Sakaliya 6
6
1Lomba nalilakamine liŵili kwiulu nekuŵona, kusaŋga mkuŋgolofwana sine isyaŋkondo silukufuma pakati kamapili aŵili; lomba amapili ayo mapili aluŵemba. 2Wakafwalo aŵakasicile ŵalikacilwe kuŋgolofwana yakutaŋga: nakuŋgolofwana yaŵusiŵili kwali ŵakafwalo aŵafitile; 3nakuŋgolefwana yaŵusitatu kwali ŵakafwalo aŵatuŵile; nakuŋgolofwana yaŵusine kwali ŵakafwalo aŵali nemaŵalasi, aŵaswesi. 4Popele naliasucile nekulaŵila kuŋkalamba iyalukwambala naneŵo ati: Mbaŵando aŵa, mweŵaSikulu ŵanji?
5Lomba iŋkalamba yaliasucile nekulaŵila kuli neŵo ati: Aŵa fipupu fyamwiulu fyonane, ifilukufuma kuli ŵaSikulu ŵapacalo conse, uko fyaimakene pamenso aŵo. 6Ŵakafwalo aŵo aŵafitile aŵali neŋgolofwana ŵalukuya kucalo cakunofu; naŵo aŵatuŵile ŵalukuŵalonda; naŵo aŵali nemaŵalasi ŵalukuya kucalo cakusaufu. 7Peŋka aŵo aŵaswesi ŵalifumine nekufwaya ukuya mukupitana pacalo; popele yalilaŵile ati: Kamuyeni, mupitane pacalo. Fyopele' fyo kaŵalukupitana pacalo.
8Popele yalinjitile nekulaŵila kuli neŵo ati: Ŵona, aŵo aŵalukuya kucalo cakunofu ŵaleŋgesya ati umupasi wanji utusye mucalo cakunofu.
9Lomba isiwi lyaŵaYawe lyaliisile kuli neŵo ati: 10Kopoka kuli ŵaŵo aŵali muli ŵukaili, ekuli Keledai nakuli Tobiya nakuli Jedaya; lomba wise weŵo pakasuŵa ako kopele, winjile muŋanda yakwe Josaya umwana wakwe Sefaniya, uko ŵaficile ukufuma kuBabiloni; 11icine, upoke kuli ŵo isilifa negolide, ukacite imintinya, umufwike Josyua umwana wakwe Jeosadaci, umupapatilisi umukulu, mumutwi. 12Kaŵili ulaŵile kuli ye ati: ŴaYawe ŵamaŵumba ŵalukulaŵile'fi ati:
Ŵona, ŋgu umuntu uyu isina lyakwe eMutano; naye akamena pamupunda wakwe; kaŵili akeŵaka itempuli lyaŵaYawe; 13icine niye eukeŵaka itempuli lyaŵaYawe; naye akapinto'ŵuleme, nekulukwikala nekwikalika peteŵe lyakwe; kaŵili akalukuli mupapatilisi peteŵe lyakwe; popele pakalukuli ukufunda kwaŵutende pali ŵo ŵoŵilo.
14Lomba imintinya ikaŵa yakwe Kelemi, neyakwe Tobiya, neyakwe Jedaya, neyakwe Keni umwana wakwe Sefaniya; ikalukuli yakulaŋgulusya mwitempuli lyaŵaYawe. 15Peŋka aŵo aŵali ukutali ŵakesa mukwiŵaka mwitempuli lyaŵaYawe; eli mukesiŵa ati niŵaYawe ŵamaŵumba aŵantumine kuli mweŵo. Popele ifyo fikacitwa, kani mukalukukuticisya nemuŋkonsya isiwi lyaŵaYawe Lesa wenu.
Currently Selected:
Sakaliya 6: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
