Nayumi 3
3
1Isyamo liŵe kumusi wamilopa! Uliiswile ifyaŵufi nefyakutapwa. Ifyakutapwa tafipela. 2Pali ukukwepula kwabwembya, necipupu cakukoloŋkosya kwamikoŋko, naŵakafwalo aŵalukutelententa, neŋgolofwana isilukucilaka; 3neŵapali ŵakafwalo aŵalukunina, nempoko isilukuŵyataka, nemafumo alukumwekaka, pamo neŵumbe'likulu lyaŵepailwe, nemupili ukulu wafitumbi; lomba ifisa tafipela; aŵantu ŵalalitutwila pafisa fyaŵo; 4pakuti pabwinji bwaŵucencemesi bwamwanakasi umucencemesi uwaŵulombe, nyinaŵufwiti, ulukuyulisya imisyoŵo yaŵantu kuŵucencemesi bwakwe, nekufyulisya ifisolo kuŵufwiti bwakwe. 5Ŵona-ko ndikuŵucile, efilukulaŵila ŵaYawe ŵamaŵumba; lomba ŋkasuntula iŋguwo syoŵe ukusifisya napamenso oŵe; eli ŋkaibwenesya imisyoŵo yaŵantu ubwalondwa ŵoŵe, neŵufumu insoni yoŵe. 6Kaŵili ŋkaposa pali weŵo ifiko ifyakunekasya mumutima, nekukuleŋgesya ati cipakaŵi, nekukwikalika ati cakutamba lukoso, 7Popele apo pakaŵa ati ŵonse aŵo aŵakukulola ŵakaŵutuka kuli weŵo, nekulaŵila ati, Ninife waonalwa; mbaninani ukamulilila? Mbamfwaye kulipi aŵakukusaŋgalasya?
8Kani ulicilile ukuwama napali Noamoni uwaikalicilwe pakati panika, uwasiŋgulucilwe kumenda, uyo iliŋga lyakwe ilikosele cisiŵa, neciŵumba cakwe camenda. 9Icalo caEtiopia necaIjipiti fyali makosa akwe, akuŵulo'kupela; Putu neŵaLubi cŵakukofwa-ko. 10Naŋgaŵe'fyo ye walitwitwe, waliile muli ŵukaili; kaŵili aŵana ŵakwe aŵanice ŵalukusansalwa ukupelele imiseŵo yonse; lomba ŵalukufiposela ifipa ifileme fyakwe; kaŵili aŵalalume ŵakwe ŵaŵuleme ŵonse nekukakwa kuminyololo.
11Weŵo kaŵili ukalukupendelwe nekulukufiswa; nawe kaŵili ukafwaya-fwaya umwakulipulusisya pakuti patupondo. 12Inanda syoŵe isikosele isyaŋkondo syonse sikalukuli koti mikuyu ili neŋkuvu syakutaŋgo'kupya; kani yo nekupuŋganiwa, ifisepo fiŋgaponena mukanwa kawakulya. 13Wona-ko, aŵantu ŵoŵe pakati pali weŵo ŵanakasi; ifilyaŋgwa ifyakucalo coŵe filitwisucile isu utupondo toŵe. Umulilo waoca imitaŵiko yoŵe.
14Kolitapila amenda pakuti pakusiŋgulukwa; kokosya Inanda syoŵe isyaŋkondo. Injila mwikanda lyeŵumba, unyantale amatipa, ukosye umupili umwakocela incelwa. 15Mopelo'mo umulilo ukakulya; kaŵili impoko ikakupinika, nekukulya koti ninteŋgute; kolifusya uŵe ŵenji koti ninteŋgute; uŵe ŵenji koti ninsye. 16Wafusya aŵolisi ŵoŵe ukucilo'bwinji napatuwaŋgawaŋga utwamwiulu; inteŋgute silonala, lomba nekoŋgoloka. 17Imfumu syoŵe sili koti niŵatete, nefilolo fyoŵe nafyo fili koti fikoto fyansye, isiikala pafikuti pakasuŵa kampepo; sombi pakutuntumuka akasuŵa siloŋgoloka: lomba pantu pasiko apo sili tapesibwa. 18Wemfumu yakuAsilya, aŵembesi ŵoŵe ŵalukulembwasika, nefileme fyoŵe nafyo nekulukutusya, ncŵantu ŵoŵe naŵo nekupalaŋganisiwa pamapili; tapali-po neli umo uwakuwawuŋganya. 19Tapali-po ukuposya ukusomenwa koŵe; iciweŋga coŵe cililemene. Ŵonse aŵakumfwa iceŵo icakuli weŵo walalisya amapi ukulukukusembela; pakuti mbaninani utaalukuficilwa liŵili liŵili naŵumbifi ŵoŵe?
Currently Selected:
Nayumi 3: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
