Sakaliya 12
12
1Umulandu wesiwi lyaŵaYawe uwakuIsilaeli.
ŴaYawe, aŵatanicile amaulu, nekuŵika ifyapansi ifyakucalo capansi, nekuleŋga umupasi wamuntu mukati muli ye, ŵalukulaŵile'fi ati:
2Ŵoneni ŋkawalula Jelusalemi ati niŋkomeci yakukaŋkasimika kuŵantu ŵonse awasiŋgulucile, kaŵili napaJuda napo fikalukuli-po pakusiŋgulukwa kwaJelusalemi.
3Lomba pakasuŵa ako pakaŵa ati ŋkawalula Jelusalemi ati libwe ililemenene kuŵantu ŵonse; ŵonse aŵakuliimya ŵakalaswa ukwakuti; peŋka imisyoŵo yonse iyapacalo capansi ikawuŋganina pamo kuli wo.
4Pakasuŵa ako, efilukulaŵila ŵaYawe, ŋkapama ŵakafwalo ŵonse kukukaŋkamuka, neŵakwendela-po ŵonse kuŵusilu; peŋka ŋkalawa nemenso anji pananda yakuJuda, nekupama ŵakafwalo ŵonse ŵaŵantu neŵupofu. 5Lomba imfumu syakuJuda sikalaŵila mumitima yasisyo ati: Injikale syakuJelusalemi makosa anji muli ŵaYawe ŵamaŵumba, Lesa wasisyo.
6Pakasuŵa ako ŋkasyalula imfumu syakuJuda koti ciyiŋga icili nemulilo pakati paŋkuni, nakoti mumosyo wamulilo pakati pamipo yamasaka; popele sikalya aŵantu ŵonse awasiŋgulucile kulwine nakucipiko; lomba Jelusalemi ukekala liŵili pamupunda wauko uwine, peŋka' po apali Jelusalemi. 7Kaŵili ŵaYawe wakataŋgo'kupulusya amasema akuJuda, bwiŋgesa uŵuleme bwananda yakwe Dafidi neŵuleme bwanjikale syakuJelusalemi mukukusiwa ukucila napaJuda.
8Pakasuŵa ako ŵaYawe ŵakasilwila injikale syakuJelusalemi; lomba iyo inacile pakati pali syo pakasuŵa ako ikalukuli koti niDafidi; kaŵili iŋanda yakwe Dafidi ikalukuli koti niŵaLesa, koti niŋkalamba yaŵaYawe pamenso asisyo. 9Lomba pakasuŵa ako pakaŵa ati ŋkafwaya ukuyonala imisyoŵo yonse yaŵantu iyakuŵucila Jelusalemi.
10Peŋka ŋketila pananda yakwe Dafidi, napanjikale isyakuJelusalemi, umupasi waluse nekutembela; lomba sikalolesya-ko kuli neŵo nesyatibwile; kaŵili sikamulilila koti nifyefyo ifi umuntu alukumulilila umwana umwalalume uli eŋka, nekumuŵombomanina koti nifyefyo ifi umuntu alukuŵombomanina umwana wakwe umuŵele.
11Pakasuwa ako pakalukuli ukulila ukukulu mujelusalemi, koti kulila kwakuKadadi-limoni mumukolo waMejido. 12Lomba icalo cikalukulila, ifisolo fyonse cimo cimo ceŋka: icisolo cakunanda yakwe Dafidi ceŋka, neŵakasi ŵaŵo naŵo ŵeŋka; necisolo cakunanda yakwe Natani ceŋka, neŵakasi ŵaŵo naŵo ŵeŋka: 13necisolo cakunanda yakwe Lefai ceŋka, neŵakasi ŵaŵo naŵo ŵeŋka; necisolo caŵena-Simyai ceŋka, neŵakasi ŵaŵo naŵo weŋka: 14nefisolo fyonse ifyakusyala-ko, ifisolo fyonse cimo cimo ceŋka, neŵakasi ŵaŵo naŵo weŋka.
Currently Selected:
Sakaliya 12: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
