Lagyo 21

Yerusalem Wà Mó Shut Dòq Ló Nyi É U Lhê Hkyô

1Ngá-mòq gi, yhángmòq lé kâng pyâm to luî, lhaî jî chûng mù, nyâng za Kusa zinlóng má jé é nghut lhê. Hau htang nyí gi, Rode zinlóng má jé mù, haû mai Patara wà má dum jé bê. 2Haú wâ má Hpinisi mau shut dàp ló é lhaî lé, ngá-mòq myàng luî, haû mai chôm jî chûng bê. 3Haú hkûn, ngá-mòq gi, Kupru zinlóng lé myàng jáng, hau é lòqyo hkyam dông laî ló luî, Suriq mau shut e ló le, wuìloq zê lé hkyó râ matú, Turuq wà mó má nô é nghut lhê. 4Haú wâ má, chángzô pé lé myang hô luî, yhángmòq chyáng nyhit nyí bíng yu é nghut lhê. Chángzo haú bang gi, Chyoiyúng So èq lhoqpûn é dông Poluq lé Yerusalem wà mó shut a ló râ matú, chôm hkûm akô. 5Nghut kôlhang, nyhit nyí haû lai jáng, ngá-mòq gi, ngá-mòq é hkyôwuì shut dum xoq sô htoq ló bê. Chángzô pé lhúnglhâng bang gi, yhángmòq é myi zo wuì eq rahá, ngá-mòq lé wà shinggan jé shoq châng dé kôluî, ngá-mòq gi, yhángmòq eq rahá wuì yàm má hkyîhput htuq mù, kyû chôm dung bê nghut lhê. 6Hau htâng, rayùq eq rayùq ban shi-kyâm lhum jáng, ngá-mòq gi, lhaî má wàng bê; yhángmòq gi, yhûm shut dum taû ló byùq bekô nghut ri.

7Ngá-mòq gi, Turuq wà mó mai lhaî jî chûng mù, Toleme wà má jé ló bê. Ngá-mòq gi, haú wâ mâ é gu-mang wuì lé dù nyo yù mù, yhángmòq eq rahá ra-nyí chôm nyi kûn é nghut lhê. 8Htang nyí gi, ngá-mòq haú wâ mai htoq ló mù, Kesare wà mó má dum jé bê. Haú wâ má, haû htuqlùq htuqbáng nyhit yùq#21:8 Lagyo 6:1-6 má bò sû, gabú danglù hko taî é Hpilip gá su é yhûm má, ngá-mòq wang bíng bê nghut lhê. 9Yhang gi, yhang hku tô é byìzo zo-myi myìqhtoi myi yuq wó ri.

10Ngá-mòq gi, haú yhûm má rayòq zo nyi é htâng má, Agabu gâ é myìqhtoi rayùq, Yuda mau mai jé lé ri. 11Yhang gi, ngá-mòq chyáng jé lé luî, Poluq é hpyihit lé yù mù, yhânggùng yhang lòq eq hkyî pé má tui mù luî, taî é gi, “‘Shî hpyihit yhûmsîng lé, Yerusalem wà mó mâ é Yudaq byu pé mai shî su kut lhom tui luî, tûngbaù pê é lòq má àp pyám kôrâ nghut lhê.’ ga luî, Chyoiyúng Sô taî ri.” gâ ri.

12Dang haû lé wó gyo jáng, haú mâ é bang eq ngá-mòq gi, Poluq lé Yerusalem wà mó má a dòq ló râ matú, gyai yhang chôm hkúm bê nghut lhê. 13Nghut kôlhang, Poluq gi, “Núngmòq gi, haî mù luî ngaùbyi ngaùnhap kut é eq, ngo lé myìt wum gyui râ dông kut nyi akô lhú? Ngò gi, Yhûmsîng Yesuq é yánmai, Yerusalem wà mó má, tuî é hui râ za a nghut, shî hkâm râ matú le rì rì nghut lhê.” ga tû taî pyâm ri. 14Yhang lé wó taî hkúm râ su a dùt lo jáng, ngá-mòq gi, “Garai Gasang ô nau é dông nghut sháng gàq.” nghû luî, zim za chôm nyi bùm bê.

15Hau htâng má, ngá-mòq gi, zè món chûng mù Yerusalem wà mó shut dòq ló bê nghut lhê. 16Kesare wà mó mâ é chángzô pé ra-am le, ngá-mòq eq rabyìn za nghut kôluî, yhángmòq gi, ngá-mòq lé Kupru byù Manason ga sû, hí hí lhê é chángzo rayùq é yhûm má shuî ló mù, yhâng chyáng bíng nhang akô.

Yerusalem Wà Mó Má, Yakuq Lé Ê Huî É Hkyô

17Yerusalem wà mó má ngá-mòq jé é hkûn, gu-mang wuì gi, ngá-mòq lé gabú tung lhom hkûlum yu akô. 18Htang nyí, Poluq eq ngá-mòq gi, Yakuq lé ê huî le, hpúng sûwún wuî le zîng nyi to láng akô. 19Poluq gi, yhángmòq eq ban dù nyò jáng, yhang wùn wàq laî lo é hpúng mû dông mai, Garai Gasâng èq tûngbaù pê chyáng kut byi bê hkyô pé lé, jíhkúm nùqgùq shit kyô ri.

20Yhángmòq gi, haû lé wó gyo kôjáng, Garai Gasang lé hkya-ôn akô. Hau htâng, Poluq lé taí kô é gi, “Âmang ê, Yudaq byu pé má lùmjíng é bang hkâ-myhó hkyîng mun nghut bê lé, nàng sê lhê. Haú bang lhúnglháng gi, jep é târâ má myìt zùq to bê bang chyat nghut bum akô. 21Nghut kôlhang, yhángmòq lhúnglhâng bang gi, tûngbaù pê chyáng nyó lúng tô é Yudaq byù bànshoq bang lé, nàng, yhûmsing yhang zo yhang shû pê é matú ahpyo-kuq hpyit a ra nghu é eq ngá-nhûng é htûng târâ lé châng nyì a ra nghû luî, Mosheq é târâ lé tô pyám râ dông mhoqshit ri gâ é dang lé, wó gyô yu bùm bekô nghut ri. 22Nàng jé bê hkyô lé, yhángmòq wó gyo berâ za nghut lhê. Ahkuî, ngá-mòq hkâsu kut lo râ lhú? 23Haû mù, ngá-mòq taî é dông kut àq; ngá-mòq chyáng danghtum htûm to bê byù myi yuq nyi lhê. 24Nàng gi, haú bang lé ji yù mù, yhángmòq eq rahá lhoqsan lhoqyúng yû àq, yhángmòq lé u wó wùq yù râ matú, ahpau le htoq byi aq. Haú hkûn shèq, byù lhúnglhâng bang gi, yhángmòq wó gyô tô é hkyô a têng byùq é eq, nàng yhang lháng, jep é târâ lé, châng kut nyî sû nghut é hkyô lé, sé kôrâ nghut lhê. 25Lùmjíng é tûngbaù pê é matú kúm gi, hparà lhô pé lé tîng byî é zoshuq, sui, lìngzing mai myhik sat é gaunyhaú sho eq ashop é dông gùngsho zùm yàp é hkyô pé lé, yhángmòq koi pyám râ matú, ngá-mòq chôm dòqdan luî, kâ hun kat bê nghut lhê.” gâ akô.

26Haû mù luî, Poluq gi, hau htang nyí haú bang lé ji yù luî, yhángmòq eq rahá, lhoqsan lhoqyúng yû mù, noqkuq yhûm má wàng luî, yhángmòq yùq hkangmó é matú hkungga wó byi shoq ga, yhángmòq é lhoqsan lhoqyúng buìnyì ngàp bê hkyô lé, taî kyô ri.

Poluq Chyup Yû Huî É Hkyô

27Buìnyì nyhit nyí haû ngàp râ yàm má, Asi-a mau mâ é Yudaq byu pé ra-am gi, noqkuq yhûm má Poluq lé myàng kômù, shiwa byu pé lé shuî gabyong luî, yhang lé chyup yû mù, garû taí kô é dang gi, 28“Isira-elaq byu pé ê, garúm yû keq, shí yùq gi, ngá-nhûng byùhú lé le, jep é târâ lé le, jowò shî lé le, shut shai é dông jowò hkangmó mâ é byù bànshoq lé mhoqshit sû nghut ri. Hau htoq agó, noqkuq yhûm má Grik pé lé shuî háng é eq, chyoiyúng jowò shî lé achaq achyut kut é sû nghut ri.” gâ akô. 29(Hkâsu mù gâ le, yhángmòq gi, Ehpesu wà mó byù Trohpimu ga sû eq Poluq wà hkaû má rahá nghut kô é lé, myàng kômù, haú yùq lé noqkuq yhûm shut shuî háng nhô ngam pyám kô é yánmai nghut ri.)

30Rawà gón gabyông lò mù, shiwa byu pé lhînghkyùq mai din lé lô kôluî, Poluq lé chyup zing to uchyang, noqkuq yhûm shinggan shut she hkyut htoq ló akô. Haú hkûn jáng, hkum pé lé myhî pyâm akô nghut ri. 31Poluq lé yhángmòq sat râ haq htung nyì kô é hkûn, Yerusalem wà gón gabyông nyi akô gâ é hkyô lé, Romaq dàp ùp zaû é no má, lo jé ri. 32Haû mù, yhang gi, radá dâm shô ùp gyèzau ra-am eq gyèzô pé lé shuî chûng mù, byù hpúng shut, din yán gyó ló akô. Yhángmòq gi, gyèzau eq gyèzô pé lé lhom myàng kôjáng, Poluq lé nhuq nyi é mai hkyîng byùq akô nghut ri.

33Haú hkûn, dàp ùp zau hpó gi, Poluq chyáng ê jé mù, yhang lé chyup yû luî, toqjâng tui í hkat èq tuî to nhang ri; hau htâng, yhang ó yùq nghut é hkyô lé le, haî kut shut é hkyô lé le myî wú ri. 34Shiwa byu pé kúm gi, rayùq rajung ga garû bum akô. Haû mù, gyèzau hpó gi, lûm garu kô é yánmai, têng é hkyô lé rago a wó sê yù jáng, Poluq lé gyèwap má shuî ló nhang ri. 35Poluq gi, zùmhtâng wang má jé lo é hkûn, byù mòqmó lûm htim chyîn chyap lô kô é yánmai, gyèzô pé gi, yhang lé wàq dòq ló akô. 36Shiwa byu pé gi, “Yhang lé sat pyám keq.” ga châng garû nyi akô nghut ri.

Poluq, Yhûmsing Gùng Mara A Bo É Lé Taî Sân Kyô É Hkyô

37Gyèzô pé gi, Poluq lé gyèwap má shuî wàng râ za nghut é hkûn, Poluq gi, dàp ùp zau hpó lé, “Ngò nàng lé dang wó nyô râ lhú?” ga myi jáng, dàp ùp zau hpó gi, “Nàng, Grik myíng dàt mu lhê lhú? 38Nàng gi, hí hkûn gumlau kut mù, byù sat wún bang myi hkyîng lé, yòso shut shuî htoq ló é sû, Egutuq byû a nghut lhú?” ga taû myî ri.

39Haú hkûn, Poluq gi, “Ngò gi, Kiliki mau Tashu wà mó mâ é Yudaq byù nghut lhê; ngò nyi é wà gi, wà chyap wà zo za a nghut, jeju mai, byù shí bang lé ngò dang taí râ ahkáng byi laq.” ga dûng ri.

40Gyèdap ùp zau hpó ahkáng byi jáng, Poluq gi, zùmhtâng má yàp to mù, shiwa byu pê shut lòq he ri. Haú hkûn, yhángmòq lhúnglhâng bang zim byùq kômù, Poluq, yhángmòq lé Hebre myíng dông taî é gi,

Currently Selected:

Lagyo 21: znot

Highlight

Copy