Nayumi 2
2
1Uyo usansala wakuŵucila; kolama amaliŋga aŋkondo, ucete insila, ukosye uluŵunda loŵe, uŵusye amakosa oŵe ukwakuti. 2Pakuti ŵaYawe ŵalukubwesya uŵuleme bwakwe Yakobi, koti ŵuleme bwakwe Isilaeli; pakuti aŵakutapa ŵaliŵafubwile, nekonala imitano yaŵo. 3Iŋgaŵo yaW'amakosa ŵakwe yaŵa ikasicile; ifita filifwite ifikasicile; iŋgolofwana silukuŵyata kumfitwe pakasuŵa kakwansika ye, nemafumo nao nekusumbwa ukwakutinisya. 4Iŋgolofwana silukupuputwa mumiseŵo, nekusinincisyansyanya mumikwakwa ikulu; amekalilo asisyo alipalene nefimuni, silendesya koti tumpesimpesi. 5Alukwanuka ifita fyakwe ifyalupata; nafyo kafilitutula pakwenda, kafyendesyo'kuya kuciŵumba cakuko, lomba necakulwilamo kacansikwa. 6Ifiŵi ifisiŋka umuloŋga kafiisulwa-ko, lomba nekatanino kakasuŋguluka. 7Umulandu ulipinicilwe; alifimbulucile, nekutwalwa; lomba aŵalanda ŵakwe aŵanakasi ŵalukulila nesiwi lyaŵaciŵa ili ŵapama intiŵi syaŵo. 8Sombi nekale konse Ninife wali koti lisiŵa lyamenda; naŋgaŵe'fyo ŵalukuŵutuka; kaŵalaŵila ati, Imakaneni, imakaneni! Sombi papo'muntu uwakusyoloka. 9Kamupoka icitapo cesilifa, mupoke necitapo cegolide; pakuti tafipelele ifyakuŵuŋganisiwa, uŵuleme bwamaŵoni onse aŵeme. 10Umusi uli wakuŵulamo neli kantu, walukoso, ulionawilwe; lomba nemutima kaufuma, nemakufi kaapamana, nensoni isikulu kasili mumunda syonse, napamenso paŵo ŵonse kapatuŵuluka.
11Mbacili kulipi iceŋgo caŋkalamu, nepakulya aŵapempela ŵaŋkalamu, apalukwenda-enda kasakalabwe nanyinaŋkalamu nemupempela, apakuŵulo' kutinisiwa kuŵantu ŵonse neli umo? 12Kasakalabwe walukupandala inama isyakukumana aŵapempela ŵakwe, nekufina pamikosi isyasyanakasi syakwe, nekwisusya amaceŋgo akwe ifinani, nemwakulala-mo mwakwe inama syakwipaiwa. 13Ŵona-ko ndikuŵucile, efilukulaŵila ŵaYawe ŵamaŵumba; lomba ŋkoca iŋgolotwana syakwe mucusi; kaŵili impoko ikalya aŵapempela ŵoŵe aŵaŋkalamu; telyo ŋkapinika ifyakulya fyoŵe ukufifumya pacalo capansi; peŋka isiwi lyaŋkalamba syoŵe tekuti likomfwanike liŵili.
Currently Selected:
Nayumi 2: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
