Sakaliya 14
14
1Ŵoneni, kalukwisa akasuŵa kaŵaYawe, ili fikaaŵanika ifyakutapa fyoŵe mukati muli weŵo. 2Pakuti ŋkawuŋganya imisyoŵo yonse yaŵantu ati ilwe naJelusalemi: lomba umusi ukapokwa, nemananda nekutapwa, neŵanakasi nekupanjilisiwa; peŋka uluŵali lumo lwamusi lukaya muli ŵukaili; sombi aŵantu aŵakasyala-po taŵakapinikwa kumusi, tau. 3Telyo ŵaŋgema ŵaYawe, nekulwa nemisyoŵo iyo, koti nifyefyo ifi ŵalwile pakasuŵa kaŋkondo, 4Lomba amakasa aŵo akemakana akasuŵa ako palupili lwamaolife, ululi pamenso akujelusalemi kumutulesuŵa; popele ulupili lwamaolife lukapanduka pakati ukufuma kumutulesuŵa nekufika nakumbonsi; peŋka pakaŵa umukolo uwakuti uŵukulu; lomba uluŵali lumo lwalupili lukatelela kunofu, nalumbi uluŵali nekutelela kusaufu. 5Popele mukafyuka mumukolo wamapili anji; pa kuti umukolo wamapili akafika nakuAsali; icine, mukaŵutuka koti nifyefyo ifi mwaŵutucile kucitulika pansiku syakwe Usaya imfumu yakuJuda; peŋka ŵaYawe Lesa wanji ŵakesa, newaluŋgeme ŵonse pamo namweŵo. 6Lomba fikacitwa pakasuŵa ako ati tapakalukuli-po neli kutuŵa tuu, neli kufita bwii, koku; 7sombi kakalukuli kasuŵa kamo akesiŵilwe kuli ŵaYawe; tapakalukuli-po neli kasuŵa neli ŵusiku; sombi fikacitwa ati pampindi yaciŋgulo eli pakatuŵa.
8Peŋka fikacitwa pakasuŵa ako ati amenda amweo akakuŋka ukufuma muJelusalemi, ambi akulekana pakati akaya kucisiŵa cakumutulesuŵa, naambi nao nekuya kucisiŵa cakumbonsi; fikalukucitwa fyopele'fyo ulusuŵa nemwela. 9Popele ŵaYawe ŵakalukuli nimfumu yapacalo conse icapansi; pakasuŵa'ko ŵaYawe ŵakalukuli ŵamo, nesina lyaŵo nalyo limo. 10Icalo conse cikaalulwa koti nimpanta, ukufuma kuGeba ukufika nakuLimoni kusaufu kwakuJelusalemi; lomba ukasuntulwa nekwikala pamupunda wauo, ukufuma kumusiko waBenjamini ukufika nakuntu kwamusiko wakutaŋga, nakumusiko wakwikoŋko; nekufuma kunanda itali iyakwe Kananeyeli ukufika nakunsanso syamfaina isyamfumu. 11Peŋka aŵantu ŵakekala-mo' mo; lomba tapakalukuli-po ukufiŋga liŵili, tau; sombi Jelusalemi ukalukwikala nekulamwa.
12Lomba umwalo uyo ŵaYawe ŵakaŵapama-ko aŵantu ŵonse aŵalwile naJelusalemi niwuyu: Umunefu waŵo ukaŵola ili ŵaciimakene pamakasa aŵo, nemenso aŵo nekuŵola mufikolobwa fyao, nelumini lwaŵo nekuŵola mukanwa kaŵo. 13Peŋka fikacitwa pali kako-kasuwa ati pakesa pakati pali ŵo ukufuluŋgana ukukulu ukwakufuma kuli ŵaYawe; lomba ŵonse umo umo akekata ukuŵoko kwamuŵyakwe, nako ukuŵoko kwakwe nekwimina ukuŵoko kwamuŵyakwe. 14Kaŵili Juda naye akalwa na Jelusalemi; lomba amaŵoni amisyoŵo yonse isiŋgulucile akawuŋganisiwa pamo, igolide, nesilifa, nefyakufwala mpaŋgana mpaŋgana, 15Kaŵili fyopele' fyo efikalukuli umwalo wakuli kafwalo, newakwimyuli, newakuŋgamela, newakumboŋgolo, newakunama syonse isikalukuli mufisasa ifyo, koti mwalo uyu.
16Lomba fikacitwa ati aŵo ŵonse aŵakusyala-po pali yeyo-misyoŵo yonse iyaisile Jelusalemi, ŵakalukuya imyaka namyaka mukucindike'Mfumu Yawe wamaŵumba, namukucite'citenje camitanda. 17Lomba fikacitwa ati aŵantu ŵonse aŵapafisolo fyonse ifyapacalo capansi, aŵakuŵulo'kuya kujelusalemi mukucindike'Mfumu Yawe wamaŵumba, pali ŵo tapakaloka-po neli nimfula. 18Kaŵili kani icisolo cakuIjipiti ciŵule ukuya, neli kufika, taikaloka-po pali co; pakalukuli-po umwalo uyo ŵaYawe ŵakapama-ko imisyoŵo itaikasumina ukuya mukucite'citenje camitanda. 19Uyo eukalukuli mulandu wakuIjipiti, nemulandu wakumisyoŵo yonse itaiya mukucite'citenje camitanda.
20Pakasuŵa ako pakalukuli pandiŵu isyakuli ŵakafwalo, “Uswetelele kuli ŵaYawe”; kaŵili inoŋgo isyamuŋanda yaŵaYawe sikapalana nembale isili pamenso econto. 21Icine, inoŋgo syonse isyamuJelusalemi namuJuda sikalukuswetelele kuli ŵaYawe ŵamaŵumba; lomba aŵo ŵonse aŵakupose'milambu ŵakesa nekusiŵula, nekwipicila-mo; kaŵili pakasuŵa'ko tapakalukuli-po liŵili umuKanani muŋanda yaŵaYawe ŵamaŵumba.
Currently Selected:
Sakaliya 14: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
