Amosi 9
9
1Naliŵabwene ŵaSikulu ŵaliimakene muceni caconto; naŵo ati, Kopama imitwi yakumilyaŋgo ati pafibwambilo ŋgapateŋkane, wisansawile pamitwi yaŵo yonse: lomba ŋkawepaya aŵakusyala-po ŵonse lukoso kumpoko; tapakafyuka-po pali ŵo neli umo; tapakapuluka-po neli umo. 2Naŋgawa ati ŵafoŋkole pansi paSyeoli, ukuŵoko kwanji kukaŵafumya-mo'mo; naŋgaŵa ati ŵaninine mwiulu lukoso ŋkawaselusya ukuŵafumya-mo namomo. 3Kaŵili naŋgaŵa ati ŵafisame peulu palupili lwaKameli, ŋkafwaya-fwaya nekuŵafumya-pwapo; naŋga wa ati ŵafiswe napamenso anji munsi lukoso mucisiŵa, uko nako ŋkatfunda insoka, ikaŵasuma. 4Kaŵili naŋgawa ati wave muli ŵukaili pamenso atupondo twaŵo, uko ŋkaitunda impoko, ikawepaya; lomba ŋkateka amenso anji pali ŵo mukuŵacitilo'kuŵifya, ukuŵacitilo'kuwama, teko. 5Pakuti ŵaSikulu, Yawe wamaŵumba, niŵo aŵakuma-po pacalo, lomba kacisuŋguluka; ŵonse aŵalukwikala-mo ŵakalila nemisowa; peŋka conse cikasuntuka koti niNika, nekubwela liŵili koti niNika yakuIjipiti. 6Niŵo aŵeŵaka ifipinda fyaŵo mwiulu, aŵekalicile umuceleŵela caŵo pacalo; niŵo aŵeta amenda amucisiŵa nekwetulwila pamenso acalo; niŵaYawe esina lyaŵo.
7Kansi mweŵo tamuli koti ŵana ŵaŵaEtiopia kuli neŵo, mweŵana ŵakwe Isilaeli? efilukulaŵila ŵaYawe. Kansi nsinalifumisye Isilaeli mucalo caIjipiti, neŵaFilisiti muKafitoli, neŵaSilya muCili? 8Woneni, amenso aŵaSikulu Yawe ali paŵufumu ubwakuŵifya, lomba ŋkawonala ukuŵufumya pamenso acalo; lintu ili nsikonala lukoso iŋanda yakwe Yakobi, efilukulaŵila ŵaYawe. 9Pakuti ŵoneni, ŋkafunda, nekusansa iŋanda yakuIsilaeli pakati pamikoka yonse yaŵantu, koti nifyefyo ifi pasanswa kulusanso; naŋgawe'fyo neli lupeke lumo talukaponena pansi. 10Imbifi syonse isyakuŵantu ŵanji sikafwa kumpoko, isilaŵila ati, Ukuŵifya tekuti kukakumane nafweŵo neli kutuŵucila.
11Pakasuŵa ako ŋkemika umutanda wakwe Dafidi, uyo uwile, nekusaka-mo mufilyaŋgwa ifyakuko; kaŵili ŋkeŵakulula ifitiŵacile fyakuko, nekuwiŵaka koti nipansiku syakale; 12ati ŵakapoke aŵakusyala-po paEdomi, nemikoka yonse yaŵantu iyakwilikwa kwisina lyanji, efilukulaŵila ŵaYawe aŵalukucite'fyo. 13Ŵoneni, efilukulaŵila ŵaYawe, insiku silukwisa, lomba umulimi akakumana newakuteŵula, newakunyanta imfaina nekukumana newakuminsa imbuto; kaŵili amapili akaponya ulufaina lwanse, netupili tonse nekusuŋguluka. 14Peŋka ŋkabwesya liŵili ŵukaili bwaŵantu ŵanji aŵaIsilaeli, eli ŵakeŵakulula imisi iyonaicile, nekwikala-mo; kaŵili ŵakaŵyala amaŵala amifaina, nekunwa kumfaina syakuko; kaŵili ŵakalima amaŵala, nekulukulya ifisepo fyakuko. 15Popele ŋkawalimba pacalo caŵo; tekuti ŵakalimbulwe liŵili ukuŵafumya pacalo caŵo ico naŵapela, efilukulaŵila ŵaYawe Lesa woŵe.
Currently Selected:
Amosi 9: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
