Obadiya 1
1
1Ukuŵona kakwe Obadiya. ŴaSikulu Yawe ŵalukulaŵile'fi ifyakuEdomi ati: Tuliumfwile ifyeŵo ifitulile kuli ŵaYawe; iŋkalamba ilituminwe pakati paŵenafyalo ukulaŵila ati: Imeni, ŋgatumuŵucile, tulwe nakwe. 2Ŵona, ndikucefesye pakati paŵenafyalo: ulipufisiwe ukwakuti. 3Ukulitota ukwamumutima woŵe kwakutumpaika, wewikele mumpako isyamucibwe, wewikele peulu apatali; weulaŵila mumutima woŵe ati: Mbaninani ukanselwisya pansi? 4ŴaYaweati: Naŋgaŵaati wimekwiulu lukoso koti ninsika, naŋgaŵa ati icinsa coŵe ciikale pakati patuŵaŋgaŵaŋga, ŋkakuselwisya pansi ukukufumyo'ko. 5Kani ŵafike kuli weŵo ŵasilumfundi, kani ŵaŋo uŵusiku, (ele! ulipinicilwe!) kansi ŵo tekwiŵa lukoso, ili taŵaŋgaŵa nefyakukumana? Kani ŵakwisile aŵakuswa imfaina, kansi ŵo tekusya isyakupupula? 6Mbefyakwe Eso, ifi fifwaiwa! Mbamaŵoni akwe afisilwe ifi afisululwa! 7Aŵantu ŵonse aŵalukofwana naweŵo ŵalikusindicisye, ŵakufisya nakumupaka; aŵantu aŵalukwikala naweŵo neŵutende ŵakutumpaika weŵo, nekucila napali weŵo; uyo uwakulye'fyakulya fyoŵe alaŵambo'ŵuciŋga pansi pali weŵo: muli ye tamuli akalaŋgo. 8ŴaYawe ati: Ako-kasuŵa kani teti ŋkaŵonale aŵamano ukuŵafumya muEdomi, nekukafumya akalaŋgo kulupili lwakwe Eso? 9Kaŵili aŵantu ŵoŵe aŵamakosa, weTemani, wakakaŋkamuka, pakuti ŵonse lukoso ŵakapinikwa kulupili lwakwe Eso ukuŵepailila. 10Pakuti pawuŋgwa uŵo uŵucitilwe kuli Yakobi umukwanu, insoni sikafimba-po pali weŵo, kaŵili ukalukupinicililwe insiku pee. 11Pakasuŵa ako aka waimine paluŵali pambi, akasuŵa ako ŵapintile amaŵoni akwe aŵensu ukwapokolola, ako ŵainjilile pamilyaŋgo yakwe aŵenafyalo, nekuteyela ifipa Jelusalemi, naweŵo kansi wali koti wamwiŵumba lyaŵo. 12Sombi wikatamba-po pakasuŵa kamukwanu, pakasuŵa kamwiko wakwe; kaŵili wikasemba paŵana ŵakwe Juda pakasuŵa kakonalwa kwaŵo; nakaŵili tekulawile'fyamaŋkuluŵinda pakasuŵa kakupeŋga. 13Tekwinjila mumulyaŋgo uwakuŵantu ŵanji pakasuŵa kakukatasiwa kwaŵo; icine, tekulola pakupeŋga kwaŵo pakasuŵa kakukatasiwa kwaŵo, neli kukumako kumaŵoni aŵo pakasuŵa kakukatasiwa kwaŵo. 14Kaŵili tekwimakana pamasilampindwe, mukuŵapinika aŵo aŵakwe aŵalukuŵutuka; neli kuŵaloŵela aŵo aŵakwe aŵakusyala pakasuŵa kakupeŋga, 15Pakuti akasuŵa kaŵaYawe kalipalamine paŵantu aŵamikoka yonse: fyopele'fyo ifi wacita, koti nifyopele'fyo ukacitilwa; ukucita koŵe kukabwela pamutwi poŵe wemwine. 16Pakuti fyopele'fyo ifi mwanwine palupili lwanji uluswetelele, koti nifyopele'fyo aŵantu aŵamikoka yonse ŵakalukunwanwanwa, icine, ŵakanwa nekumina, nekuŵa koti taŵafyelwe. 17Sombi palupili lwaSayoni pakalukuli-po aŵakupuluka, lukaŵa luswetelele; kaŵili aŵamuŋanda yakwe Yakobi ŵakalukwikele nemaŵoni aŵo. 18Nakaŵili aŵamuŋanda yakwe Yakobi ŵakalukuli mulilo, newamuŋanda yakwe Josefi naŵo ŵakalukuli kuŵyataka kwamulilo; sombi aŵamuŋanda yakwe Eso ŵakalukuli koti fisiŋga fyacani; lomba ŵakalukwacila pakati pali ŵo nekuŵoca: popele tapakasyala-po neli umo uwamuŋanda yakwe Eso; pakuti ŵaYawe eŵafilaŵila. 19Popele aŵakusaufu ŵakalukuli nelupili lwakwe Eso; kaŵili aŵo aŵakucinika ŵakalukuli necalo caŵaFilisiti: naŵo ŵakalukuli nempaŋga yakwe Efilayimi, nempaŋga yakuSamalya: kaŵili Benjamini akalukuli naGilyadi. 20Popele ŵukaili bweŵumbe'li ilyaŵana ŵakwe Isilaeli, aŵali pakati paŵaKanani, ŵakalukuli necalo ukufika nakuSyalefati; kaŵili ŵukaili bwaJelusalemi, uŵuli muSefaladi, ŵukalukuli nemisi iyakusaufu. 21Nakaŵili aŵakupulusya ŵakanina palupili lwaSayoni mukusololola iceŵo calupili lwakwe Eso; neŵufumu naŵoŵukalukuli bwaŵa Yawe.
Currently Selected:
Obadiya 1: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
