Mika 7
7
1Ndisyeme! pakuti neŵo ndi koti nipakuloŋgela ŵo ifisepo fyalusuŵa, nakoti nimfaina isi ŵacilaka pakuloŋgela: tapali-po neli cisaŋgo icakulya, neli lukuyu ulwakutaŋgo'kupya ululukukumbwa umutima wanji. 2Umuntu utonda ŵaLesa alifwile mucalo; tapali-po uluŋgeme pakati paŵantu. Ŵonse ŵalaŵelamina mukupokomosye'milopa. Ŵonse ŵalatamfyansyanya neŵakwaŵo mukwikasyansyanya kutombe. 3Iminwe yaŵo ili pafyakuŵifya mukufikonsya; imfumu nemusololwesi walalombe'siŋkakanwa; naco icileme nekusimbula ukufwaya ukuŵipile ukwamumutima wacico; fyopele'fyo ŵalaciposansyanya. 4Uweme uwapali ŵo ali koti cisosolo, neuluŋgeme lukoso naye alukucilo'kuŵipa napacikuti camvuŋga: akasuŵa kaŵakalama ŵoŵe, ekakuficilwa koŵe, kalificile; lomba pano ukufuluŋgana kwaŵo kuli apepi. 5Tekucetekela muciŵusa, neli kupema-mo munsolosi, tau; kolama ifiŵi fyakukanwa koŵe, eŋgesa mukumfwa umwanakasi ulele pantiŵi yoŵe. 6Pakuti umwana umwalalume alawapufya ŵawisi, nemwana umwanakasi naye nekuŵaŵucila ŵanyina, nemulokasi naye nekuŵaŵucila ŵanyina-fyala; lomba utupondo twamuntu eŵalalume awamuŋanda yakwe umwine.
7Sombi neŵo, nakuŵalola ŵaYawe; nakupembelela ŵaLesa ŵakupuluka kwanji; ŵaLesa ŵanji ŵakaŋumfwa. 8Wemupate wanji, tekunsembela neŵo. Pakuwa neŵo, ŋkema liŵili; pakwikala neŵo mumfinsi, lomba ŵaYawe ŵakalukuli kutuŵa kuli neŵo. 9Ŋkalukusumina ukufitwa kwaŵaYawe, pakuti naŵaŵifisya, ili tawaŋgalawilila iceŵo canji, nekuncitilo'kusololola. Ŵakamfumya nekundetela kukutuŵa; eli ŋkawona ukuluŋgama kwaŵo. 10Popele umupate wanji akafiŵona, nensoni kaŵili nekufimbapo pali ye, uwalaŵile kuli neŵo ati: Mbaŵali kulipi ŵaYawe Lesa woŵe? Amenso anji akamuŵona; pano akunyantalwa koti matipa amumiseŵo.
11Pali akasuŵa akakwiŵaka ifiŵumba fyoŵe! Pakasuŵa ako ifunde likatesiwa ukutwalwa ukutali. 12Pakasuŵa ako ŵakesa kuli weŵo, aŵakufuma kucalo caAsiliya nakumisi yakuIjipiti, nakucalo caIjipiti ukufika nakuNika; ukufuma kucisiŵa ukufika nakucisiŵa cimbi; ukufuma kulupili ukufika nakulupili lumbi, 13Naŋgawe'fyo icalo cikonaika, pakuti pali ŵaŵo aŵalukwikala-mo, pakuti pafyakuŵa-po pakucita kwaŵo.
14Wembeleni aŵantu ŵenu kundondo yenu, itaŋga lyaŵupyani bwenu, aŵalukwikala weŋka mwiyamba pakati paKameli; ŋgaŵalukulya muBasyani namuGilyadi, koti nipansiku syakale.
15Koti nipansiku syakufuma koŵe mucalo caIjipiti, ŋkamubwenesya ifyakukaŋkamana, 16Aŵenafyalo ŵakaŵona nekuŵa nensoni pakuti pamakosa aŵo onse; ŵakaŵika iminwe yaŵo pakanwa kaŵo, nematwi aŵo nao akasiŋka, 17Ŵakamyaŋga ifukutu koti ninsoka; koti filoŋgolo fyapansi ŵakafuma-mo umo ŵafisamine ili ŵatutuma; ŵakafika kuli ŵaYawe Lesa wesu ili ŵasuswa, nekulukutina pakuti pali weŵo.
18Mbaniŵanani niŵaLesa koti nimweŵo, aŵalukufitulucila ukusendama, nekupita lukoso pakupulaisya kwaŵakusyala-po ŵaŵupyani bwaŵo? Taŵalukulaminina ukukalipa kwaŵo, pakuti ŵalukutemenwa muluse. 19Ŵakaaluluka nekutucitile'ŋkumbu; ŵakanyantala pansi pamakasa ukusendama kwesu; lomba mukaposa ifyakuŵifya fyaŵo fyonse mucisiŵa icitali. 20Mukalukumucitila Yakobi ŵucine, nekumucitila Ablaamu uluse, ulo mwalapile kuli ŵawisifwe ukufuma kunsiku syakale.
Currently Selected:
Mika 7: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
