HEBREOS 3

Jesús tuichagüe yae Moisés güi

1Jáeramo, cherɨvɨ oporogüɨrovia vae reta, Tumpa pereenɨi vae reta, pemae kavi Cristo Jesús temimondo jare sacerdote tenondegua ete, jese yarovia vae re; 2Jesús oiko jupi rupi imboguapɨa kotɨ, Moisés jupi rupi oiko #Nm 12.7. opaete Tumpa jo pe rami. 3Jare Jesús oyembotuichauka yae Moisés güi. O iyapoa imboetea yae jae o oyapo vae güi rami. 4Jare opaete o, oime iyapoa. Ërei opaete mbaembae iyapoa, jae ko Tumpa. 5Añete Moisés jupi opaete Tumpa jo pe, tembiokuai rami, omoërakua vaerä taɨkue rupi oikota vae. 6Ërei Cristo ko jae Tumpa Taɨ, jare jae ko opaete Tumpa jo iYa. Jare jökoraita ñaneräta ngatu jare yayerovia yave ñaäro ñaï vae re.

Tumpa imbae reta iputuu

7Jáeramo, Espíritu Santo jei rami:

“Añave peendu yave iñee:

8Agüɨye pepɨa pemotäta, chemboarasɨuka yave rami;

jókuae ara pejäa Tumpa ipɨaguasu ñuu pe rami,

9peñemuñagüe reta oipota tëi oyavɨuka chevea pe,

chemboaporova reta,

yepe oecha reta tëi ayapogüe cuarenta año rupi.

10Jókuae jeko pegua chearasɨ aiko kuae ñemuña reta kotɨ,

jare jae: ‘Kuae tëta ipɨa güɨrave avei,

¡jare mbaetɨ oikuaa reta cheporookuai!’

11Jáeramo, chearasɨ reve jae:

‘Mbaetɨta oike reta mbutuu#Sal 95.7-11. ameeta vae pe.’ ”

12Jáeramo cherɨvɨ reta, peyeandu agüɨye vaerä pepɨa oñemotäta mbaetɨ peporogüɨrovia ramo, jare pesɨrɨ Tumpa oikove vae güi; 13ërei ara ñavo peñomoäta ngatu, “kuae ara” yae ramboeve, agüɨye vaerä metei ave pepɨte pegua oyembopɨatäta mbaeyoa iporombotavɨ rupi. 14Echa ñañemoïru ma Cristo ndive, ñanepɨ̈rata yave iyɨpɨ güive yarovia vae re, 15yae ramboeve:

“Añave peendu yave iñee:

Agüɨye pepɨa pemotäta,

chemboarasɨuka yave rami.”#Sal 95.7-8.

16¿Kia reta pa jókuae Tumpa iñee oendu güire omboarasɨuka vae? ¿Jaeä pa Moisés güɨnoe Egipto güi vae reta? 17Jáeramo Tumpa iyarasɨ cuarenta año jókuae ñaneñemuñagüe reta pe, iyoa reta ramo opa omano ñuu rupi. 18Echa Tumpa jei jee re ae mbaetɨ vaerä oike reta iputuúa pe,#Nm 14.1-35. jókuae iñeereendumbae reta. 19Jare yaikuaa jae reta mbaetɨ ko ipuere oike Canaán pe, mbaetɨ güɨrovia reta Tumpa ramo.

Currently Selected:

HEBREOS 3: GUABD

Highlight

Copy

Compare