Matayo 5
5
1Sombi ŵaYesu, pakuwona amaŵumba, ŵalininine ku lupili, nekwikala pansi; lomba neŵasambile ŵaŵo nekwisa kuli ŵo. 2Eli ŵaasamwine pakanwa, nekuŵasambisya ati:
3Ŵalisyucile awapeŋgele mumitima,
pakuti Uŵufumu bwaKwiulu bwaŵo.
4Ŵalisyucile aŵalukuŵombomana,
pakuti ŵo wakasaŋgalala.
5Ŵalisyucile aŵatekenye, aŵalicefesye;
pakuti ŵo ŵakapyane'calo conse Icapapsi.
6Walisyucile aŵalukumfwe'nsala necilaka icakuluŋgama,
pakuti ŵo ŵakekuta.
7Ŵalisyucile aŵo aŵali neŋkumbu,
pakuti ŵo wakapoke'ŋkumbu.
8Ŵalisyucile aŵaswetele mumitima,
pakuti ŵo ŵakaŵaŵona ŵaLesa.
9Ŵalisyucile aŵalamwisi,
pakuti ŵo ŵakelikwa ŵana ŵaŵaLesa.
10Ŵalisyucile aŵo aŵakululucile pakuti pakuluŋgama,
pakuti ŵo Uŵufumu bwaKwiulu bwaŵo.
11Mweŵo mulisyucile pakulukumutoŋgaleni aŵantu, nekumukululusyeni, nekumufumbucileni pakuti pali neŵo. 12Saŋgalaleni, mulukusembo'kwakuti, pakuti ukulambulwa kwenu ukwakwiulu kukulu; pakuti fyopele'fyo efi ŵalukuŵakululusya akale aŵakusimika aŵamutanjilileni.
13Mweŵo muli mucele uwamucalo capansi; sombi kani umucele waleka ukukuma kwa uko, mbanikundo ukakumisiwa? uyo lomba ukaŵa finaŋgwa, fyelelwe ukufiposa pesonde, aŵantu nekulukunyantala-po lukoso. 14Mweŵo muli kutuŵa ukwamucalo capansi. Umusi uli palupili tawisi ukufiswa. 15Kaŵili aŵantu taŵaambusye'nyale nekwiifunicila mucitundu, koku; sombi ŵaleŵika pacakuteka-po; eli iŋgawatuwila ŵonse awamuŋanda. 16Fyopele'fyo namweŵo ukutuŵa kwenu ŋgakutuwe kuŵantu, ati ŵakaŵone'milimo yenu iweme, ŵalemye ŵaWisinwe aŵaKwiulu.
17Mwilukulaŋguluka ati ndiisile mukonala amafunde neli fyaŵakusimika; nsiisile mukonala, sombi mukupelesya pamo. 18Pakuti icinenene ndukumuŵuleni ati: Ili tafiŋgasila iulu necalo capansi, takakasimaŋgana neli kusimaŋgana konse pamafunde akalembo kanini kamo neli kacetu kanini kamo, ili tafiŋgakonsiwa fyonse. 19Aŵantu ŵonse lomba ukapulaisya ifunde limo, naŋgawa ati lice lukoso pamafunde aya, nekuŵasambisya aŵantu ukucite'fyo, uyo akebwa ucepele lukoso muŴufumu bwaKwiulu; sombi aŵantu ŵonse ukaacita nekwasambisya, uyo akebwa mukulu muŴufumu bwaKwiulu. 20Pakuti ndukumuŵuleni ati: Kani ukuluŋgama kwenu takukacila napali koko ukwaŵalembesi neŵaFalisi, tesi mukenjile neli kwinjila-mo konse muŴufumu bwaKwiulu.
21Mwaliumfwile ati fyalilaŵilwe kuŵakale ati: Tekwipayo'muntu; aŵantu wonse ukepayo'muntu akalitakatila kumulandu: 22sombi neŵo ndukumuŵuleni ati aŵantu ŵonse ukafitilwa umukwaŵo akalitakatila kumulandu; nakaŵili aŵantu ŵonse ukalaŵila kumukwaŵo ati: Wecinaŋgwa camuntu! uyo akalitakatila kwisolololo; nakaŵili aŵantu ŵonse ukalaŵila ati: Wemwaluka! uyo akalitakatila kuGeena wamulilo.
23Pakuti pali fyefyo kani ulukupelo' mulambu woŵe kuconto, lombo'ko nekulaŋguluka ati ndi nemulandu kumukwasu, 24kosila umulambu woŵe kuconto, ulukuya, ukatanje ukakumaŋkane nemukwanu, eli ukesa mukupela nemulambu woŵe. 25Umusuminine bwaŋgu uwamulandu woŵe, ili ucili nakwe pansila; umu pate eŋgesa-kukulowela kuwakusololola, naye uwakusololola nekukuposa kucilolo, lomba weŵo nekuposwa mwikati. 26Icinenene ndukukuŵula ati: Umo tokafuma-mo neli kufuma konse, ili tauŋgafuta nekaŵoni akakupelako.
27Mwaliumfwile ati fyalilaŵilwe ati: Tekucito'ŵucende; 28sombi neŵo ndukumuŵuleni ati: Aŵantu ŵonse uwakutambo'mwanakasi nekumukumbwa, uyo kale acita nakwe uŵucende mumutima wakwe. 29Popele kani ilinso lyoŵe ilyakulwine lilukukututwisya, uliloŵolemo, ulipose; pakuti filikwelelwe weŵo ati icileŵa cimo icamuŵili woŵeconaike, ukucila napakuposwa umuŵili woŵe uŵuluŵulu muGeena. 30Kaŵili kani ukuŵoko koŵe ukwalwine kulukukututwisya, ukupinike-ko, ukupose; pakuti filikwelelwe weŵo ati icileŵa cimo icamuŵili woŵe conaike, ukucila napakuya umuŵili woŵe uŵuluŵulu muGeena.
31Kwalilaŵilwe kaŵili ati: Aŵantu ŵonse uwakuleko'mukasi wakwe, amupele neŋkalata iyakumukanina-po; 32sombi neŵo ndukumuŵuleni ati: Aŵantu ŵonse uwakuleko'mukasi wakwe, pamulandu utauli waŵucende, alukumuleŋgelo'wucende uyo-mwanakasi; kaŵili aŵantu ŵonse ukamuupo'mwanakasi uyo uwakenwe, akacito'ŵucende.
33Kaŵili mwaliumfwile ati aŵakale ŵalilailwe ati: Tekulapa ukwakuŵepa lukoso, yo; sombi ukalape ukwakulayana naŵaSikulu; 34sombi neŵo ndukumuŵuleni ati: Tekulapa neli kulapa konse; neli kulapa kwiulu, pakuti iulu liteŵe lyaŵaLesa; 35neli kulape'calo capansi, pakuti cipuna cakunyanta-po ŵaLesa; neli kulapa Jelusalemi, pakuti musi waMfumu ikulu. 36Kaŵili tekulapo'mutwi woŵe, pakuti tawisi ukwalula umusisi umo utuŵile neli ufitile. 37Sombi ukulaŵila kwenu kuwe Inya! Inya! Koku! Koku! pakuti fyonse ifyakulu nda-po pali fyefyo fyakuŵifya.
38Mwaliumfwile ati fyalilaŵilwe ati: Umulandu walinso walinso, umulandu walino walino: 39sombi neŵo ndukulaŵila kuli mweŵo ati: Tekulwa nembifi, sombi aŵantu ŵonse uwakukupama palutoŵo lwalwine, koteya-ko nalumbi nalo kuli ye. 40Ka ŵili kani umuntu nekukutwala kwisolololo, nekupokolola ilaya lyoŵe, tekumukanya ukupoka nemwinjila woŵe pamo. 41Nakaŵili aŵantu ŵonse ukakupanjila ukwenda nakwe ima ili limo, ukende nakwe aŵili. 42Uyo ulukukulombe'cintu, umupele; nakaŵili uyo ulukufwayo'kwapula kuli weŵo, tekumufutatila.
43Mwaliumfwile ati fyalilaŵilwe ati: Utemwe umuŵyoŵe, sombi kofitilwa umupate woŵe! 44Sombi neŵo ndukumuŵuleni ati: Mulukutemwa neŵapate ŵenu, nekuŵatembelela kuli ŵaLesa aŵo aŵamupensyeni; 45ati muŵe ŵana ŵaŵaWisinwe aŵaKwiulu: pakuti ŵo ŵalatulisya'kasuŵa paŵakuŵifya napawakuwamya, nekuloke'mfula paŵaluŋgeme napaŵasendeme. 46Pakuti kani mulatemwa aŵo aŵamutemweni, mbafindo mupoka? Newasoŋkesi naŵo kansi taŵalacita fyopele'fyo? 47Nakaŵilikani mulasekela aŵakwaŵenu weŋka, mbafindo mucita ifyakucila napali ŵambi? Kansi neŵenafyalo taŵalacita fyopele' fyo? 48Pakuti pali fyefyo, muŵe ŵawaminine, koti nifyopele'fyo ifi ŵaWisinwe aŵaKwiulu ŵawaminine.
Currently Selected:
Matayo 5: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.