Sakaliya 5
5
1Popele apo nalilakamine liŵili kwiulu nekuŵona, lomba kusaŋga nikucakupeta cebuku icilukupalala. 2Popele yalilaŵile kuli neŵo ati: Ulukuŵone'ndo? Peŋka naliasucile ati, Naŵone'cakupeta cebuku icilukupalala; uŵutali bwacico makubita amakumi aŵili, nebwipi bwacico makubita ikumi. 3Peŋka yalilaŵile kuli neŵo ati, Iei ecakufiŋga icilukupita pamenso pacalo conse; pakuti aŵantu ŵonse ulukwiŵa akonalwa koti nifyefyo ifilembelwe kuno bwisilya bwacico; nawoyo ulukulapa naye eukonalwa koti nifyefyo ifilembelwe kulya bwisilya bwacico. 4Nakuleŋgesya ati ciye, efilukulaŵila ŵaYawe ŵamaŵumba; lomba cikenjila muŋanda yamuno namuŋanda yawoyo ulukulapa ifyakuŵepa mwisina lyanji, nekulukwikala mukati muŋanda yakwe, nekwilya lukoso pamo nefiti fyakuko nemabwe akuko.
5Lomba iŋkalamba iyalukwambala naneŵo yalifumine, nekulaŵila kuli neŵo ati: Lakamina kwiulu pano, uciŵone'ci icilukufuma. 6Peŋka neŵo ati: Mbacindo? Nayo ati: Ici niefa ulukufuma. Nayo kailaŵila kaŵili ati: Ici ekupalana kwaŵo mucalo conse; 7(kuŵona, palisuntwilwe italanto lyaciledi;) nacici kaŵili mwanakasi ulukwikele mukati muli efa. 8Peŋka yalilaŵile ati: Uyu eŴumbifi! lomba yalimuposele pansi mukati muli efa, nekuposa-po pakanwa kapapo iciledi icilemene.
9Popele apo nalilakamine kwiulu nekuŵona, kusaŋga nikuŵanakasi ŵaŵili ŵalukwima, ŵali necipupu mumapindo aŵo; pakuti ŵali nemapindo koti mapindo ekoloŋgo; lomba ŵalimusuntwile efa peulu pakati kacalo neulu. 10Peŋka nalilaŵile kuŋkalamba iyo iyalukwambala naneŵo ati: Aŵa ŵalukumutwalapi efa? 11Nayo nekulaŵila kuli neŵo ati: Nimukumwiwacile'nanda mucalo caSina; peŋka pakwansikwa, akekalikwa apo pamupunda wakwe umwine.
Currently Selected:
Sakaliya 5: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
