Lagyo 19

Poluq, Ehpesu Wà Mó Má Nyi U Lhê Hkyô

1Ahkuî, Apolo gi, Korinhtuq wà mó má nyi tô é hkûn, Poluq gi, mau káng mai sô laî ló mù, Ehpesu wà mó má jé ri. Haú má, yhang gi, chángzô pé ra-am eq hui luî, 2yhángmòq lé, “Núngmòq gi, lùmjíng é hkûn, Chyoiyúng Sô lé, wó yû bekô lhú?” ga myî ri.

Haú hkûn, yhángmòq gi, “Chyoiyúng Sô nyi lhê gâ é lháng, ngá-mòq a wó gyô wú.” ga tû taî akô.

3Haû mù, Poluq gi, “Haû nghut jáng, núngmòq gi, haí jung baptisima hkam yù kô é lhú?” ga luî, yhángmòq lé myi jáng, yhángmòq gi, “Yohan é baptisima hkam yu é nghut lhê.” ga tû taî akô.

4Haú hkûn, Poluq gi, “Yohan é baptisima nghu é gi, myìt lhîng mù wuìmyhup hkâm yu é hkyô lé gâ lhê. Yohan gi, yhâng é htâng má jé lé râ sû, haû Yesuq lé shèq lùmjíng râ lhê ga shiwa byu pé lé taî ri.” ga taî ri. 5Yhángmòq gi, dang haû lé wó gyo kôjáng, Yesuq é myìng lang luî baptisima byî é lé, hkam yu bum akô. 6Poluq gi, yhángmòq é htoq má lòq ke byi jáng, haû Chyoiyúng Sô gi, yhángmòq htoq má jé lé mù, yhángmòq gi, làklaí dáng nyo lo é htoq agó myìqhtoi le htoî lo bum akô. 7Haú bang lhúnglháng gi, yùqgè raxe í yùq kó nghut ri.

8Hau htâng, Poluq gi, târâjong má wàng luî, gyùq kyûm myìt a bo é za lha-mó sum hkyap Garai Gasâng é mîngdán hkyô lé taî sân kyo mù, lhoqpun lhoqkyîng yu ri. 9Nghut kôlhang, ra-am gi, myìt htan lo bùm kôluî a kâm lùmjíng kô é htoq agó, haû Yhûmsing é Hkyô lé byu pê hí má lhoqhpoî pyám byi kôjáng, Poluq gi, yhángmòq chyáng mai htoq luî, chángzô pé lé shuî chûng mù, Turanu gá su é hpàqchyî mhoq jong má, nyí wuî taî sân kyô lhûm nyi akô. 10Haû su kut í zân yhang mhoqshit nyi é yánmai, Asi-a mau gón mâ é Yudaq byu pé eq Grik pé lhúnglhâng bang gi, Yhûmsing é mungdang lé wó gyô yu bum akô nghut ri.

Sikewa É Yhang Zo Nyhit Yùq É Hkyô

11Garai Gasang gi, Poluq é lòq dông làklaí alhô agàn kut ri. 12Haû mù, Poluq chyáng mâ é hpajèt eq hpyihit rajung jung lé, nò bâng chyáng yu ló mù, ló záng byi jáng lháng, yhángmòq é nòhpyo ge ló byùq é eq, agè ashop é nàt pé le yhángmòq chyáng mai htoq ló byùq bum akô.

13Haú u lé, nàt hkat htoq wún é Yudaq byu pé ra-am gi, agè ashop é nàt pé lé, “Poluq hko taî é Yesuq é myìng mai, ngò, núngmòq lé hkat htoq lhê.” ga, agè ashop é nàt wang júng to bâng é ahtoq má, Yhûmsîng Yesuq é myìng lé lang luî, hkat chyam wú akô. 14Sikewa gâ é, Yudaq hkyangjong agyì rayùq é yùqzo nyhit yùq le haû su kut wún akô. 15Ra-nyí lé, agè ashop é nàt gi, yhángmòq lé, “Yesuq lé ngò sê lhê; Poluq é hkyô lé le ngò sê lhê; nghut kôlhang, núngmòq gi, ô pé nghut akô?” ga tû taí mù, 16agè ashop é nàt haû wang júng é byù gi, yhángmòq htoq má byam dòq jî to luî, nhuq bàt yû mù yhángmòq lé ung pyâm ri. Yhángmòq gi, yhûm haû mai gùngchîn sui nê yàng yàng hpang htoq ló bekô nghut ri.

17Haú hkyô lé, Ehpesu wà mó má nyi é Yudaq byu pé eq Grik pé sé kôjáng, yhángmòq lhúnglhâng bang gi, chôm gyô gyùq bum akô. Yhûmsîng Yesuq é myìng gi, hkya-on lhoqtoq é hui bê nghut ri. 18Lùmjíng bê bang myo myo gi, lé mù, yhûmsîng kut shut é agè ashop é hkyô lé, myo myô hí má yín yu akô. 19Myòqheq hpàqchyî kut zô é bang le, yhángmòq é laiká lé yu lé kôluî, shiwa byu pê hí má nyhê hkyô pyâm akô. Maùsau haú pê é ahpau lé sôn wú le, ngùn chap ngo mun záng ri. 20Haú dông mai, haû Yhûmsing é mungdang gi, kô lam lò mù, wum-o a-tsam je bo lò bê nghut ri.

Ehpesu Wà Mó Má Gabyông É Hkyô

21Shí pé ban dùt laî htâng má, Poluq gi, Makedoni mau eq Ahkai-a mau dông sô laî ló mù, Yerusalem wà mó má ló jé râ ga myìt hpyit yû luî, “Haú má ló jé tô é htâng má, ngò, Romaq wà mó má le, jé wú râ dùt ashî.” ga taî ri. 22Haû mù, yhang lé htuqbáng garúm é Timohti eq Erasitu nhik lé hí Makedoni mau shut nhang kat luî, yhang gi, Asi-a mau má rayòq rabun zo nyi gyó tô ri.

23Haú yòq lé, haû Yhûmsing é Hkyô yánmai gyai yhang gabyông lo bum akô. 24Demetri gâ é ngùn bàt zo sû rayùq gi, Aritemi hpara é ngùn yhûm zòng zo saí luî, mû saí luzúm wuî lé wó sùt nhang nyi ri. 25Yhang gi, yhâng é ngùn bàt zo luzúm wuî eq haú jung amû kut é góbang lé le ji tsîng to mù, taî é gi, “Luzúm wuî ê, múzó shí lhûm é yánmai, ngá-nhúng nyì ngón yùqyo nyi é hkyô lé, núngmòq sê lhê. 26Nghut kôle, ahkuî gi, Ehpesu wà mó má za le a nghut lo, Asi-a mau lháng alùq jàm shoq, byu lòq èq saî é zè lé, garaî pé a nghut ga, shî Poluq ga sû mai byù myo myo lé mhoq hpyoq yû mù, hkyô shuî lhoqnghoq nyi é hkyô lé, núngmòq wó myâng, wó gyô nyi akô. 27Haû mù luî, ngá-nhûng é múzó shî gi, hpoî byùq râ lé chiq râ é za a nghut, hparà myhí mó Aritemi é noqkuq yhûm gi, haî a dùt byùq luî, Asi-a mau gón eq mingkan gón mai noq é hparà myhî é shingkang hpoî byùq râ lé le myìt chiq râ dùt bê.” gâ ri.

28Yhángmòq gi, dang haû lé wó gyô bùm kôjáng, nhik mó gyô yo kôluî, “Ehpesu wà mó byu pê é Aritemi gi, kô nyì sháng gàq ô!” ga chôm garû bum akô. 29Hkâ-myháng a nghut má, rawa bang gabyông lò bekô. Shiwa byu pé gi, Poluq é byìnzùm Makedoni byù Ge‑u eq Arisitakuq nhik lé chyup she yù mù, yhángmòq é poî wàng mó shut radá dâm chyîn chyap wang ló bum akô. 30Poluq gi, shiwa hpong hí má htoq shit naû kôlhang, chángzô pé gi, yhang lé a wàng nhâng kó nghut ri. 31Poluq é luzúm wuî nghut é, haú mau mâ é sûwún wuî ra-am lháng, yhang lé poî wàng hkaû má a ê râ matú, hkûm pyám nhang akô nghut ri.

32Zîng tô é bang gi, hai hú háng le a sé lo dùt byùq kômù luî, ra-am rajung ga garû bum akô. Myo mî‑myo gi, haî mù luî yhángmòq haû má nyi tô é lé lháng a sê bùm kó nghut ri. 33Yudaq byu pé gi, Alesanderi lé hí má chôm chyûn htoq kat kôluî, shiwa hpong mai ra-am gi, yhang hká dông taí râ hkyô lé mhoq byî kat akô. Alesanderi le shiwa hpong lé taî san kyo naû luî, zîm byùq râ matú lòq tu ri. 34Nghut kôlhang, Alesanderi, Yudaq byù nghut é lé sé kôjáng, yhángmòq lhúnglhâng bang gi, rahtê za kut kôluî, “Ehpesu wà mó byu pê é Aritemi gi, kô nyì sháng gàq ô!” ga hkyíng hkum í hkum kô garû bum akô.

35Haû, wà mó chyirê hpó gi, shiwa mòqmó lé lhoqzim luî taî é gi, “Ehpesu wà mó byu pé ê, Ehpesu wà mó shî gi, Aritemi myhí mó é noqkuq yhûm eq mauhkûng mai byìt gyó lo é yhâng é alhô lé, wú zúng nyi é wà nghut é hkyô lé, mingkan má a sê é ó yùq wa nyi lhê lhú? 36Haû mù luî, shí hkyô pé gi, wó he pyâm jung a nghut é yánmai, zim za nyi le ge lhê, hân so hân dùn hkâkut kó. 37Shí nhik gi, noqkuq yhûm lé hpyoq zo su nhik le a nghut, ngá-nhûng é hparà myhí lé lhoqhpoi su nhik le a nghut kô le nhîng, núngmòq shuî lé bekô nghut ri. 38Demetri eq yhâng é ngùn bàt zo luzúm wuî gi, rayùq yùq é ahtoq má mara hûn râ hkyô jòq kô é nghut jáng, târâ rûng pé hpông tô lhê. Târâ agyì pé nyi lhê. Haú má yhángmòq ê kó sháng gàq. 39Núngmòq taí nau é góhkyô rajung jung jòq é nghut le kúm gi, târâ wàng zùphpong mó má chôm taî pyám râ nghut lhê. 40Hkû-nyí gabyông é mû shí má, mû htoq wang a bo é yánmai, ngá-nhúng lé mara hûn râ chiq râ ri. Shî su kut chôm míng é hkyô lé, hai é yánmai nghut lhê nghû, ngá-nhúng a wó taî kyo nghut ri.” gâ ri. 41Shí pé ban taî é htâng má, yhang gi, shiwa mòqmó lé lhoqpyo kat bê nghut ri.

Currently Selected:

Lagyo 19: znot

Highlight

Copy