Sakaliya 4
4
1Popele iŋkalamba iyalukwambala naneŵo yaliisile liŵili nekumbusya koti nifyefyo ifilukuŵusiwa umuntu mutulo. 2Peŋka yalilaŵile kuli neŵo ati: Ulukuŵone'ndo? Naneŵo ati: Naŵona, lomba kusaŋga nikucakuteka-po inyale icegolide conse lukoso, cili nembale yakuko peulu lyacico, nenyale syakuko sisanu nasiŵili pali co, nefyamilomo fisanu nafiŵili fisanu nafiŵili kunyale syonse imo imo isili peulu pali co; 3pamo nemiti yamaolife iŵile muceni cacico, umbi kulwine lwambale naumbi nawo kucipiko.
4Popele naliasucile nekulaŵila kuŋkalamba iyalukwambala naneŵo ati: Mbafindo ifi mweŵaSikulu ŵanji? 5Peŋka iŋkalamba iyalukwambala naneŵo yaliasucile nekulaŵila kulineŵo ati: Tawisi ifili ifi? Neŵo ati: Koku, mweŵaSikulu ŵanji. 6Popele yaliasucile nekulaŵila kuli neŵo ati: Ili esiwi lyaŵaYawe ilyakuli Selubabeli ilyakweŵa'ti: Tafikacitwa kumakosa neli nikuŵukulu, sombi nikumupasi wanji, efilukulaŵila ŵaYawe ŵamaŵumba. 7Mbaniwenani welupili ulukulu? Ukaŵa nipantu apaseleŵele pamenso akwe Selubabeli; peŋka ye akaleta ibwe lyakumutwi ili waŵilika ati, Luse! Uluse luŵe kuli lyo!
8Kaŵililyaliisile isiwi lyaŵaYawekuli neŵo ati:
9Iminwe yakwe Selubabeli yaiŵaka icapansi cananda iyi; kaŵili iminwe yakwe eikaisilisya; eli ukesiŵa ati niŵaYawe ŵamaŵumba aŵantuma kuli mweŵo. 10Pakuti mbaninani upufisye akasuŵa kafintu finini? Pakuti wakasaŋgalala nekuŵona icakulunjika-ko pakwiŵaka cili muminwe yakwe Selubabeli, eŵaŵo ŵasanu naŵaŵili aŵali menso aŵaYawe, alukupitana ponse pacalo capansi.
11Popele naliasucile nekulaŵila kuli yo ati: Mbeyi-miti yamaolife ili palwine lwacakuteka-po inyale napacipiko cacico nindo? 12Peŋka kaŋgasuka liŵili nekulaŵila kuli yo ati: Mbeyi-mitano iŵili yamaolife nindo, iŵambakene nefyamilomo ifyegolide fyoŵilo ifilukuliitulwila amafuta egolide? 13Nayo kaiŋgasukapo nekulaŵila ati: Tawisi ifili ifi? Kumfwa neŵo ati: Koku, mweŵaSikulu ŵanji. 14Telyo iŋgalawila ati: Ifi eŵana ŵakusufiwa ŵoŵilo aŵemakana muceni caŵaSikulu ŵacalo conse icapansi.
Currently Selected:
Sakaliya 4: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
