1 JUAN 3

Tumpa taɨ reta

1Mase, kërai yandeRu Tumpa yanderaɨu yae, ñanereenɨi jae taɨ retarä.#Jn 1.12. Jáeramo ɨvɨ pegua reta mbaetɨ yandekuaa, echa jae reta mbaetɨ oikuaa Tumpa. 2Cherɨvɨ aaɨu vae reta, añave yande ko jae Tumpa taɨ reta ma. Jare ndeiño oyekuaa kërai eteita ko yande vae, ërei yaikuaa Cristo ramita ko yande jae ou ye yave, echa yaechata jae etei. 3Jare opaete oäro oï vae reta, oyetɨo avei, echa Cristo ikɨambae ko.

4Ërei iyoa vae, oyavɨ ko Tumpa iporookuai; echa mbaeyoa oñemopüa ko Tumpa kotɨ. 5Jare peikuaa kërai Jesucristo oyeapo kuimbaerä omboai vaerä yandeyoa reta.#Jn 1.29. Jare jae mbaetɨ etei iyoa. 6Oï avei Jesucristo re vae, mbaetɨ iyoa. Iyoa vae mbaetɨ ko oecha ani oikuaa Jesucristo. 7Cheraɨ aaɨu vae reta, agüɨye kia tapembotavɨ. Jupi vae oyapo vae, jupi ko, Jesucristo jupi rami. 8Jekuaeño mbaeyoa oyapo vae aña guasu imbae ko. Echa aña guasu iyoa avei iyɨpɨ güive. Tumpa Taɨ oyeapo kuimbaerä omboai vaerä aña guasu iparavɨkɨ.#Heb 2.14-15.

9Tumpa güi tekove güɨnoi vae mbaetɨ oyapo mbaeyoa, echa güɨnoi ma tekove Tumpa güi; mbaetɨ ipuere oyapo mbaeyoa, echa güɨnoi ma tekove Tumpa güi. 10Yandepuere yaikuaa kia ra ko jae Tumpa taɨ reta jare kia ra ko jae aña guasu taɨ reta vae. Opaete kia jupimbae oyapo vae, jare mbaetɨ oaɨu ïru oporogüɨrovia vae, Tumpa taɨä ko.

11Echa iyɨpɨ güive peendu kuae ñee: “Yayoaɨu päve oyoupi.”#Jn 13.34; 15.12. 12Agüɨye yaiko Caín rami. Echa Caín aña guasu imbae ko jare oyuka tɨvɨ. Jare ¿maera ra oyuka? Caín oyapo ikavimbae vae, jare tɨvɨ oyapo jupi vae ramo. #Gn 4.8.

13Cherɨvɨ reta, agüɨye pepɨakañɨ ɨvɨ pegua reta pemotareɨ yave. 14Yande yaikuaa yaasa ma ko mano güi tekove pe, jókuae yaikuaa yayoaɨu vae rupi. Mbaetɨ oaɨu ïru oporogüɨrovia vae, omano vɨteri ko oï. #Jn 5.24. 15Iñeïru oporogüɨrovia vae omotareɨ vae, oporoyuka vae rami ko. Jare peikuaa ko metei oporoyuka vae mbaetɨ etei güɨnoi tekove opambae vae iyé. 16Kuae re yaikuaa kërai ko mboroaɨu vae, echa Jesucristo omano yanderé.#Jn 15.13. Jaeramiño vi ikavi ko yande ñamee yanderekove ïru oporogüɨrovia vae reta re. 17Ërei oime yave kia oikokatu kuae ɨvɨ pe vae, jare oecha ïru oporogüɨrovia vae pe oata mbae vae mbaetɨ oiparareko yave, ¿këraita pa oï jese Tumpa iporoaɨu? 18Cheraɨ aaɨu vae reta, agüɨye yayoaɨu ñaneñee peño ani yandeyuru peño, toyekuaa yayapo vae rupi jare añetete rupi.

19Kuae re yaikuaa yande ko añete vae pegua, jare yandepuere ñaï pɨagüive jae jóvai. 20Echa yandepɨa omboeta yandeve vae güi ko Tumpa iporomboeta tuicha yae, echa jae oikuaa opaete mbaembae. 21Cherɨvɨ aaɨu vae reta, mbaetɨ yave yandepɨa omboeta, yayeko Tumpa re; 22oipotagüe mbae yaiporu chupe vae jae omeeta yandeve, yayapo iporookuai reta jare mbaembae omboyerovia vae ramo. 23Jare Tumpa yandeokuai vae jae ko yarovia vaerä Taɨ Jesucristo jare yayoaɨu päve vaerä jae yandeokuai rami.#Jn 13.34; 15.12,17. 24Jare Tumpa iporookuai reta oyapo vae oiko avei ko Tumpa re, jare Tumpa jese. Jare kuae re yaikuaa Tumpa oiko ko yanderé vae: Jae ko Espíritu Santo omee vae rupi.

Currently Selected:

1 JUAN 3: GUABD

Highlight

Copy

Compare