Nayumi 1
1
1Ŋgu umulandu wakuNinife. Ndi ibuku lyakuŵona kwakwe Nayumi umuElikosi.
2ŴaYawe niŵaLesa ŵaŵukwa aŵabwesyo'mulandu; ŵa Ya we ŵalabwesyo' mulandu, ŵaliiswile ukukalipa; ŵaYawe ŵalaŵabwesesye'milandu aŵapate ŵaŵo, nekutulamino'ŵukali utupondo twaŵo. 3ŴaYawe ŵalakokolo'kukalipa; ŵali neŵukulu bwamakosa; tekuti ŵakaŵaleke lukoso aŵali nemilandu. ŴaYawe ŵali nensila yaŵo mukapupulwa namukutukala; amakumbi likuŋgu lyakumakasa aŵo. 4Ŵalakanya icisiŵa nekucipwisya, nekumya inika syonse. Basyani alukulela pamo naKameli; kaŵili iluŵa ilyakuLebanoni lilukulela. 5Amapili alateŋkana apa ŵali ŵo, netupili nato tulasuŋguluka; kaŵili icalo naco cilasuntuka pamenso aŵo; icine, icalo capansi naŵo ŵonse aŵalukwikala-mo. 6Mbaninani uwisi ukwimakana pamenso akufitwa kwaŵo? Mbaninani uwisi ukwikala pakukalipa kwaŵukali bwaŵo? Uŵukali bwaŵo ŵuletuluka koti mulilo; amabwe nao nekusansalwa kuli ŵo.
7ŴaYawe ŵaliweme, niŋanda ikosele pakasuŵa kakukatasiwa; ŵalaŵesiŵa aŵapema-mo muli ŵo. 8Sombi kukukuŋkulucisya kwamenda alukuputa ŵakasilisya apali utupondo twaŵo, nekututamfisya mumfinsi.
9Mbamulukuŵalaŋgulucile'ndo ŵaYawe? Ŵakasilisya sili. Ukupensya tekuti kukaŵuke liŵili. 10Pakuti, naŋgaŵa'ti ŵali koti myuŋga ikakene, nekutontola tontolo koti nikubwalwa bwaŵo, ŵakapya lukoso koti cani icumine. 11Pafuma muli weŵo umbi ulukuŵaalakanisisya ŵaYawe ŵumbifi, ulukufunda ifyakuŵifya.
12ŴaYawe ŵalukulaŵile'fi ati: Naŋgaŵa'ti ŵali nemakosa onse, ŵenji; naŋgaŵe'fyo ŵakapinikwa, nawoyo naye akafwa. Naŋgaŵa'ti nalikupensesye, tekuti ŋkupensye nafimbi, tau. 13Pano lomba nakukonona icikoŋkoli cakwe ukucifumya kuli weŵo, nekupandula pakati ifyakukaka fyoŵe. 14Kaŵili ŵaYawe ŵafunda ifyakuli weŵo, ati ifyesina lyoŵe tafikaŵyalwa liŵili; ŋkapinika iciŵumbwaŵumbwa icakuŵaswa necakusuŋgululwa ukufifumya muŋanda yaŵalesa ŵoŵe; kaŵili ŋkacita icilende coŵe, pakuti ulikanaminwe.
15Ŵoneni pamapili amakasa awoyo uleta ifyeŵo ifiweme, ulukutulisya uŵutende! WeJuda, lama ifitenje fyoŵe, ucite koti kulayana koŵe; pakuti iyombifi tekuti ikapite muli weŵo liŵili; ilipinicilwe pini.
Currently Selected:
Nayumi 1: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
