Mako 9

1Lomba ŵalilaŵile kuli ŵo ati: Icinenene ndukumuŵuleni ati: Epo ŵali ŵambi aŵemakene pano aŵataŵakomfwa-po imfwa neli panini, ili tawaŋgaŵuŵona Uŵufumu bwaŵaLesa ŵulukwisa nemakosa.

2Peŋka, ili syapitile insiku sisanu nakamo, ŵaYesu ŵalitwite naPetilo na Iakobo naYoane, nekuŵaninika palupili ulutali kumpelo ŵeŋka; lomba ŵalialucile pamenso aŵo: 3nefyakufwala fyaŵo fyalialucile ukulukusasamuka ifituŵile tuu, fyopele'fyo awakusaŋgula aŵapansi ŵonse taŵesi neli umo ukufitufya. 4Lomba nekupulumucila kuli ŵo Elaija naMose; naŵo ŵalukwambala naŵaYesu.

5Peŋka Petilo aliasucile, nekulaŵila kuli ŵaYesu ati: MweŵaLabi, cawama ati tulukuli pano; ŋgatwiŵake imitanda itatu: umo wenu, umbi waŵaMose, naumbi nawo waŵaElaija. 6Pakuti ye taafiisiŵile-po ifyakulaŵila, pakuti ŵo ŵaliŵele nemwenso. 7Peŋka lyaliisile ikumbi nekuŵasesemucila: nesiwi lyalifumine-mo ati: Uyu Mwana wanji untemenwe: mulukumumfwa. 8Impindi iyo vopele, pakuceŵuka ŵo, taŵabwene-po liŵili aŵantu, sombi niŵa Yesu weŋka pamo naŵo.

9Peŋka'po, ili ŵalukuseluka kulupili, ŵaYesu ŵaliŵacenjesye ati: Tekuŵula aŵantu ŵonse neli umo ifyo-fintu ifi mwaŵona, ili taaŋgawuka paŵafwile Umwana waMuntunsi. 10Naŵo ŵalilamine amasiwi ayo, nekulukwipusyansyanya ati: Fili syani ifyakuŵuka paŵafwile? 11Peŋka ŵaliŵepwisye ati: Pakuti pando aŵalembesi ŵalaŵila ati Elaija eukataŋgo'kwisa? 12Naŵo nekuŵaasuka ati: Icine Elaija eukataŋgo'kwisa nekuŵusya liŵili ifintu fyonse; sombi syani fyalembelwe ifyakuMwana waMuntunsi ati akasomenwa kufintu ifinji, nekupufiwa? 13Sombi ndukumuŵuleni ati, Elaija aliisile, neŵantu naŵo ŵalimucitile fyonse'fyo ifi ŵafwaile, koti nifyopele' fyo ifyalembelwe ifyakuli ye.

14Peŋka'po, pakufika kuŵasambile, ŵalibwene iŵumba ilikulu lilukuwasiŋguluka, neŵalembesi naŵo ŵalukupicisya naŵo. 15Peŋka ilyo-ŵumba lyonse, ili lyaŵabwene, lyalipulilile ukukaŋkamana lukoso ukwakuti, nekuyo'luŵilo kuli ŵo, nekuŵasekela. 16Naŵo nekuŵepusya ati: Mbafindo mulukupicisya naŵo? 17Peŋka umbi peŵumbe'lyo aliŵaasucile ati: MweŵaSambisi, naleta kuli mweŵo umwana wanji umwalalume uli nemupasi usincile amasiwi; 18lomba uko konse uku umwikatila, ulamupandula; naye nekulukusaika, nekucencemya nemeno, nekulukondele ukwakuti. Peŋka nali nalawila kuŵasambile ŵenu, ati ŵautamfye; sombi taŵasiŵile-po. 19Naŵo nekuŵaasuka ati: Mweŵantu, mweŵacitentekwa icakuŵulo'kucetekela! Mbanjikale nenu impindi yasyani? Mbaŋkalukumusumineni impindi yasyani? Muleteni kuli neŵo. 20Naŵo ŵalimutwite kuli ŵo; peŋka, pakuŵaŵona ŵaYesu, uyo-mupasi walipulilile ukumupandulo' muntu uyo ukwakuti; naye nekuwila pansi ukulukwalaŋgana, ili asaika. 21Lomba ŵaYesu ŵaliŵepwisye ŵawisi ati: Mbanimpindi yasyani yapita ili waisile uyu kuli ye? Naye nekwasuka ati: Pampindi yakubwanice. 22Nakaŵili walukumuposa liŵili liŵili namumulilo namumenda, mukumonala; sombi, kani muliisi ukucita akantu, mutucitile' ŋkumbu, mutofwe-ko. 23Naŵo ŵaYesu nekumweŵa ati: Kani muliisi! Ifintu fyonse filiisi ukucitwa kuli woyo ucetekela. 24Peŋka'po naŵawisi umwana uyo nekupulilila ukuŵilicisya ati: Ndukucetekela; mukofwe-ko ukukanika kwanji!

25Lomba ŵa Yesu, ili ŵabwene ati iŵumba lilukuŵutucila ukuwuŋgana, ŵaliukenye umupasi uŵipile, nekulaŵila kuli wo ati: Wemupasi waŵusincile amatwi nemasiwi, ndukukufunda neŵo ati: Ufume-mo muli ye, tekwinjila-mo muli ye liŵili. 26Peŋka, pakuŵilicisya, nekumupandulo'kwakuti, walifumine-mo; nemwana uyo nekuŵa koti ufwile, fyopele' fyo aŵantu aŵakucila ubwinji ŵalilaŵile ati: Afwa! 27Sombi ŵaYesu ŵalimwikete kuminwe, nekumuŵusya; naye aliimine. 28Peŋka, ili ŵainjile muŋanda, aŵasambile ŵaŵo ŵaliŵepwisye kumpelo ati: Mbanindo tatwisiŵile-po ukuutamfya-mo? 29Naŵo ŵalilaŵile kuli ŵo ati: Umukoka uyo tawisi-po ukufumamo kufintu fyonse, sombi nikukutembela kweŋka.

30Eli ŵafumine-ko kulya, nekupita pacalo caGalili; naŵo taŵafwaile-po ati aŵantu ŵonse ŵesiŵe neli umo; 31pakuti ŵalukusambisya aŵasambile ŵaŵo, nekulaŵila kuli ŵo ati: Umwana waMuntunsi waisa ili aloŵelwa kuminwe yaŵantu, naŵo ŵakamwipaya; peŋka, ili akepaiwa, pakupita insiku sitatu, akaŵuka liŵili. 32Sombi ŵo tawaisiwile-po bwino amasiwi ayo, nekutina ukuŵepusya.

33Lomba ŵalificile kuKapanaumi; peŋka, ili ŵali muŋanda, ŵaliŵepwisye ati: Mbafindo mwalukwipusyansyanya pansila? 34Sombi naŵo ŵaliikele celele; pakuti ŵalukupicisyansyanya pansila ati, mbaninani ukekala mukulu. 35Popele ŵaliikele pansi, nekuŵeta aŵo ikumi naŵaŵili, nekulaŵila kuli ŵo ati: Kani umuntu afwaye ukwikala wakutaŋga, ŋgaakawe wakuŵapelela-ko ŵonse, aŵataŵataŵile ŵonse. 36Naŵo ŵalipokele umwanice, nekumwikalika pakati pali ŵo; popele, ili ŵamufukete, ŵalilaŵile kuli ŵo ati: 37Aŵantu ŵonse ukapoka umwanice umo uwakuŵe'fi mwisina lyanji, akampoka neŵo: neukampoka neŵo, taakampoka neŵo, tau, sombi niŵaŵo aŵantumine.

38Yoane naye walilaŵile kuli ŵo ati: MweŵaSambisi twalibwene umbi umuntu walukutamfya ifiŵanda mwisina lyenu: peŋka twalimukenye, pakuti taalukutulonda fweŵo. 39Sombi ŵaYesu ŵalilaŵile ati: Tekumukanya, pakuti tapali-po uwakucita icimpelampela mwisina lyanji, lomba nekupulilila ukundaŵisya neŵo. 40Pakuti utaali mupate wesu, ciŵusa cesu. 41Pakuti aŵantu ŵonse ukamupeleni iŋkomeci yamenda akunwa pakuti muli ŵantu ŵaŵaKlistu, icinenene ndukulaŵila kuli mweŵo ati taakalufya neli panini ukulambulwa kwakwe.

42Nakaŵili, aŵantu ŵonse ukamututwisya umbi umwanice uwapali ŵaŵa aŵalukuncetekela neŵo, ukumwelelwa ukucila ati ye akakacilwe mumukosi necibwe icakupela-po uwuŋga, nekuposwa mucisiwa. 43Kaŵili kani ukuŵoko koŵe kukakututwisye, ukakupinike-ko; ukukwelelwa ati ukenjile mu Mweo, wecilema, ukucila napakuya nemaŵoko aŵili kuGeena, kumulilo utosimika; 44uko uku nematila aŵo taafwa-po, neli mulilo tosimika. 45Nakaŵili kani ulukasa loŵe lukakututwisye, ukalupinike-ko; ukukwelelwa ati ukenjile muMweo, wecilema, ukucila napakuposwa nemakasa aŵili muGeena; 46uko uku nematila aŵo taafwa-po, neli mulilo tosimika. 47Nakaŵili kani ilinso lyoŵe likakututwisye, ukaliloŵole-mo: ukukwelelwa ati ukenjile muŴufumu bwaŵaLesa, wewalinso limo, ukucila napakuposwa nemenso aŵili muGeena; 48uko uku nematila aŵo taafwa-po, neli mulilo tosimika. 49Pakuti aŵantu ŵonse ŵakaluŋgwa nemulilo. 50Umucele uliweme; sombi, kani umucele wasamuka, mbanikundo mukaukumya? Kamulukwikele nemucele muli mweŵo mweŵene, nekulukwikalansyanya neŵutende.

Currently Selected:

Mako 9: AAL59

Highlight

Copy

Compare