Sakaliya 8
8
1Popele lyaliisile isiwi lyaŵaYawe ŵamaŵumba ilyakweŵa'ti: 2ŴaYawe ŵamaŵumba ŵalukulaŵile'fi ati, Ndi neŵulwisya paSayoni neŵulwisya uŵukulu, kaŵili ndi neŵulwisya pali wo neŵukali uŵukulu.
3ŴaYawe ŵalukulaŵile'fi ati: Ndibwelele kuSayoni, kaŵili ŋkekala pakati kaJelusalemi; peŋka Jelusalemi ukelikwa ati musi waŵucine; kaŵili ulupili lwaŵaYawe ŵamaŵumba lukelikwa ati lupili uluswetelele.
4ŴaYawe ŵamaŵumba ŵalukulaŵile'fi ati: Pakalukuciikele aŵalalume neŵanakasi aŵacekulu pamiseŵo yamujelusalemi, ŵonse umo umo ili ali neŋkoli yakwe muminwe pakuti paŵucekulu ubwinenene. 5Kaŵili imiseŵo yamumusi ikalukwiswile aŵanice aŵalalume neŵanakasi aŵalukufukana pamiseŵo yakuko.
6ŴaYawe ŵamaŵumba ŵalukulaŵile'fi ati: Kani fili fyakukaŋkamana pamenso aŵantu aŵa aŵakasyala-po pali syesyo-nsiku, kansi fiŋgawa fyakukaŋkamana napamenso anji neŵo? efilukulaŵila ŵaYawe ŵamaŵumba.
7ŴaYawe ŵamaŵumba ŵalukulaŵile'fi ati: Ŵoneni, ŋkawapulusya aŵantu ŵanji kucalo icakumutulesuŵa, nakucalo icakumbonsi; 8eli ŋkawaleta, naŵo ŵakalukwikala mukati kaJelusalemi; telyo ŵakalukuli ŵantu ŵanji, naneŵo nekulukuli nineŵaLesa ŵaŵo muli ŵucine namukuluŋgama.
9ŴaYawe ŵamaŵumba ŵalukulaŵile'fi ati: Ŋgaakose amaŵoko enu, mweŵo mwemulukumfwa pansiku sino ayamasiwi kutunwa twaŵakusimika, aŵo aŵali-po pakasuŵa ako akaŵicilwe icakwiŵacila-po iŋanda yaŵaYawe ŵamaŵumba, etempuli, ati ikeŵakwe. 10Pakuti ili tasiŋgafika insiku isyo, tapali-po amalambulo akumuntu, neli malambulo akunama; kaŵili tapali-po uŵutende kuli woyo uwalukufuma neli nikuli woyo uwalukwinjila, pakuti pakapondo; pakuti neŵo naliwasuŋgwile ŵonse ati ŵaŵucile aŵaŵyaŵo. 11Sombi ŵukumo nsikalukuli-po kuli ŵaŵo aŵasyele-po paŵantu aŵa koti nifyefyo ifi nali pansiku syakale, koku; efilukulaŵila ŵaYawe ŵamaŵumba. 12Pakuti pakalukuli-po imbuto syaŵutende: umufaina ukekata ifisepo fyauo; nemusili kaŵili nekuleŋgesya ifyakubwena-po fyauo; nemaulu nao nekupela icime caako; popele ŋkaŵapyanika aŵakusyala-po paŵantu aŵa ifyo-fintu fyonse. 13Popele fikacitwa ati, koti nifyefyo ifi mwali kufiŋga pakati kamisyoŵo yaŵantu, mwewananda yakuJuda namwewananda yakuIsilaeli, fyopele'fyo efi ŋkamupulusyeni, namweŵo nekuŵa lisyuko; mwitina, sombi ŋgaakose amaŵoko enu.
14Pakuti ŵaYawe ŵamaŵumba ŵalukulaŵile'fi ati: Koti nifyefyo ifi nalaŋgulucile ukumuŵifisyeni, ili ŵaŋkalipisye ŵawisinwe, naneŵo nekuŵulo'kwaluluka, efilukulaŵila ŵaYawe ŵamaŵumba; 15fyopele'fyo kaŵili efi nalaŋguluka pansiku sino ukucite'fiweme kuJelusalemi nakunanda yakuJuda; mwitina.
16Mfi ifintu ifi mukacita: Mwense umo umo mulaŵile ŵucine kuŵaŵyenu; musololole muli ŵucine namuŵutende mumilyaŋgo yenu; 17mwense tekusumina neli umo ukuwalaŋgulucile'fiwipile aŵaŵyenu mumitima yenu; tekutemwa ukulapa konse ukwakutumpaika; pakuti fyonse'fyo efintu ifi ndukufitilwa, efilukulaŵila ŵaYawe.
18Peŋka isiwi lyaŵaYawe ŵamaŵumba lyaliisile kuli neŵo ati:
19WaYawe ŵamaŵumba ŵalukulaŵile'fi ati: Ukulikanyo'kulya ukwakumwensi waŵuine, nekulikanyo'kulya ukwakuwaŵuisanu, nekulikanyo'kulya ukwakuwaŵuisanu naiŵili, nekulikanyo' kulya ukwakuwekumi, konse kukalukuli kusaŋgalala nekusemba nefitenje fyakutalasya kuwananda yakuJuda; pakuti pali fyefyo ŋgamutemwe ŵucine neŵutende.
20ŴaYawe ŵamaŵumba ŵalukulaŵile'fi ati: Fikalukucicitwa ati ŵakesa aŵantu nenjikale syakumisi iyinji; 21lomba injikale syakumusi umbi sikaya kumusi uŵyakwe, nekulaŵila ati: Ŋgatuye bwaŋgu mukupapatila iŋkumbu kuli ŵaYawe, namukuŵafwaisya ŵaYawe ŵamaŵumba; naneŵo ndukuya. 22Icine, aŵantu aŵenji nemisyoŵo ikosele ikesa mukuŵafwaisya ŵaYawe ŵamaŵumba mu Jelusalemi namukupapatile'ŋkumbu kuli ŵaYawe.
23ŴaYawe ŵamaŵumba ŵalukulaŵile'fi ati: Pansiku isyo pakacitwa ati, aŵantu ikumi, aŵapamilaka yonse yaŵenafyalo, ŵakekata nemukombelo waŋguwo yamuntu umuJuda, nekulaŵila ati: Tulukuya nenu, pakuti twaumfwa ati ŵaLesa ŵali nenu.
Currently Selected:
Sakaliya 8: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
