Lagyo 20

Makedoni Mau Eq Grik Mau Dông Laî Ló É U Lhê Hkyô

1Haû gabyông é hkyô zîm byùq é htâng má, Poluq gi, chángzô pé lé ji yù luî, yhángmòq lé wum byi dang taî to mù, shi-kyâm to luî, Makedoni mau shut htoq e ló bê nghut ri. 2Yhang gi, haú mau mai sô laî ló uchyang, byu pé lé wum byî é dang myo myo taí luî, Grik mau má ló jé bê. 3Yhang haû má lha-mó sum hkyap nyi yù mù, lhaî ji luî Suriq mau shut ê râ hen nyi é hkûn, Yudaq byu pé gi, yhang lé gyám nyî kô é yánmai, yhang gi, Makedoni mau dông taû lò râ lé myìt hpyit bê nghut ri. 4Yhang eq rabyìn za châng é bang gi, Bere‑a wà mó mâ é Puru yhang zo Sopata, Htesaloni wà mó mâ é Arisitakuq eq Sekundu nhik, Deribe wà mó mâ é Ge‑u, Timohti, Asi-a mau mâ é Tuhkiku eq Trohpimu nhik pé nghut akô. 5Yhángmòq gi, hí so láng luî, ngá-nhik lé Tro‑a wà mó má ló láng nyi akô. 6Nghut kôlhang, ngá-nhik gi, Azuma Poî#20:6 Múnchi a bo é Mùk zo Poî lé, Azuma Poî le gâ lhê. laî é htâng má, Hpilipi wà mó mai lhaî jî ló le, ngo nyí nghû jáng, Tro‑a wà mó má yhángmòq lé hui luî, haú má nyhit nyí chôm nyi é nghut lhê.

Tro‑a Wà Má, Utuhku Ga Sû Lhoqtui Toq Huî É Hkyô

7Rabàt é sânghî nyí lé, ngá-mòq gi, mùk hpê gàm râ matú lé chôm zùp zîng tô é hkûn, Poluq gi, htang nyí ló byùq râ ga hen tô é yánmai, chángzô pé lé gùnggàm jé shoq hko kyô nyi ri. 8Ngá-mòq zùp zîng nyi é haû ahtoq pyâm wàp má, myibung myo myo le dùq tô ri. 9Poluq dáng nyo hing nyi é u lé, Utuhku gâ é zorâm zo rayùq gi, hkohot hkum yâm má yhupmui zung tô ri. Haú yùq gi, yhupmó myí byùq luî, yhûm sum tsáng mai byìt gyó mù, yhang lé bún toq wú le shi byùq bê nghut ri. 10Haú hkûn, Poluq gi, gyó ló mù, po ngòp to luî, “Hkâdân kó, yhang soq bo ashî.” ga taî ri. 11Haû mù, yhang gi, dum taû dòq ló luî, mùk lé hpé mù, zo luî, maubó shoq yhángmòq eq dáng nyo kún mù htoq ló bê nghut ri. 12Zorâm zo haû lé duì gù shuî ló kômù, nhiktîng é gyai yhang hui bekô nghut ri.

Tro‑a Wà Eq Melitu Wà Gyoro Mâ É Hkyôwuì

13Poluq gi, myì hkyô ló râ matú hen tô é yánmai, yhang lajang byî é eq rajung za, yhang lé Asu wà má lhaî lhom shuî ji râ matú, ngá-mòq gi, lhaî ji mù hí ló láng bê nghut lhê. 14Haû mù, yhang gi, Asu wà má ngá-mòq eq hui luî, ngá-mòq gi, yhang lé lhaî má shuî jî chûng mù, Mitulene wà mó shut e ló bê. 15Htang nyí, ngá-mòq gi, haû mai lhaî ji mù, Ki‑u zinlóng yâm mai laî ló luî, hau htang nyí gi, Samu zinlóng má laî dàp ló mù, htang nyí gi, Melitu wà mó má jé ló bê nghut lhê. 16Poluq gi, wó dùt é nghut jáng, Penteko-ti buìnyì lé Yerusalem wà mó má wó jé shoq gâ é yánmai, Asi-a mau má buìnyì a kâm lhoqhtum naù mù luî, Ehpesu wà mó lé lhaî pyâm to râ matú, myìt hpyit to bê nghut ri.

Ehpesu Hpúng Sûwún Wuî Lé, Poluq Shi-kyâm Tô É Dang

17Poluq gi, Melitu wà mó mai Ehpesu shut byù nhang kat luî, hpúng sûwún wuî lé ê jî nhang ri. 18Haú bang jé lé kôjáng, yhang yhángmòq lé taî é gi, “Ngò, Asi-a mau má sânghi jé é buìnyì mai, núngmòq eq hkâsu kut nyi nyi é ahkyíng bànshoq lé le; 19Yudaq byu pé jèq hô luî, ngò wuîhke jamjau hui zo kôlhang, haû Yhûmsing é múzó lé, ngò myìt gyai lhoqnyhum é eq ngaùbyi ngaùnhap é èq wùn wàq é hkyô lé le; 20núngmòq é matú a-kyû bo é hkyô bànshoq lé, a myhit to loshoq taî é hkyô lé le; shiwa byu pê hí eq rayhûm htâng rayhûm má ngò núngmòq lé mhoqshit é hkyô lé le; 21ngò gi, Yudaq byu pé eq Grik pé lé, myìt lhîng mù Garai Gasâng chyáng lhing lò râ eq, ngá-nhûng é Yhûmsîng Yesuq lé lùmjíng râ hkyô lé, sàksé hkâm kyo lùgù nghut bê lé le, núngmòq sê nyi akô.

22Ahkuî, ngò gi, Sô má tuî tô é hui bê yánmai, Yerusalem wà mó má e ló lhê; haú má, ngò haî ló dùt râ lé kúm gi, a sé nghut ri. 23Ngò gi, htóng eq wuîhke jamjau hkyô ngo lé láng tô ri ga, wà hkangmó má Chyoiyúng So èq lhoqpûn é hkyô lé za sê nyi lhê. 24Nghut kôlhang, ngò gi, dìn râ hkyô ban dìn râ eq, Garai Gasâng jeju eq sêng é gabú danglù lé sàksé hkám râ matú, Yhûmsîng Yesuq ngo lé byî tô é múzó lé ban wùn wàq râ za nghut jáng, ngá chyungxe lé ra-tsuí le a myìt ha lô é nghut lhê.

25Garai Gasâng é mîngdán hkyô lé hko kyô wún é hkûn, ngò eq huî é núngmòq lhúnglhâng bang gi, htângnùng má ngo lé a myàng lo kôrâ nghut é lé, ahkuî ngò sê to bê. 26Haû mù luî, ó yùq nghut kôlhang, yubàk mara má shi byùq ló é nghut le, haú yùq é sui chyîn gi, ngò má a dàp lô é hkyô lé, hkû-nyí, ngò sàksé hkâm tô lhê. 27Hkâsu mù gâ le, Garai Gasang ô nau é hkyô bànshoq núngmòq lé hko kyo râ matú, ngò zaú tô é hkyô a jòq wú é yánmai nghut lhê. 28Núngmòq gi, yhûmsing gùng lé le, núngmòq lé Chyoiyúng So èq ùpzúng nhang é sau hpúng#20:28 Sau hpúng gâ é gi, lùmjíng é bang lé gâ lhê. lhúnglháng lé le, zúng nyî keq. Garai Gasang Yhâng suî èq wui tô é noqkuq hpúng lé le, rém zúng nyî keq. 29Ngò ló byùq é htâng má, sau hpúng lé a shogyô é, ashop é wàmhkui gi, núngmòq chyáng jé râ nghut é hkyô lé, ngò sê lhê. 30Hau htoq agó, chángzô pé lé wó mhoq hpyoq yû shoq ga, shut é dông taî é byu pé lháng núngmòq chyáng mai htoq lô râ nghut lhê. 31Haû mù luî, núngmòq yùq hkangmó lé, ngò sum zân yhang ngaùbyi ngaùnhap eq nyí myín a hkying loshoq, lhoqpun lhoqkyîng tô é dang pé lé, núngmòq gi, myìtbun mù machyâ nyì keq.

32Ahkuî, ngò gi, núngmòq lé, Garai Gasâng chyáng le, núngmòq lé wó lhoqging lhoqtíng mù, lhoq chyoiyúng é hui bê bang eq núngmòq lé silî wunlî wó byî é, Yhâng é jeju mungdang má le, àp tô lhê. 33Ngò gi, ó yùq é hîng, ngùn, mèbu pé lé le a myòqnòq wú. 34Ngá é lòq shî í lòq gi, ngò eq ngá htâng châng é bang ra châ é lé kut byi bê hkyô lé, núngmòq yhang sé gû nghut lhê. 35Ngò kut é múzó bànshoq gi, núngmòq é alìk dùt bê nghut luî, shî su kut shi-kùt é dông mai, ngá-nhúng gi, wum-o nyhóm bang lé htuqbáng luî, ‘Lhom yu é htoq má byî é gi, je riyhang hkungsô wó nyi ri.’ ga luî, Yhûmsîng Yesuq taî é dang lé bûn nyì sháng.” gâ ri.

36Poluq gi, haû su ga ban taí jáng, hkyîhput htuq mù, yhángmòq lhúnglhâng bang eq rahá za kyûdûng ri. 37Yhángmòq lhúnglhâng bang gi, yhang lé po to luî, bo-puq puq mù, chôm ngau akô. 38Htâng nùng má, yhang lé dum myàng râ a nghut lo gâ é dang yánmai, yhángmòq gi, je riyhang yón kuq bum akô. Yhang lé, lhaî má jé shoq lé châng dé kat akô nghut ri.

Currently Selected:

Lagyo 20: znot

Highlight

Copy