Matayo 6

1Cenjeleni mwilukucite'filuŋgeme fyenu pamenso aŵantu ati ŵalukutuŵona: ifyo tesi mulukupoka neli kantu kuli ŵaWisinwe aŵaKwiulu.

2Pakupela weŵo ifyakupa ifyaŋkumbu, tekutaŋgo'kulisya ulupeŋga, koti nifyefyo ifi ŵacita aŵakutumpaika mumasunagoge namumiseŵo, ati tupoke uŵuleme kuŵantu. Icinenene ndukumuŵuleni ati aŵo ŵapoka'kale ukulambulwa kwaŵo. 3Sombi weŵo, pakupela ifyakupa lukoso, ukuŵoko koŵe ukwacipiko tekufiisiŵe'fyo ifikulukucita ukuŵoko koŵe ukwalwine: 4ati ifyakupa fyoŵe fiŵe kumpelo; naŵaWisinwe aŵaŵona ifyakumpelo ŵakakulambula.

5Kaŵili, pakutembela mweŵo, tekulukuli koti ŵakutumpaika: pakuti ŵo ŵalatemwo'kwiminina nekutembela mumasunagoge namumansilampindwe ati tukaŵoneke kuŵantu. Icinenene ndukumuŵuleni ati ŵo ŵapoka'kale ukulambulwa kwaŵo. 6Sombi weŵo, pakutembela, winjile muŋanda yoŵe kucipembe, wisale-ko, ulukutembela kuli ŵaWisinwe aŵali kumpelo; naŵaWisinwe aŵaŵona ifyakumpelo ŵakakulambula. 7Nakaŵili, pakutembela, tekulukusimbula lukoso icisimbulesimbule, koti nifyefyo ificita aŵenafyalo: pakuti ŵo walalaŋguluka ati tukomfwanika pakuti pakulaŵila kwesu ukwinji. 8Lomba tekuŵapala ŵo: pakuti ŵa Wisinwe ŵaliisi ifyo ifi mulukupeŋgela, ili tamuŋgawalomba.

9Sombi mulukutembele'fi ati: MweŵaWisifwe aŵakwiulu, isina lyenu licindikwe. 10Uŵufumu bwenu bwise. Ukufwaya kwenu kucitwe, pansi pano koti nikwiulu. 11Mutupele lelo ifyakulya fyesu ifyalelo. 12Mutufitulucile ifyakuŵifya fyesu, koti nifyopele'fyo ifi tuŵacitila aŵo aŵatuŵifisya. 13Tekutufisya kufyakwesya, sombi mutupulusye kukuŵifya; pakuti bwenu uŵufumu, nemakosa, neŵuleme, insiku syonse isyamuyayaya. Ameni.

14Pakuti mweŵo kani mulaŵacite' ŋkumbu aŵantu aŵaŵifya kuli mweŵo, ŵaWisinwe aŵakwiulu naŵo ŵakamucitileni Iŋkumbu namweŵo. 15Sombi kani tamuwacite'ŋkumbu aŵantu aŵaŵifya kuli mweŵo, ŵaWisinwe naŵo taŵakamucitileni iŋkumbu pafyakuŵifya fyenu.

16Nakaŵili, pakukano'kulya mweŵo, tekulukuli nensoni pamenso, koti ŵakutumpaika; pakuti ŵo ŵalaliŵifya pamenso, ati tuŵoneke kuŵantu ati tulukukano kulya. Icinenene ndukumuŵuleni ati ŵo ŵapoka'kale ukulambulwa kwaŵo. 17Sombi weŵo, pakukano'kulya, usuŵe amafuta mumutwi, usambe nakumenso; 18wikaŵoneka kuŵantu ati ulukukano'kulya, sombi ulukuŵoneka kuli ŵaWisinwe aŵali kumpelo: popele ŵaWisinwe aŵaŵona ifyakumpelo ŵakakulambula.

19Tekulukuliŵuŋganisisya'maŵoni pansi pano apali uŵusumfi nendalabwa isilya, naŵasilumfundi awatowe'nanda nekwiŵa: 20sombi mulukulilamina' maŵoni kwiulu, ukutakuli uŵusumfi nendalabwa isilya, neli niwasilumfundi awatowe'nanda nekwiŵa; 21pakuti uko ukuli amaŵoni oŵe, ekuli nemutima woŵe.

22Inyale yamuŵili linso: popele kani ilinso lyoŵe liliweme, nemuŵili woŵe wonse uliswetele. 23Sombi kani ilinso lyoŵe liliŵipile, nemuŵili woŵe wonse wamfinsi. Peŋka kani ukutuŵa ukuli muli weŵo nimfinsi, imfinsi iyo ikulu! 24Papoʼmuntu uwisi ukupyunjila ŵawisikulu ŵaŵili; pakuti neli akafitilwa-po umo, umbi nekumutomwa; neli akalukwikalisya naumo, uyo umbi nekumupufya. Tamwisi ukupyunjila naŵaLesa nemaŵoni.

25Pakuti pali fyefyo ndukumuŵuleni ati: Tekulukuŵamba mumitima yenu pakuti pamyeo yenu, ati: Mbafindo twakulukulya? mbafindo twakulukunwa? neli nipakuti pamiŵili yenu, ati: Mbafindo twakufwala? Kansi umweo tolicilile napafyakulya, nemuŵili nawo tolicilile napafyakufwala? 26Ŵoneni ifyuni fyamwiulu, tafiŵyala-po, neli kuteŵula, neli kuloŋgela mumatala; sombi ŵaWisinwe aŵakwiulu ŵalafiteŵeta. Kansi mweŵo tamulificilile ukwakuti ifyo amakweŵo? 27Apa pali mweŵo mbaninani, pakuŵamba mumutima uwisi ukulunda-po pamweo wakwe ikubita? 28Nakaŵili mbanindo mulukuŵamba mumitima pakuti pafyakufwala? Laŋgulukeni ifyaŵalendya ŵamumpaŋga ifyakumena kwaŵo; tawapyuŋga-po neli kupika; 29sombi ndukumuŵuleniati neli ni Solomoni wonse muŵuleme bwakwe ŵonse taafwite-po koti liluŵa ilyakuŵe'fi. 30Kani ŵaLesa ŵalafwike'fi ifyani fyamumpaŋga ifiikele lelo, peŋka ŋgamailo nekuposwa mwisiko, tanje cine mweŵo, kansi taŵakamufwikeni, mweŵakucetekela kunini? 31Pakuti pali fyefyo, tekulukuŵamba mumitima ati: Mbafindo twakulukulya? Mbafindo twakulukunwa? Mbafindo twakufwala? 32Pakuti ifyo-fintu fyonse aŵenafyalo eŵafifwaya-fwaya; pakuti ŵaWisinwe aŵakwiulu ŵaliisi ati mulukufipeŋgele'fi-fintu. 33Sombi mweŵo mutaŋge mupensele uŵufumu bwaŵo, nekuluŋgama kwaŵo; popele ifintu ifyo fyonse fikalundwa-po pali mweŵo. 34Peŋka tekulukuŵamba mumitima pakuti pali mailo; pakuti mailo naye ali nefyakuŵamba ifyakwe. Akasuŵa kali nefyakuŵifya fyakako ifyakukumana.

Currently Selected:

Matayo 6: AAL59

Highlight

Copy

Compare