Sakaliya 10
10
1Mulombe imfula kuli ŵaYawe pampindi yamfula iyakupela-ko, ekuli ŵaYawe awaleŋga utumpesimpesi; naŵo ŵakaŵapela ŵacipumpwe, nekuŵanela ŵonse icani pacembelelo. 2Pakuti watelafi walilawile ifyalukoso; neŵalaye na wo nekuwono'wufi: walukulawila ifiloto ifyakutumpaika, nekusaŋgalasya ukwalukoso. Pakuti pali fyefyo aŵantu ŵalenda insila yaŵo koti nimbelele; ŵa likatasiwe, pakuti tapali-po umwembesi.
3Uŵukali bwanji ŵulukuŵaacila aŵembesi; eli ŋkawapama ŵapepe; pakuti ŵaYawe ŵamaŵumba ŵaliisile mukuŵona itaŋga lyaŵo, enanda yakuJuda: ŵakaŵaalula koti nikafwalo waŵo uweme muŋkondo, 4Kuli ŵo eko kukafuma ibwe lyamucilulu; nakuli ŵo eko kukafuma ulupopo; nakuli ŵo eko kukafuma uŵuta bwaŋkondo; nakuli ŵo kukafuma kaŵili awakukululusya ŵonse pamo.
5Popele ŵakalukuli koti ŵalalume aŵakosele, aŵalukunyanta mumatipa amumiseŵo pakulwa; lomba ŵakalwa, pakuti ŵaYawe ŵali naŵo; peŋka aŵalukwenda pali ŵakafwalo wakafuluŋgana. 6Lomba neŵo ŋkakosya awananda yakuJuda, nekupulusya awananda yakwe Josefi, nekuŵabwesya pakuti ndi neŋkumbu pali ŵo; naŵo ŵakaŵa koti nsinaŵaposele-po; pakuti neŵo nineŵaYawe Lesa waŵo; ŋkawomfwa. 7Peŋka aŵakuEfilayimi ŵakapalana nemwalalume ukosele; umutima waŵo ukasaŋgalala koti nikumfaina; icine, neŵana ŵaŵo ŵakaciŵona nekusemba; imitima yaŵo ikasaŋgalalila muli ŵa Yawe.
8Ŋkaŵalisisya umunsu nekuŵaŵuŋganya; pakuti naŵaluŵula; popele ŵakafula koti nifyefyo ifi ŵafulile nekale. 9Lomba neŵo ŋkawaminsa pakati paŵantu; naŵo wakandaŋgulucila mufyalo ifyakutali; ŵakalukwikala neŵana ŵaŵo, lomba nekubwela. 10Kaŵili ŋkaŵabwesya ukuŵafumya mucalo caIjipiti, nekuwawuŋganisya ukuŵafumya kuAsiliya; eli ŋkawafisya kucalo caGilyadi nakuLebanoni; lomba nemupunda taukakumana kuli ŵo. 11Peŋka ŵakapita mucisiŵa cakupeŋga, nekupama amaŋkapa amucisiŵa; popele ŵonse uŵutali bwapansi ubwakuNika ŵukapwa, nekulitota kwakuAsiliya nekuwisiwa pansi, neŋkoli yawufumu iyakuIjipiti nekukumbuluka. 12Lomba ŋkawakosya muli ŵaYawe; naŵo ŵakalukupitana mwisina lyaŵo, efilukulaŵila ŵaYawe.
Currently Selected:
Sakaliya 10: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
