Mako 10

1Lomba ŵaliimine uko, nekufika kumitala iyakucalo caludiya bwisilya lyaJodeni: nemaŵumba alukuwuŋgana kuli ŵo liŵili; peŋka, koti kwisiŵila kwaŵo, nekulukuwasambisya liŵili. 2Peŋka ŵaliisile kuli ŵo aŵaFalisi, nekuŵepusya ifyakuŵesya ati: Kani ukwelelwa umuntu ukuleko'mukasi wakwe? 3Naŵo nekuŵaasuka ati: Mbafindo Mose amufundileni? 4Naŵo ati: Mose alisumine ukulemba iŋkalata iyakumukaninapo, popele nekumuleka. 5Sombi ŵaYesu ŵalilaŵile kuli ŵo ati: Pakuti pakukosa ukwamumitima yenu epo amulembeleni ifunde'lyo. 6Sombi ukufuma kumpindi yakuleŋgwa kwacalo, ŵaLesa ŵaliŵaleŋgele nemwalalume nemwanakasi. 7Pakuti pali fyefyo umwalalume aŋgaleka ŵawisi naŵanyina, nekwikalisya kumukasi wakwe; 8peŋka ŵoŵilo ŵakaaluka munefu umo; fyopele'fyo ŵukumo taŵali ŵoŵilo, sombi munefu umo. 9Pakuti pali fyefyo, ifyo ifi ŵalundenye ŵaLesa, aŵantu ŵonse tekufilekanya neli umo. 10Peŋka'po muŋanda aŵasambile ŵaliŵepwisye liŵili ifyafyefyo. 11Naŵo kaŵalaŵila kuli ŵo ati: Aŵantu ŵonse ukaleka umukasi wakwe, nekuupa naumbi, uyo akamuleŋgo'wucende. 12Kaŵili kani umwanakasi nekukana umulume wakwe, nekuupwa naumbi, uyo naye akacito'ŵucende.

13Peŋka ŵaliletele kuli ŵo utwanice ati ŵatutintile-po, sombi aŵasambile ŵaliŵakenye. 14Sombi ŵaYesu, ili ŵafibwene'fyo, ŵalifitilwe, nekulaŵila kuli ŵo ati: Tulekeni utwanice, ati twise kuli neŵo, tekutukanya; pakuti Uŵufumu bwaŵaLesa ŵuli kutwakuŵe'fi. 15Icinenene ndukumuŵuleni ati: Aŵantu ŵonse, utaakapoka Uŵufumu bwaŵaLesa koti kanice, uyo tesi akenjile-mo mulya, neli kwinjila konse. 16Lomba ŵo ŵalitufukete, nekututintila-po iminwe yaŵo, nekutusyucisya.

17Peŋka, ili ŵalukuya, ili ŵenda munsila, umbi umuntu aliŵutucile, nekufukama kuli ŵo, nekuŵepusya ati: MweŵaSambisi aŵaweme, ŋkacite'ndo ati ŋkapyane Umweo wamuyayaya? 18Naŵo ŵaYesu ŵalilaŵile kuli ye ati: Mbanindo ulukunjilika neŵo ati uweme? Tapali-po umuntu uweme, sombi ŵamo weŋka, eŵaLesa. 19Uliisi amafunde ati: Tekwipayo'muntu, Tekucito'ŵucende, Tekwiŵa, Tekusimika ifyaŵufi, Tekutumpaika, Ucindike ŵawiso naŵanoko. 20Naye nekuŵaasuka ati: MwewaSambisi, ifyo fyonse nalukufilama ukufuma kumpindi yawusaŋkwa bwanji. 21Lomba ŵaYesu, pakumutontomeka, ŵalimutemenwe, nekulaŵila kuli ye ati: Sombi icintu cimo eci tokwete-po; uve, ufiule fyonse'fyo ifi uli nafyo, uŵapele awapeŋgele, eli ukaŵa nemaŵoni kwiulu; peŋka wise, wimye umutaliko, ulukundonda. 22Sombi aliumfwile insoni pakuti pamasiwi ayo, nekufuma ili aŵombomano'kwakuti; pakuti ye ali nemaŵoni aenji.

23Peŋka ŵa Yesu ŵalicencentele, nekulaŵila kuŵasambile ŵaŵo ati: Kukatesye ukwakuti ukwinjila muŴufumu bwaŵaLesa aŵo aŵali nemaŵoni. 24Peŋka aŵasambile ŵalikaŋkamene ukwakuti pakuti pamasiwi aŵo. Sombi ŵaYesu ŵaliasucile liŵili, nekulaŵila kuli ŵo ati: Mweŵana ŵanji, kukatesye ukwakuti ukwinjila muWufumu bwaŵaLesa aŵo aŵapema-mo mumaŵoni. 25Capepi kuŋgamela ukwinjila pesiso lyansiŋgano ukucila napakwinjila muŴufumu bwaŵaLesa umuwile. 26Popele naŵo ŵalikaŋkamene lukoso ukwakuti, nekulaŵila kuli ŵo ati: Mbaninani lomba uwisi ukupuluka? 27ŴaYesu naŵo, ili ŵaŵatontomekele, ŵalilaŵile ati: Ifyo filukukaŋga aŵantu, sombi ukuwakaŋga ŵaLesa fyefi: pakuti ifintu fyonse filiisiŵilwe kuli ŵaLesa. 28Peŋka Petilo alitaticile ukuwewa ati: Ŵoneni, fweŵo twalisile fyonse, nekumulondeni! 29Ŵa Yesu ati: Icinenene ndukumuŵuleni ati: Tapalipo umuntu uwasile Inanda, neli ŵakwaŵo, neli niŋkasi, neli ninyina, neli niwisi, neli ŵana, neli maŵala, pakuti pali neŵo napakuti paCeŵo leiweme, 30utaakapoka-po pano pampindi ino umwanda, nemananda, neŵakwaŵo, neŋkasi, naŵanyina, neŵana, nemaŵala, pamo nekukululuka; napampindi iyo ikesa Umweo uwamuyayaya. 31Sombi aŵenji aŵatanjile ŵakapela-ko; naŵo aŵapelele-ko wakatanjila.

32Lomba ŵali pansila, ŵalukuya kuJ elusalemi, naŵo ŵa Yesu eŵaŵatanjilile; naŵo waluleukaŋkamana ukwakuti; neŵalukuŵalonda ŵalukutina. Naŵo ŵaliŵetile liŵili kumpelo aŵo ikumi naŵaŵili, nekutatika ukuŵaŵula ifyo ifikacitwa kuli ŵo, 33ati: Ŵoneni, tulukuya kujelusalemi; peŋka Umwana waMuntunsi akaloŵelwa kuŵapapatilisi aŵakulu neŵalembesi; naŵo ŵakamupiŋgwilo'kufwa, nekumuposa kuŵenafyalo; 34naŵo ŵakalukumutoŋgala, nekumusipila, nekumupama, nekumwipaya; peŋka, pakupita insiku sitatu, akaŵuka liŵili.

35Lomba ŵalipalamine kuli ŵo Jakobo naYoane, aŵana ŵakwe Sebedai, nekulaŵila kuli ŵo ati: Mwewa'Sambisi, tulukufwaya ati mwakutucitila fyonse'fi ifi twakumulombeni. 36Naŵo ŵalilaŵile kuli ŵo ati: Mbacindo ici mulukufwaya ati mucitileni? 37Naŵo nekulaŵila kuli ŵo ati: Mutusumine ati tukalukwikala, umbi kulwine Iwenu, umbi naye kucipiko muŵuleme bwenu. 38Sombi ŵaYesu ŵalilaŵile kuli ŵo ati: Tamufiisi-po ifi mulukulomba. Kani muliisi ukunwa kuŋkomeci iyo indukunwa-ko neŵo? neli kuŵatisiwa kukuŵatisya uko uku ndukuŵatisiwa-ko neŵo? 39Naŵo nekulaŵila kuli ŵo ati: Tulikwisi. Naŵo ŵaYesu nekulawila kuli ŵo ati: Iŋkomeci iyo indukunwa-ko, eimukanwa-ko; nakukuŵatisya uko uku ndukuŵatisiwa-ko, ekumukaŵatisiwa; 40sombi ukwikala kulwine lwanji neli nikucipiko canji takuli kwanji ati mpele, sombi nikuli ŵaŵo ŵeŋka aŵo aŵa kwaansicilwe limo. 41Peŋka ili ŵaumfwile'fyo aŵo ikumi, ŵalitaticile ukufitwa ifyakuli Jakobo naYoane. 42Sombi ŵa Yesu ŵaliŵetile, nekulaŵila kuli ŵo ati: Muliisi ati aŵo aŵebwa ukuŵekalika aŵenafyalo ŵalaŵakomeka; neŵakulu ŵaŵo naŵo ŵalaŵacitilo'ŵukulu; 43sombi kuli mweŵo ifyo tefyo: sombi mweŵo mwense, ukafwayo'kuŵa mukulu, eukaŵa wakumutaŵataŵileni. 44Nakaŵili ukafwayo' kuŵa wakutaŋga eukawa mupyunjisi wenu mwense. 45Pakuti neMwana waMuntunsi taesile-po mukupyunjilwa, sombi nimukupyuŋga, nekuposa umweo wakwe cakuŵaluŵula-ko aŵenji.

46Peŋka'po walificile kuJeliko; lomba, ili ŵalukufuma muJeliko pamo newasambile ŵaŵo neŵumba ilikulu, lomba Batimayo, umwana wakwe Timavo, impofu iyakulomba-lomba, yalukwikala kumbali yansila. 47Nayo, pakumfwa ati niŵaYesu aŵakuNasaleti, yalitaticile ukuŵilicisya, ati: MweŵaYesu, Mweŵana ŵakwe Dafidi, ŋgamuncitile'ŋkumbu neŵo! 48Lomba aŵenji ŵaliikenye ati: Koikele celele! Sombi navo yaliŵilicisye ukwakuti ati: Mweŵana ŵakwe Dafidi, ŋgamuncitile'ŋkumbu neŵo! 49Peŋka ŵa Yesu ŵaliimakene, nekulaŵila ati: Iiteni! Naŵo nekwiita impofu, nekulaŵila kuli yo ati: Teko'mutima, wime; ŵalukukwita. 50Nayo yalifulile icakufwala, nekwima bwaŋgu, nekufika kuli ŵaYesu. 51Naŵo ŵaYesu ŵaliyasucile nekulaŵila ati: Ulukufwaya ati ncite' ndo kuli weŵo? Peŋka impofu yalilaŵile kuli ŵo ati: MweŵaLaboni, ŋgandaŵe. 52Lomba ŵaYesu ŵalilaŵile kuli yo ati: Koya! Ukucetekela koŵe kwakupulusya. Impindi iyo yopele, nayo nekulaŵa bwino, nekuya ili iŵalonda pansila.

Currently Selected:

Mako 10: AAL59

Highlight

Copy

Compare