Abakuci 1
1
1Ŋgu umulandu uyo abwene Abakuci uwakusimika.
2MweŵaYawe, mbaŋkalukulila impindi yasyani, ukuŵulo'kumfwa-po mweŵo? Ndukumulilileni pakuti paŵuŋgwa; sombi mweŵo ukupulusya, mweŵone! 3Mbanindo mulukumbwenesya ukusendama, nekulola pamuleŋgululo? Pakuti ukutapa neŵuŋgwa fili pamenso anji; lomba pali uluŵo, nekupicisya kaŵili kulukuŵuka. 4Pakuti pali fyefyo ifunde lilukuleŵela, nekusololola nako takutulika-po neli kutulika, tau; pakuti aŵakuŵifya ŵalukusiŋguluka aŵaluŋgeme; pakuti pali fyefyo palukufuma ukusololola ukuŵeyekele.
5Kamuŵona pakati paŵenafyalo, mutambe, mukaŋkamane ukwakuti; pakuti pansiku syenu, ndukucite'cakucitwa ico tamukacetekela, naŋgaŵa'ti muŋgaŵulwa co. 6Pakuti ŵoneni, ndukuŵusya aŵaKalidaya, uyo-musyoŵo waŵantu uwaŵukali uwakumanama, ulukwenda muŵutali bwacalo capansi mukupoka apakwikalila apatapali pauo. 7Ŵo ŵakutinisya ŵakuleŋgesya ukususwa; ukusololola kwaŵo neŵuleme bwaŵo ŵulafuma kuli ŵo aŵene. 8Ŵakafwalo ŵaŵo kaŵili ŵalicilile uluŵilo napancense, nekucilo'ŵukali napamimbulu yaciŋgulo; lomba aŵantu ŵaŵo aŵapali ŵakafwalo ŵalalitwala kuntanjile; icine, aŵantu ŵaŵo aŵapali ŵakafwalo ŵalafumo'kutali; ŵalapalala koti niŋoŋga ilukwendesya mukulukulya. 9Ŵonse ŵalesa mukucito'ŵuŋgwa; ukusantuka kwapamenso aŵo kulilolele kumutulesuŵa; lomba ŵalaŵuŋganya ŵakaili koti museŋga. 10Icine, alatoŋgala imfumu, netufumu nato twakusekwa kuli ye. Alaseka lukoso ponse apakosele pakulwa; pakuti alacite'mipili yefukutu nekupapoka. 11Peŋka akalulumucila-ko koti cipupu, nekupita-ko, nekuŵa nemulandu, eye uyo amakosa akwe nilesa wakwe.
12Kansi tamulifumine kumpindi yamuyayaya, mweŵaYawe Lesa wanji, Aŵo aŵaswetelele ŵanji? Tatukafwapo. MweŵaYawe mwaansika ati ŵasininwe; mweŵo mweCibwe, mwaŵekalika ati ŵapamwe. 13Mweŵo mwemuli nemenso aswetele atesi ukutamba ŵumbifi, atesi kulola pakuŵeyeka, mbanindo mulukuŵalolela aŵalukuŵaalucila aŵaŵyaŵo, nekulukwikele celele, ili imbifi ilukumumina lukoso umuntu ucilile ukuluŋgama napali yo, 14nekwalula aŵantu ati ŵaŵe koti lisaŵi lyamucisiŵa, nakoti filoŋgolo ifikalaŵa, ifitafikwete'mfumu? 15Alaŵekata ŵonse kundoŵo, nekuŵekasya kukombe kakwe, nekuŵaloŋganisisya mucamyando cakwe icakukula; pakuti pali fyefyo alasemba nekulukusaŋgalala. 16Pakuti pali fyefyo alepaila akombe kakwe umulambu, nekoca ifinucile bwino mukucindika icamyando cakwe icakukula; pakuti nikuli fyefyo icakwaŵana kwakwe cikulu, nefinani fyakwe nafyo finji. 17Pakuti pali fyefyo, kani aŋgasomona impoko yakwe, nekulukuŵepayala impindi yonse aŵamisyoŵo yaŵantu?
Currently Selected:
Abakuci 1: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
