NYENSANG CHIA 59
59
Satenla Welaubü
1O ngeibü Mühghaü,
ngeibü dangbou shuong ka ngo khümenashi;
kükhu limbo lobü shuong ka ngo püetkai.
2Shabü kümbü shuong ka ngo senetashi.
hoba sii maangdakbü shuong ka ngo khümenashi.
3Aieilausi chühashi, haoenei kü langkei shanga thoan haiyeida;
hau kibü shuong ngo khulimbo kamsheida.
Ngeibü shedbü ayingsi ngeibü shabü shanga aying, O Bunyubou.
4Kü to shedbü akinyu haoen laangda hoba lamleda;
kü to thuila lamleashi, hoba chühashi.
5No lolo ong, O Thükenbü Mühghaü Bunyubou,
Israel Mühghaü maialembü shuong pean chühla meimeiashi.
Amaibü shedbü jungeibü aotokei nyi sanoutedam.
6Haoen chasem longeida,
haoenei keiei tegü ngongko wida.
hoba sangnyu kaijembo hauda.
7Chühashi haoenei jembü sembungei ngongda;
haoeneibü lishanga in kia,
lausikei haoen to aoei ditda?
8Lausikei, O Bunyubou, nyi haoen la nyikulabü;
nyi maialembü shuong pendou la nyikulabü.
9O ngeibü hau, ngei no haiyeikho;
aieilausi Mühghaü ngeibü lapheishon yaangbü ki.
10Kü to sanoudambou Mühghaüei ngo thangetlabü;
ngeibü dangbou thüka ngeibü maangdak Mühghaüei
kü la haptilabü.
11Haoen tühaiti, khei ayinglonga kü mütli shuongei maanaplabü;
O Bunyubou, küneibü aih;
hoba haoen kaibü seisihauei lintiashi hoba haoen senyanshi.
12Haoeneibü sembung shabü hoba sembungkhop ngüh shanga;
hoba haoenei khükbüuokbü hoba yepeijawebü ngüh shanga.
Haoen khei jembü lilisesea laptishi.
13Khau longsi haoen mautishi,
haoen touje langkei akilabü lele mautishi;
hoba kaodak thonbü sühko Jakob to Mühghaüei
songdakda dogo haoen la ngetiashi.
14Hobaje chasemlamto haoen longeitiashi,
kei tegü ngüh longtishi hoba sangnyu kaiko hautiashi;
15haoenei shausiyung shanga ang louyen dogo shoongyolabü,
hoba haoen senyüh ashemlonga langyang sünga kilabü.
16Lausikei ngei kaibü hau shanga laulabü;
haü kaibü sanoudambü shanga ngei kaangko chia laulabü;
aieilausi ngeibü khonku chaloua
no ngeibü lapheishon yaangbü hoba satenshang kikei.
17O ngeibü hau, ka to ngei nyensang chia laukho;
aishanga sanoudambü Mühghaü, ngeibü lapeishon yaangbü ki.
Currently Selected:
NYENSANG CHIA 59: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
