Sakaliya 1
1
1Pamwensi waŵuisanu naitatu, pamwaka waŵuiŵili wakwe Daliu, lyaliisile isiwi lyaŵaYawe kuli Sakaliya, umwana wakwe Beleciya, umwana wakwe ldo, uwakusimika, nekulaŵila ati:
2ŴaYawe ŵaliŵafitilwe ukwakuti ŵawisinwe. 3Pakuti pali fyefyo ulaŵile kuli ŵo ati: ŴaYawe ŵamaŵumba ŵalukulaŵile'fi ati: Alulucileni kuli neŵo, efilukulaŵila ŵaYawe ŵamaŵumba, eli ŋkaalulucila kuli mweŵo, efilukulaŵila ŵaYawe ŵamaŵumba. 4Tekulukuli koti nifyefyo ifi ŵali ŵawisinwe, aŵo ŵalukuŵilicisisya aŵakusimika ŵakale, nekulaŵilaati: ŴaYaweŵamaŵumba ŵalukulaŵile'fi ati: Alulukeni pano, mufume kunsila syenu isiŵipile nakufyakucita fyenu ifiŵipile; sombi ŵo taŵaumfwilepo neli kuŋkutika neŵo, koku, efilukulaŵila ŵaYawe ŵamaŵumba. 5Mbaŵali kwisa ŵawisinwe? Neŵakusimika, kani ŵali nemweo uwamuyayaya? 6Sombi amasiwi anji nemafunde anji, ayo naŵafundile aŵapyunjisi ŵanji aŵakusimika, kani taaŵasanjile ŵawisinwe? Naŵo nekwaluluka nekulaŵila ati: Koti nifyefyo ifi ŵalaŋgulucile ŵaYawe ŵamaŵumba ukutucita, koti ninsila syesu nakoti fyakucita fyesu, fyopele'fyo efi ŵatucitile.
7Pakasuŵa kakuleŋga amakumi aŵili nensiku sine, akamwensi wakupalukamo, emwensi waSyebati, pamwaka waŵuiŵili uwakwikalika Daliu, lyaliisile isiwi lyaŵaYawe kuli Sakaliya, umwana wakwe Beleciya, umwana wakwe Ido, uwakusimika, nekulaŵila ati:
8Nalibwene uŵusiku, lomba ŵoneni, nikumuntu ulukwenda pali kafwalo ukasicile; peŋka aliimakene pakati pamiyadasi mumukolo; lomba panuma pakwe pali naŵambi ŵakafwalo, aŵakasicile, neŵaswesi, neŵatuŵile. 9Peŋka neŵo nalilaŵile ati: Mbaŵando aŵa, Sikulu? Kumfwa iŋkalamba iyalukwambala naneŵo yalilaŵile kuli neŵo ati: Nakukulanjisya ifi ŵali aŵa. 10Popele umuntu uwaimakene pakati pamiyadasi aliasucile nekulaŵila ati: Aŵa niŵaŵo aŵo ŵatumine ŵaYawe mukupitana pacalo. 11Lomba ŵo ŵaliyasucile iŋkalamba yaŵaYawe iyaimakene pakati pamiyadasi, nekulaŵila ati: Twali twapitana pacalo, peŋka ŵoneni, icalo conse ciliikele celele, cili neŵutende.
12Eli yaasucile iŋkalamba yaŵaYawe nekulaŵila ati: MweŵaYawe ŵamaŵumba icisyele impindi yasyani ili tamuŋgawa neŋkumbu pa Jelusalemi napamisi yakuJuda, iyo iyi mwalukufitilwa imyake'yi amakumi asanu naaŵili? 13Peŋka ŵaYawe ŵaliyasucile iŋkalamba iyalaŵile naneŵo, nemasiwi aweme, emasiwi akusaŋgalasya.
14Lomba iŋkalamba iyalukwambala naneŵo yalilaŵile kuli neŵo ati: Simika, ulaŵile ati: ŴaYawe ŵamaŵumba ŵalukulaŵile'fi ati: Ndi neŵulwisya pajelusalemi napaSayoni neŵulwisya uŵukulu. 15Kaŵili ndiŵafitilwe ukwakuti aŵenafyalo aŵekele ili wasaŋgawuka: pakuti ili nakalipile panini lukoso, ŵo ŵaliensesye ukukululula. 16Pakuti pali fyefyo ŵaYawe ŵalukulaŵile'fi ati: Ndibwelele kuJelusalemi neŋkumbu; iŋanda yanji ikeŵacilwa-mo, efilukulaŵila ŵaYawe ŵamaŵumba; kaŵili umwando wakupima-ko ukafuŋgululwa paJelusalemi. 17Kosimika liŵili, ulaŵile ati: ŴaYawe ŵamaŵumba ŵalukulaŵile'fi ati: Imisi yanji ikakuŋka nemasyuko liŵili; lomba ŵaYawe wakasaŋgalasya Sayoni liŵili, nekusalulula Jelusalemi liŵili.
18Lomba naliinwine amenso anji nekuŵona, peŋka kusaŋga nikumaseŋgo ane. 19Popele nalilaŵile kuŋkalamba iyalukwambala naneŵo ati: Mbaando aya? Nayo kaiŋgasuka ati: Ayaemaseŋgo apalaŋgenye Juda naIsilaeli na Jelusalemi.
20Popele ŵaYawe ŵalindanjisye aŵafusi ŵane. 21Lomba nalilaŵile ati: Mbaŵalukwisa mukucite'ndo aŵa? Naŵo kaŵalaŵila ati: Ayo emaseŋgo apalaŋgenye Juda, fyopele'fyo tapali-po neli umo uwinwine umutwi; sombi aŵa eŵaisile mukutinisya nekupama pansi amaseŋgo aŵenafyalo, aŵo aŵasuntwile iseŋgo lyaŵo kucalo caŵaJuda mukucipalaŋganya.
Currently Selected:
Sakaliya 1: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
