1 JUAN 4
4
Tumpa iEspíritu jare Cristo re oyemboyovaicho vae iespíritu
1Cherɨvɨ aaɨu vae reta, agüɨye perovia opaete espíritu re, jaeño pejäa Tumpa pegua ra, echa kuae ɨvɨ pe jeta oë ñeemombeúa jaanga reta. 2Kuae rupi pepuere peikuaa Tumpa iEspíritu: Opaete vae omombeu Jesucristo ko jae oyeapo kuimbaerä vae yave, jae ko Tumpa güi ou vae. 3Ërei opaete vae omombeu Jesucristo mbaetɨ ko oyeapo kuimbaerä vae yave, mbaetɨ ko ou Tumpa güi. Jókuae jae ko Cristo re oyemboyovaicho vae iespíritu, jae ko pe reta peikuaa outa vae, jare añave oime ma oï ɨvɨ pe.#Mt 7.15; 2 Jn 7.
4Cheraɨ aaɨu vae reta, pe reta ko jae Tumpa imbae reta, jare pemoamɨri ma añetembae re oporomboe vae reta. Echa oï peré vae tuichagüe yae ko jókuae kuae ɨvɨ pe oï vae güi. 5Echa jae reta ɨvɨ pegua ko. Jáeramo imiari mbaembae ɨvɨ pegua reño, jare ɨvɨ pegua reta oyeapɨsaka kavi jese reta.#Jn 15.19. 6Ërei yande ko jae Tumpa imbae reta. Kia oikuaa Tumpa vae, oyeapɨsaka yanderé. Ërei kia Tumpa imbaeä vae, mbaetɨ oyeapɨsaka yanderé. Körai yandepuere yaikuaa añete vae pegua espíritu ani tavɨ pegua. #Jn 8.47.
Tumpa ko mboroaɨu
7Cherɨvɨ aaɨu vae reta, yayoaɨu päve. Echa Tumpa güi ko ou yandeve mboroaɨu. Jókuae oporoaɨu vae güɨnoi tekove Tumpa güi, jare oikuaa ko Tumpa. 8Mbaetɨ oporoaɨu vae oikuaaä ko Tumpa. Echa Tumpa ko mboroaɨu. 9Kuae re ko oyekuaa Tumpa iporoaɨu yande kotɨ, kërai jae ombou Taɨ jaevaeño ɨvɨ pe, yande ñanoi vaerä tekove.#Jn 3.16. 10Kuae re oï mboroaɨu: Mbaetɨ ko yande yaaɨu Tumpa ramo, jaeño jae yanderaɨu jare ombou Taɨ rupi iñɨ̈ro vaerä yandeyoa reta re.
11Cherɨvɨ aaɨu vae reta, Tumpa jökorai yanderaɨu, jáeramo ikavi ko yande yayoaɨu päve vaerä. 12Mbaetɨi kia ave oecha#Jn 1.18. Tumpa. Ërei yayoaɨu päve yave, Tumpa oiko yanderé, jare iporoaɨu okuakuaa yanderé. 13Jare kuae re yaikuaa yaiko ko Tumpa re vae, jare jae oiko ko yanderé vae, jae ko Espíritu Santo omee yandeve vae rupi.#Ro 8.9; 1 Jn 3.24. 14Jare ore roecha jare romoërakua Tumpa ombou Taɨ ɨvɨ pegua reta Omboasa vae.#Jn 3.17. 15Oime yave kia “Jesús ko jae Tumpa Taɨ” jei vae, Tumpa oï jese jare jae oï Tumpa re.
16Yaikuaa ko jare yarovia ko Tumpa yanderaɨu. Tumpa ko mboroaɨu; oiko mboroaɨu pe vae oiko ko Tumpa re jare Tumpa oiko jese. 17Jare kuae re okuakuaa mboroaɨu yanderé, yandepuere vaerä ñaï Tumpa jóvai yakɨɨyembae reve jókuae iporojäa iara pe. Echa kuae ɨvɨ pe yaiko ramboeve, jae rami ko yaiko. 18Mboroaɨu oimea pe mbaetɨ kɨɨye, jaeño mboroaɨu ikavi yae vae ombosɨrɨ kɨɨye, echa kɨɨye güeru mbaeporara; jáeramo okɨɨye vae mbaetɨ ko oikuaa kavi Tumpa iporoaɨu.
19Yande yaaɨu Tumpa, echa jae räri yanderaɨu. 20Oime yave kia “che aaɨu Tumpa” jei vae, ërei omotareɨ yave iñeïru oporogüɨrovia vae, iyapu yae ko. Echa iñeïru oporogüɨrovia vae oecha etei vae mbaetɨ oaɨu yave, ¿këraita pa oaɨu Tumpa oechambae vae? 21Jare Jesucristo oeya yande kuae mborookuai: Oaɨu Tumpa vae, toaɨu vi iñeïru oporogüɨrovia vae.#Mt 22.37-39; Mc 12.29-31.
Currently Selected:
1 JUAN 4: GUABD
Highlight
Copy
Compare
Share
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
