Sakaliya 7
7
1Lomba fyaliŵele pamwaka waŵuine uwakwikalika Daliu imfumu, ati isiwi lyaŵaYawe lyaliisile kuli Sakaliya pakasuŵa kaŵusine akamwensi waŵuisanu naine, emwensi waCisalefi. 2Lomba aŵakuBeteli ŵalitumine Syaleseli naLegemi-meleci neŵantu ŵaŵo, mukukombetela uluse lwaŵaYawe, 3nekulaŵila kuŵapapatilisi awamuŋanda yaŵaYawe ŵamaŵumba nakuŵakusimika ati: Kani niŋgalila pamwensi waŵuisanu nekulilekanya, koti nifyefyo ifi nalukucita inomyaka iyinji?
4Popele isiwi lyaŵaYawe ŵamaŵumba lyaliisile kuli neŵo ati: 5Kolaŵila kuŵantu ŵonse aŵamucalo nakuŵapapatilisi ati: Pakulukulikanyo'kulya nekulukulila pamwensi waŵuisanu napamwensi waŵuisanu naiŵili, pamyaka ino amakumi asanu naaŵili, kansi nipakuti pali neŵo epo mwalukulikanyo'kulya, kani nipakuti pali neŵo? 6Kaŵili pakulukulya nekulukunwa mweŵo, kansi tamulukulilila mweŵene, nekulukulinwina mweŵene? 7Kansi tekwelelwa ati mumfwe amasiwi ayo ŵalukuŵilika ŵaYawe muŵakusimika aŵakale, ili paciikele aŵantu nemasyuko mu Jelusalemi, namumisi yauo apasiŋgulucile, napakuŵa nenjikale icalo caNegebi necafinika?
8Peŋka isiwi lyaŵaYawe lyaliisile kuli Sakaliya ilyakweŵa'ti: 9ŴaYawe ŵamaŵumba ŵalilaŵile'fi ati:
Kamusololola ukuluŋgeme, mulukucitansyanya uluse neŋkumbu mwense mweŵene naŵene; 10tekukululusya mukakusyala neli mwana-wansiwa neli mwensu neli upeŋgele: kaŵili mwense tekulandakanya ifiŵipile mumitima yenu kuŵakwaŵenu. 11Sombi ŵalikene ukumfwa, nekuteya-ko icifusi cacikaka, nekusiŋka amatwi aŵo, ati ŵaŵule ukumfwa. 12Icine, ŵalikosesye imitima yaŵo koti lidaimande ilikosele, ŵeŋgesa mukumfwa ifunde nemasiwi, ayo ŵatumine ŵaYawe ŵamaŵumba nemupasi waŵo kukuŵoko kwaŵakusimika aŵakale; pakuti pali fyefyo lomba bwaliisile uŵukali uŵukulu ubwakutulila kuli ŵaYawe ŵamaŵumba. 13Popele fyaliŵele ati, koti nifyefyo ifi ŵalukwita, naŵo nekuŵulo'kukutika; fyopele'fyo naŵo ŵakalukwita, naneŵo tekuti ŋkakutikepo, efilukulaŵila ŵaYawe ŵamaŵumba; 14sombi ŋkawapalaŋganya pakati kamikoka yaŵantu yonse iyo taŵaisiŵile koti nikukapupulwa. Fyopele'fyo efi caonawilwe icalo panuma paŵo; lomba tapalipo uwapitile-mo neli nipakuya neli nipakubwela; pakuti ŵalicalwile icalo ico iciweme ati calukoso.
Currently Selected:
Sakaliya 7: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
