Yosep é showui lé yu chung ri. Yosep gi, yhángmòq lé, “Garai Gasang gi, núngmòq lé teng za lé garúm yû râ nghut lhê; haú hkûn, núngmòq gi, shí jowò mai ngá é showui lé yu chûng ra râ nghut lhê.” ga taî to hkô ri.

20Yhángmòq gi, Suhkut mai htòt luî, yòso yàm mâ é Ehtam gâ é jang má jowò hkyô akô nghut ri. 21Yhángmòq gi, nyí lé, myín lé, hkyôwuì wó xoq sô nyì râ matú, haû Yhûmsîng Garai gi, nyí lé, yhángmòq é hkyôwuì má mhuthtui zìng mó lé hkyô hí nhâng mù, myín lé, myòqmyàng nhâng râ matú myi zîng mó lé hkyô hí nhang ri. 22Nyí lhê é mhuthtui zìng nghut nghut, myín lhê é myi zìng mó nghut nghut, a-myû haú bâng é hí mai a byùq ló nghut ri.

Currently Selected:

Htoq Ló 13: znot

Highlight

Compare

Copy