Matayo 4

1Peŋka'po ŵaYesu ŵalitwitwe kuMupasi mumpaŋga mukwesiwa kumusensesi. 2Peŋka, pakuŵulo'kulya utusuŵa amakumi ane, amasiku nao amakumi ane, ŵaliumfwile insala. 3Epakwisa uwakwesya, nekulaŵila kuli ŵo ati: Kani muli Wana ŵaŵaLesa, laŵileni-po kumabwe aya ati aaluke niwasiŋkwa, 4Sombi naŵo ŵaliasucile ati: Fililembelwe ati: Umuntu tekala-po nemweo kufimpwampwa fyasiŋkwa fyeŋka, sombi nikumasiwi onse afuma mukanwa kaŵaLesa. 5Peŋka umusensesi aliŵatwite kumusi uyo uswetelele; nekuŵekalika pali sunsa uwakwitempuli, 6nekulaŵila kuli ŵo ati: Kani muli Ŵana ŵaŵa Lesa, musotokelepo pansi; pakuti fililembelwe ati:

Ŵakasifunda iŋkalamba syaŵo ifyakuli mweŵo;

Popele sikamupinteni muminwe yasisyo,

Mwikaleŋga mukakonoke ulukasa kwibwe.

7ŴaYesu ŵalilaŵile kuli ye ati: Kaŵili fililembelwe ati: Tekwesya ŵaSikulu Lesa woŵe!

8Nakaŵili umusensesi aliŵatwite kulupili ulutali makosa, nekuŵalanjisya uŵufumu ŵonse ubwapansi, neŵuleme bwawuwo; 9nekulaŵila kuli ŵo ati: Ifi-fintu fyonse nakumupeleni, kanimufukame-ko pansi ukundambila. 10Peŋka ŵaYesu ŵalilaŵile kuli ye ati: Fuma-po Satana! pakuti fililembelwe ati: Ulukucindika ŵaSikulu Lesa woŵe, kaŵili ulukuŵapyunjila ŵo ŵeŋka! 11Peŋka'po umusensesi aliŵalekele; lomba neŋkalamba syaliisile nekuŵataŵataŵila.

12Pakumfwa ati Yoane alikacilwe, ŵa Yesu ŵalibwelele kucalo caGalili; 13peŋka alikucile kuNasaleti, nekwisakwikala kuKapanaumi, uli pambali yacisiŵa, mumipaka yaŵena-Sebuluni neŵena-Nafitali; 14ati fikapelelwe pamo nafyefyo ifyalaŵilwe kuli Yisaya uwakusimika, ati:

15Icalo caŵena-Sebuluni necalo caŵena-Nafitali,

Insila yakucisiŵa, bwisilya bwaJodeni,

Icalo caGalili icaŵenafyalo,

16Aŵantu aŵalukwikala mumfinsi Ŵaŵono'kutuŵa ukukulu;

Naŵaŵo aŵalukwikala mucalo namucinto camfwa,

Ukutuŵa kwaŵatuŵila.

17Ukufuma kumpindi iyo, ŵaYesu ŵalitaticile ukusimika, nekulaŵila ati: Alululeni imitima yenu, pakuti Uŵufumu bwaKwiulu bwapalamina.

18Naŵo ŵaYesu pakusesya icisiŵa caGalili, ŵalibwene awana-ŵaŋkasi ŵaŵili, Simoni uwailicilwe ati niPetilo, naAndaleya umukwaŵo ŵalukuteya'kombe mumenda, pakuti ŵo ŵakwikasye'saŵi. 19Peŋka nekuŵeŵa ati: Mundonde neŵo, ŋkamwaluleni ŵakwikasya'ŵantu! 20Naŵo nekuleka bwaŋgu utombe nekuŵalonda.

21Peŋka pakuya kuntanjile nekuŵona naŵambi ŵaŵili awana-ŵaŋkasi, Jakobo umwana wakwe Sebedai, naYoane umukwaŵo, ŵali mubwato pamo naSebedai wisiŵo, ŵalukulunda utombe twaŵo; naŵo ŵaliŵetile. 22Peŋka ŵalilekele bwaŋgu ubwato nawisiŵo nekuŵalonda.

23Peŋka'po ŵaYesu ŵalukupitana monse mucalo caGalili, ili ŵasambisya mumasunagoge aŵo, nekutulisya leeŵo Iciweme icaWufumu, nekuŵusya aŵantu aŵalukutende'myalo yonse nemalwele onse. 24Nempupo syaŵo syalitulicile monse mucalo caŵaSilya: lomba aŵantu ŵalukuŵaletela aŵalwasi ŵonse, aŵaiketwe imyalo namyalo nefyakuŵapensya, neŵaiketwe kufiŵanda, newaciŋkoniŋkoni, neŵakonaicile; naŵo ŵaliŵaŵusisye. 25Peŋka aŵafumine mucalo caGalili, necaDekapoli, nakuJelusalemi necalo caŵena-Juda necabwisilya bwaJodeni, amaŵumba akulu alukuŵalonda.

Currently Selected:

Matayo 4: AAL59

Highlight

Copy

Compare