HEBREOS 2

Yemboasa tuichagüe yae vae

1Jáeramo, ikavi ko ñaneräta ngatu yae vaerä yaendugüe re, agüɨye vaerä yapia chugüi. 2Echa Tumpa jei Israel pegua reta pe araɨgua reta rupi vae mbaetɨ oyepoepɨ, jare opaete jókuae iñeereendumbae jare oyapombae oiporara, 3jayave, ¿këraita pa yaasayepe, ñaröɨro yave yemboasa tuichagüe? Echa yandeYa räri imiari kuae yemboasa re, jare yaikuaa imiari yandeve oyeapɨsaka jese vae reta rupi. 4Tumpa etei omoañete jae reta omombeu yandeve vae, mɨakañɨ reta, jare Espíritu Santo rupi mbaepuere reta oñemee vae rupi.

Jesucristo oporomboasa vae

5Tumpa mbaetɨ oñono araɨgua reta ipo pe ɨvɨ oikota vae, ñanemiari ñaï jese vae, 6ërei Tumpa Iñee pe kia jei:

“¿Mbae pa ko kuimbae, nemaendúa vaerä jese?

¿Mbae pa ko kuimbae reyemoambeko vaerä jese?

7Remomichi mí araɨgua reta güi,

jare remee chupe yemboetea jare mbaepuere.

Jare reñono reyapogüe reta re;

8opaete reñono ipo pe.”#Sal 8.4-6.

Kuae oipota jei opaetei mbaembae oñono ipo pe vae. Ërei mbaetɨño yaecha opaetei ko ipo pe opɨta vae. 9Ërei yaikuaa ko Jesús, Tumpa omomichi mí araɨgua reta güi vae tuichagüe yae jare imboetea yae,#Flp 2.6-11; Heb 12.2. imano jeko pegua. Jökorai Tumpa ipɨakavi jeko pegua omano opaete re.

10Tumpa opaete mbaembae iyapoa, jese oï opaete mbaembae vae pe ikavi jeta ɨvɨ pegua reta oyeapo vaerä taɨ retarä, jáeramo, omee oiporara vaerä Jesús jare oupitɨ oporomboasa vaerä. 11Jesús oporoñono tee vae jare oñeñono teeuka vae reta Tumpa imbae päve ko; jáeramo Jesús mbaetɨ imara jei “cherɨvɨ reta”, 12echa jei Tembikuatía pe:

“Amoërakuata nderee cherëtara reta pe;

ndembae vae reta oyemboatɨa pe romboeteta.”#Sal 22.22.

13Jare jei vi:

“Añonota chepɨa jeseño.”#Is 8.17.

Jare jei ye:

“Mase, che jare kuae chemichia reta yandeYa#Is 8.18. omee cheve vae.”

14Opaete taɨ reta ɨvɨ pegua reta ko, jáeramo Jesús etei vi oyeapo ɨvɨ peguarä, imano rupi omoamɨri vaerä aña guasu güɨnoise mbaepuere mano re vae, 15jökorai oyora vaerä opaete okɨɨye mano güi ramo tembipɨɨ rami yogüɨreko opaete ara oikove oiko ramboeve vae. 16Añete ko, Jesús mbaetɨ ou omborɨ vaerä araɨgua reta. Ou ko omborɨ vaerä Abraham iñemuña reta. 17Jáeramo Jesús ikavi ko oyeapo vaerä ɨvɨ pegua reta rami, ipuere vaerä Tumpa jóvai sacerdote tenondegua ete oporoparareko jare jupi vae, jökorai Tumpa iñɨ̈ro vaerä opaete vae reta pe iyoa reta re. 18Echa aña guasu omomiari oyavɨuka vaerä tëi chupe vae, imbaepuere yae ko omborɨ vaerä jókuae oyavɨta tëi vae.

Currently Selected:

HEBREOS 2: GUABD

Highlight

Copy

Compare